ត្រាំ បញ្ជាក់ថា កូរ៉េខាងជើង បានបំផ្លាញទីតាំងសាកល្បងអាវុធប្រល័យរបស់ខ្លួនចំនួន ៤ហើយ

2018-06-22 02:31:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិក លោកដូណាល់ ត្រាំ បាននិយាយកាលពីថ្ងៃទី២១ មិថុនាម្សិលមិញថា កូរ៉េខាងជើងបានបំផ្លាញទីតាំងសាកល្បងអាវុធនុយក្លេអ៊ែរធំៗរបស់ខ្លួនចំនួន៤ ដែលជាដំណើរឈានទៅរកការ«រំសាយអាវុធនុយក្លេអ៊ែរទាំងស្រុង»។ ការថ្លែងរបស់លោកត្រាំ គឺធ្វើឡើងនៅក្នុងជំនួបរដ្ឋបាលមួយ ក្រោយពីជំនួបប្រវត្តិសាស្ត្រជាមួយមេដឹកនាំកូរ៉េខាងជើង គីម ជុងអ៊ុន កាលប៉ុន្មានសប្ដាហ៍មុន។

មេដឹកនាំកូរ៉េខាងជើង គីម ជុងអ៊ុន និងប្រធានាធិបតីសហរដ្ឋអាមេរិក ដូណាល់ ត្រាំ ក្នុងពិធីចុះហត្ថលេខា អំឡុងជំនួបចចារជាប្រវត្តិសាស្រ្ដ នៅសណ្ឋាគារ Capella Hotel នៅសិង្ហបុរី នាថ្ងៃ១២ ខែមិថុនា ឆ្នាំ២០១៨

លោក ដូណាល់ ត្រាំ បានបញ្ជាក់ថា «ពួកគេ (កូរ៉េខាងជើង) បានបញ្ឈប់ការបាញ់មីស៊ីល រួមមានមីស៊ីលបាលីស្ទីកជាដើម។ ពួកគេកំពុងតែបំផ្លាញទីតាំងសាកល្បងអាវុធនុយក្លេអ៊ែររបស់ពួកគេ»។ លោកត្រាំបន្តទៀតថា «ពួកគេបានបំផ្លាញទីតាំង១ ក្នុងចំណោមទីតាំងសាកល្បងធំៗរបស់ពួកគេ។ ពិតទៅ វាមានចំនួន៤ ។ ហើយរឿងដែលសំខាន់នោះគឺ វានឹងក្លាយជាតំបន់គ្មានអាវុធនុយក្លេអ៊ែរទាំងស្រុង។»

ជុុំវិញរឿងនេះ វានៅមិនទាន់ច្បាស់ទេថា តើទីតាំងសាកល្បងមួយណាដែលលោកត្រាំ សំដៅទៅរក។ គួររម្លឹកថា កាលពីខែឧសភាកន្លងទៅ កូរ៉េខាងជើង បានបំផ្លាញទីតាំងសាកល្បងអាវុធនុយក្លេអ៊ែររបស់ខ្លួននៅក្នុងតំបន់ Punggye-ri ដែលរួមមានទីតាំងរូងក្រោមដីសាកល្បងចំនួន ៤។

គួរបញ្ជាក់ថា តាមរយៈកិច្ចព្រមព្រៀងរវាងលោក ត្រាំ និងលោក គីម ជុងអ៊ុន នៅប្រទេសសិង្ហបុរី កាលពីថ្ងៃទី១២ ខែមិថុនា កន្លងទៅ លោក គីម ជុងអ៊ុន នឹងប្ដេជ្ញាធ្វើការឆ្ពោះទៅរកការរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ ខណៈលោក ដូណាល់ ត្រាំ ប្ដេជ្ញាផ្តល់នូវការធានាផ្នែកសន្តិសុខទៅកាន់របបលោក គីម ជុងអ៊ុន៕

ប្រភព៖ Yonhapnews ប្រែសម្រួល៖ អឹុម ម៉េងស៊ាង