ចិន គ្រោងសាងសង់ផ្លូវដែកភ្ជាប់ទៅដល់រាជធានី នៃប្រទេសជិតខាងខ្លួន១

2018-06-22 08:32:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មហាយក្សចិន គ្រោងសាងសង់ផ្លូវដែកមួយខ្សែភ្ជាប់ពីភាគខាងលិចតំបន់តៃប៉ិនៃទីក្រុង Xigaze ប្រទេសចិន ទៅកាន់រាជធានី Kathmandu ប្រទេសនេប៉ាល់។ នេះបើតាមការចុះផ្សាយរបស់កាសែត China Daily នៅថ្ងៃទី២២ មិថុនាឆ្នាំ២០១៨នេះ។ គម្រោងសាងសង់នេះ គឺជាផ្នែកមួយនៃកិច្ចព្រមព្រៀងទ្វេភាគី ដែលត្រូវបានចុះហត្ថលេខា អំឡុងទស្សនកិច្ចជាផ្លូវការរបស់នាយករដ្ឋមន្ត្រីនេប៉ាល់ លោក Khadga Prasad Sharma Oli ទៅកាន់ទីក្រុងប៉េកាំង ប្រទេសចិន កាលពីថ្ងៃទី ២១ មិថុនាម្សិលមិញ។

លោក Khadga Prasad Sharma Oli(ឆ្វេង) និងលោក Li Keqiang ក្នុងជំនួបនាទីក្រុងប៉េកាំង កាលពីថ្ងៃទី២១ មិថុនា ឆ្នាំ២០១៨។ រូបភាព៖ Reuters

លោកនាយករដ្ឋមន្ត្រីនេប៉ាល់ បានថ្លែងនៅក្នុងកិច្ចសម្ភាសន៍មួយជាមួយកាសែតរដ្ឋចិន Global Times នៅថ្ងៃសុក្រនេះថា «ការតភ្ជាប់ផ្លូវឆ្លងកាត់ព្រំដែន គឺជារឿងអាទិភាពបំផុតរបស់នេប៉ាល់»។ ហើយលោក ក៏បានអំពាវនាវអោយប្រទេសទាំងពីរធ្វើការរួមគ្នាដើម្បីអភិវឌ្ឍប្រភពថាមពលវារីអគ្គិសនីរបស់នេប៉ាល់ផងដែរ»។

ជាមួយគ្នានេះ លោកនាយករដ្ឋមន្ត្រីចិន Li Keqiang បានថ្លែងដូច្នេះថា ចិន ក៏នឹងមានបំណងធ្វើការជាមួយនេប៉ាល់ដើម្បីស្ថាបនាបណ្ដាញផ្លូវកាត់តំបន់ហិមាល័យ តាមរយៈផ្លូវអាកាស កំពង់ផែ ផ្លូវគោក និងទូរគមនាគមន៍។

គួរបញ្ជាក់ថា ក្នុងជំនួបរវាងលោកOli និងលោកLi ភាគីទាំង២ បានចុះហត្ថលេខាលើកិច្ចព្រមព្រៀងជាង១០ រួមមានដូចជា បច្ចេកវិទ្យា ការដឹកជញ្ជូន ហេដ្ឋារចនាសម្ព័ន្ធ និងកិច្ចសហប្រតិបត្តិការនយោបាយ។ នេះបើតាមការចុះផ្សាយរបស់វេបសាយរបស់រដ្ឋាភិបាលចិន កាលពីថ្ងៃទី២១ មិថុនាម្សិលមិញ។

ប្រភព៖ Reuters ប្រែសម្រួល៖ អឹុម ម៉េងស៊ាង