ខេត្តពោធិ៍សាត់ នឹងមានស្រុកថ្មីមួយ ដែលបំបែកចេញពីស្រុកបាកាន

2018-06-22 07:16:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ម៉ៅ ធនិន អភិបាលខេត្តពោធិ៍សាត់ បានប្រកាសថា នឹងលើកតំបន់រដ្ឋបាល ព្រមទាំងហេដ្ឋារចនាសម្ព័ន្ធនានា មកដាក់នៅក្នុងឃុំតាលោ ស្រុកបាកាន ដើម្បីបង្កើតជាស្រុកថ្មីមួយ មានឈ្មោះថា "ស្រុកសំសាន្ត" នៅឆ្នាំ២០១៩។ ការថ្លែងនេះ ធ្វើឡើងក្នុងពិធីសំណេះសំណាលជាមួយជាមួយប្រជាពលរដ្ឋទូទាំងឃុំតាលោ កាលពីថ្ងៃទី២០ ខែមិថុនា ឆ្នាំ២០១៨។

លោក ម៉ៅ ធនិន ថ្លែងក្នុងពិធីសំណេះសំណាលជាមួយកម្មករ-និយោជិតរបស់ក្រុមហ៊ុន១ នៅក្រុងពោធិ៍សាត់ កាលពីថ្ងៃទី១៤ ខែមិថុនា ឆ្នាំ២០១៨។ រូបថត៖ FB រដ្ឋបាលក្រុងពោធិ៍សាត់

លោកអភិបាលខេត្តបានអះអាងថា នៅពេលដែល "ស្រុកសំសាន្ត" ត្រូវបានបង្កើតចេញជារូបរាងហើយនោះ នឹងក្លាយជាស្រុកបង្អែកមួយ បន្ទាប់ពីទីក្រុងពោធិ៍សាត់ ដែលអាចជួយសម្រួលដល់ការផ្តល់សេវាសាធារណៈ ជូនប្រជាពលរដ្ឋឱ្យកាន់តែជិត កាន់តែលឿន មានតម្លាភាព និងប្រសិទ្ធភាពខ្ពស់។ លោកពន្យល់ថា ឃុំតាលោ មានលក្ខណៈភូមិសាស្ត្រល្អ ប៉ុន្តែមានចម្ងាយឆ្ងាយពីទីរួមស្រុកបាកាន ដែលពិបាកក្នុងការធ្វើដំណើរមកទទួលសេវាសាធារណៈ។

លោកបន្ដថា ការបង្កើតស្រុកថ្មីនេះ ត្រូវបានសុំការឯកភាព និងទទួលបានយល់ព្រមពីសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃសម្ពោធអគាររដ្ឋបាលសាលាខេត្តពោធិ៍សាត់ថ្មី នាពាក់កណ្តាលខែឧសភា ឆ្នាំ២០១៨កន្លងទៅ។

លោក ម៉ៅ ធនិន បានចាត់ឱ្យអភិបាលរងខេត្ត២រូប សហការជាមួយអ្នកជំនាញ ចុះសិក្សាប្លង់ពីលើអាកាស និងប្លង់ខាងក្រោម នៅលើផ្ទៃដីសាងសង់តំបន់រដ្ឋបាលថ្មីនេះ និងហេដ្ឋារចនាសម្ព័ន្ធនានា ជិត ១០០ហិកតា៕

ប្រភព៖ AKP ប្រែសម្រួល៖ សំភី