សំណុំរឿងស្ត្រីខ្មែរពរពោះជំនួស៖ តុលាការសម្រេចឃុំខ្លួនជនជាតិចិន និងមេការ ៥នាក់

2018-06-25 10:30:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សំណុំរឿងស្រ្តីខ្មែរពរពោះជំនួស៣៣នាក់ និងជួញដូរមនុស្សឆ្លងដែន ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនមនុស្សចំនួន០៥នាក់ ក្នុងនោះមានបុរសជនជាតិចិនម្នាក់ និងនារីខ្មែរចំនួន ០៤នាក់ កាលពីរសៀលថ្ងៃទី២៥ ខែមិថុនា ឆ្នាំ២០១៨ ដើម្បីរង់ចាំការស៊ើបអង្កេតជាបន្តទៀត។

ជនសង្ស័យទាំង៥នាក់មានដូចជា៖ ១.ឈ្មោះ Tiu Qiang ភេទប្រុស ជនជាតិចិន អាយុ ៤៩ឆ្នាំ ជាមេការ។ ២. ឈ្មោះ ស្វាយ ស៊ីណុច ភេទស្រី អាយុ ៣៤ឆ្នាំ ជាមេការ។ ៣. ឈ្មោះ នឿន ស្រីឡាង ភេទស្រី អាយុ ២៧ឆ្នាំ ជាមេការ។ ៤. ឈ្មោះ លឹម សុភាព ភេទស្រី អាយុ ១៩ឆ្នាំ ជាអ្នកបកប្រែ និង៥. ឈ្មោះ ថៃ ភាព ភេទស្រី អាយុ ៤៣ឆ្នាំ ជាមេការ។ មនុស្សទាំង០៥នាក់នេះ ជាប់សង្ស័យក្នុងការប្រព្រឹត្តបទល្មើសលក់ដូរមនុស្សសម្រាប់នាំឆ្លងដែន។

នារីខ្មែរ ដែលត្រូវតុលាការសម្រេចឃុំខ្លួន ក្នុងសំណុំរឿងស្រ្តីខ្មែរពរពោះជំនួស៣៣នាក់ នៅថ្ងៃទី២៥ ខែមិថុនា ឆ្នាំ២០១៨

តាមរបាយការណ៍បានឱ្យដឹងថា ជនសង្ស័យទាំង ៥នាក់ ត្រូវបានសមត្ថកិច្ចឃាត់ខ្លួនកាលពីថ្ងៃទី២២ ខែមិថុនា ឆ្នាំ២០១៨ ចំណុចផ្ទះវីឡាលេខ២A ផ្លូវ៣៤៨ និងផ្ទះវិឡាលេខ៩A ផ្លូវ៣៤៨ ស្ថិតនៅក្នុងបុរី វិមានភ្នំពេញ តាមបណ្ដោយផ្លូវលេខ៥ ក្នុងសង្កាត់ឫស្សីកែវ ខណ្ឌឫស្សីកែវ។ ចំពោះការចុះបង្ក្រាបនៅផ្ទះលេខ២A គឺឃាត់ខ្លួនមនុស្សបានចំនួន ២៥នាក់ ប្រុស ២នាក់ និងបានរឹបអូសរថយន្ត ១គ្រឿងម៉ាកស្តារិច និងម៉ូតូហុងដា Today ១គ្រឿង។ ចំណែកផ្ទះលេខ៩A គឺសមត្ថកិច្ច ឃាត់ខ្លួនបានមនុស្សចំនួន ១៨នាក់ រួមទាំងក្មេង ២នាក់ និងរថយន្ត ១គ្រឿងម៉ាក Lexus 470 ព្រមទាំងដកហូតឯកសារមួយចំនួន រួមមាន លិខិតឆ្លងដែន ឯកសារពាក់ព័ន្ធ និងឱសថការពារទារកមួយចំនួនធំ។

តាមចម្លើយរបស់នារីពរពោះជំនួសទាំង៣៣នាក់ ឱ្យដឹងថា ក្នុងកូន១ដែលពួកគាត់ពរពោះជំនួសនេះ ទទួលបានប្រាក់កំរៃចំនួន ១ម៉ឺនដុល្លារ គិតចាប់ពីខែដំបូង ឱ្យចំនួន៥០០ដុល្លារ ខែបន្ទាប់ ៣០០ដុល្លារ រហូតដល់កើត ទើបទទួលបានចំនួន ៦ពាន់ដុល្លារបន្ថែមទៀត។ ចំពោះការថែទាំគភ៌ ការប្រសូត្រ គឺជាបន្ទុករបស់ក្រុមហ៊ុន។

លក្ខណៈពិសេសនៃការពរពោះជំនួសក្នុងករណីនេះ គឺពេលជិតដល់ត្រូវឆ្លងទន្លេ ប្រសូត្រ គឺក្រុមហ៊ុនបញ្ជូនស្ត្រីពរពោះទៅប្រទេសចិន សម្រាលកូនរួចទើបបញ្ជូនមកស្រុកខ្មែរវិញ ហើយប្រគល់លុយបង្គ្រប់ ១ម៉ឺនដុល្លារ ៕

អត្ថបទ៖ សោភា