ឥណ្ឌា ក្លាយជាប្រទេសដែលខ្ចីលុយច្រើនជាងគេបំផុត ពីធនាគារ AIIB របស់ចិន

2018-06-25 08:29:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឥណ្ឌាដែលជាមហាអំណាចសេដ្ឋកិច្ចលំដាប់ទី៧ បានជាប់ឈ្មោះជាប្រទេសដែលខ្ចីលុយពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ច្រើនជាងគេបំផុត។ កម្ចីរបស់ឥណ្ឌាពីធនាគារ AIIB សម្រាប់ផ្គត់ផ្គង់គម្រោងហេដ្ឋារចនាសម្ព័ន្ធរបស់ខ្លួន បានកើនឡើងដល់ ៤,៤ ពាន់លានដុល្លារ ក្នុងរយៈពេល ៣ ឆ្នាំចុងក្រោយនេះ។ នេះបើតាមការបញ្ជាក់របស់រដ្ឋលេខាធិការកិច្ចការសេដ្ឋកិច្ចឥណ្ឌា លោក Subhash Chandra Garg នៅក្នុងសេចក្ដីថ្លែងការណ៍មួយ។

លោក Subhash Chandra Garg ថ្លែងនាពេលកន្លងមក។ រូបភាព៖ Ramesh Pathania

ការឲ្យដឹងនេះ ត្រូវបានធ្វើឡើង ស្របពេលដែលកិច្ចប្រជុំប្រចាំឆ្នាំលើកទី៣ របស់ធនាគារ AIIB កំពុងរៀបចំប្រព្រឹត្តទៅនៅក្នុងទីក្រុង Mumbai នៅថ្ងៃទី២៥ មិថុនា ឆ្នាំ២០១៨នេះ។ កិច្ចប្រជុំរយៈពេល ២ ថ្ងៃនេះ គឺផ្ដោតសំខាន់ទៅលើហេដ្ឋារចនាសម្ព័ន្ធ ក្រោមប្រធានបទ «នវានុវត្តន៍ និងកិច្ចសហប្រតិបត្តិការ»។

ជាមួយគ្នានេះ អគ្គនាយករងនៃធនាគារ AIIB លោក Danny Alexander បាននិយាយថា ធនាគារនេះ គឺពុំបានទាក់ទងទៅនឹងបញ្ហានយោបាយឡើយ ហើយរាល់គម្រោងទាំងអស់ ត្រូវតែឆ្លងកាត់ការធ្វើតេស្តរបស់ធនាគារពាក់ព័ន្ធនឹងបញ្ហាបរិស្ថាន និងនិរន្តរភាព។ លោកAlexander បានបន្ថែមទៀតថា ធនាគារ AIIB ក៏នឹងពិចារណាទៅលើការវិនិយោគ ក្នុងគម្រោងនៅក្រៅតំបន់អាស៊ីថែមទៀតផង។

គួរបញ្ជាក់ថា ធនាគារ AIIB គឺជាធនាគារអភិវឌ្ឍន៍ពហុភាគី ដែលបង្កើតឡើងក្នុងគោលបំណងជួយគាំទ្រ លើការស្ថាបនាហេដ្ឋារចនាសម្ព័ន្ធ ក្នុងតំបន់អាស៊ីប៉ាស៊ីហ្វិក។ ធនាគារដែលមានទីស្នាក់ការកណ្ដាលនៅទីក្រុងប៉េកាំងនេះ បានចាប់ផ្ដើមប្រតិបត្តិការក្នុងខែ មករា ឆ្នាំ២០១៦។ សព្វថ្ងៃនេះ ធនាគារនេះ មានសមាជិកចំនួន ៦៤ ប្រទេស ក្នុងនោះក៏មានកម្ពុជាផងដែរ។ កម្ពុជា បានក្លាយសមាជិករបស់ធនាគារ AIIB ក្នុងខែ ឧសភា ឆ្នាំ២០១៦៕

ប្រភព៖ Xinhua ប្រែសម្រួល៖ អឹុម ម៉េងស៊ាង