សម្ដេច ហ៊ុន សែន ច្រានចោលព័ត៌មានពីការវិនិយោគរបស់ចិនទៅលើបឹងយក្សឡោម

2018-07-03 03:13:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី៣ ខែកក្កដា ឆ្នាំ២០១៨ នេះ សម្ដេច ហ៊ុន សែន នាយករដ្ឋមន្ត្រីកម្ពុជា បានបង្ហោះសារបដិសេធរឿងដែលថា បឹងយក្សឡោមនឹងត្រូវបានដាក់ទៅឲ្យក្រុមហ៊ុនចិនវិនិយោគក្នុងរយៈពេល៧៥ឆ្នាំ។

ការច្រានចោលនេះ ធ្វើឡើងក្រោយពីសម្ដេចនាយករដ្ឋមន្ត្រីបានអានព័ត៌មានមួយដែលចុះផ្សាយដោយ "រស្មីកម្ពុជា" អំពីសំណើគម្រោងវិនិយោគរបស់ក្រុមហ៊ុនចិនឈ្មោះ ដាសេងហ្វ័រឈូន (ខេមបូឌា) អ៊ែសេតមេនិចមិន ខមភេនី។ រស្មីកម្ពុជា បានឲ្យដឹងថា ក្រុមហ៊ុនចិនមួយនេះ មានគម្រោងវិនិយោគនៅតំបន់រមណីយដ្ឋានបឹងយក្សឡោម ដែលមានផ្ទៃដីទំហំ ២៨០ហិកតា និងផ្ទៃទឹកទំហំ ៥០,២៤ហិកតា ស្ថិតនៅភូមិឡាប៉ូ សង្កាត់យក្សឡោម ក្រុងបានលុង ខេត្តរតនគីរី។ គម្រោងនេះ នឹងត្រូវចំណាយប្រាក់វិនិយោគចំនួន ៧លានដុល្លារ។

ប្រភពពីសារព័ត៌មានដដែល បានបញ្ជាក់ទៀតថា ក្រោយពីសិក្សាលើចំណុចទាំង១៤នៃគម្រោងវិនិយោគនេះរួចថាមិនបានផ្ដល់ផលប៉ះពាល់អ្វីឲ្យធំដុំ លោក Li Shuchun ដែលជាប្រធានក្រុមហ៊ុន ដាសេងហ្វ័រឈូន (ខេមបូឌា) អ៊ែសេតមេនិចមិន ខមភេនី ក៏បានដាក់សំណើទៅកាន់ក្រសួងមហាផ្ទៃ កាលពីថ្ងៃទី៧ ខែកក្កដា ឆ្នាំ២០១៧ ដើម្បីពិនិត្យ និងវាយតម្លៃ។ លុះដល់ថ្ងៃទី១០ ខែមេសា ឆ្នាំ២០១៨ លោក សក់ សេដ្ឋា រដ្ឋលេខាធិការក្រសួងមហាផ្ទៃ ក៏បានឯកភាពទៅលើគម្រោងស្នើសុំរបស់ក្រុមហ៊ុនចិននេះ។ យ៉ាងណាមិញ លោក ញឹម ផែន អភិបាលរងខេត្តរតនគីរី បានឲ្យដឹងកាលពីរសៀលថ្ងៃទី២ ខែកក្កដា ឆ្នាំ២០១៨ ថា គម្រោងនេះមិនទាន់ត្រូវបានដាក់បញ្ជូនទៅកាន់ក្រុមប្រឹក្សាអភិវឌ្ឍន៍កម្ពុជា (CDC) នៅឡើយទេ ហើយថែមទាំងនៅខ្វះនីតិវិធីច្រើន ដែលត្រូវបំពេញ មុននឹងអាចដំណើរការជាផ្លូវការក្នុងពេលឆាប់ៗខាងមុខ។

បន្ទាប់ពីមើលឃើញការចុះផ្សាយយ៉ាងដូច្នេះ សម្ដេច ហ៊ុន សែន ក៏បានបញ្ចេញប្រតិកម្មភ្លាមៗ ដោយបានលើកឡើងថា សម្ដេចសុំទាត់ចោលទាំងស្រុងនូវការវិនិយោគឯកជនណាមួយមកលើបឹងយក្សឡោម បើទោះជាក្រុមហ៊ុននោះមកពីប្រទេសណាក៏ដោយ៕

អត្ថបទ៖ ឈាង.