បុរសខ្លាំង Erdogan បន្តឈ្នះការបោះឆ្នោត ក្រោយកាន់អំំណាច១៥ឆ្នាំនៅតួកគី

2018-06-25 02:46:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីតួកគី លោក Recep Tayyip Erdogan បានឈ្នះការបោះឆ្នោតអាណត្តិថ្មីដោយសំឡេងភាគច្រើន ក្នុងការបោះឆ្នោតជ្រើសរើសប្រធានាធិបតី ដែលត្រូវបានធ្វើឡើង កាលពីថ្ងៃទី២៤ មិថុនាម្សិលមិញ។ នេះបើតាមការបញ្ជាក់របស់ប្រធានគណៈកម្មការរៀបចំការបោះឆ្នោតកំពូលតួកគី លោក Sadi Guven នៅថ្ងៃចន្ទនេះ។

លោក Erdogan បានទៅចូលរួមបោះឆ្នោតនៅទីក្រុង Istanbul កាលពីថ្ងៃទី ២៤ មិថុនា ឆ្នាំ២០១៨។ រូបភាព៖ CNN

ភ្នាក់ងារសារព័ត៌មានក្នុងស្រុកមួយរបស់តួកគី បានចុះផ្សាយកាលពីថ្ងៃម្សិលមិញថា លោក Erdogan ទទួលបានសំឡេងឆ្នោត ៥២,៥% ខណៈគូប្រជែងសំខាន់របស់លោក គឺលោក Muharrem Ince មកពីគណបក្សប្រជាជនសាធារណៈ ទទួលបានសំឡេងឆ្នោតចំនួន ៣១,៧%។ លទ្ធផលនេះ គឺផ្អែកទៅលើការរាប់សន្លឹកឆ្នោតចំនួន ៩៩%។

សារព័ត៌មាន CNN បានចុះផ្សាយនៅថ្ងៃនេះថា ប្រជាជនតួកគីប្រមាណជាង ៥៩ លាននាក់ គឺមានសិទ្ធិទៅចូលរួមបោះឆ្នោត។ ថ្លែងទៅកាន់អ្នកសារព័ត៌មាន លោក Erdogan បានបញ្ជាក់ថា អ្នកចូលរួមបោះឆ្នោតទាំងអស់ មានប្រមាណជាង ៩០%។

គួរបញ្ជាក់ថា គណៈកម្មការរៀបចំការបោះឆ្នោតកំពូលតួកគី នឹងធ្វើការប្រកាសលទ្ធផលចុងក្រោយ នៅថ្ងៃសុក្រខាងមុខនេះ។

គួររម្លឹកដែរថា បុរសខ្លាំងតួកគី Erdogan វ័យ ៦៤ ឆ្នាំ បានចូលកាន់អំណាចអស់រយៈពេល ១៥ ឆ្នាំមកហើយ ដែលដំបូងឡើយលោកបានកាន់តំណែងជានាយករដ្ឋមន្ត្រី(២០០៣-២០១៤) និងក្រោយមកជាប្រធានាធិបតី(២០១៤-បច្ចុប្បន្ន)៕

ប្រភព៖ CNN | CGTN ប្រែសម្រួល៖ អឹុម ម៉េងស៊ាង