រដ្ឋមន្ត្រីការបរទេសអាមេរិក នឹងជួបចរចាផ្ទាល់ជាមួយមេដឹកនាំកូរ៉េខាងជើង

2018-07-03 04:27:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Mike Pompeo នឹងធ្វើដំណើរទៅកាន់ប្រទេសកូរ៉េខាងជើង ដើម្បីពិភាក្សាជាមួយលោក គីម ជុងអ៊ុន អំពីរឿងកម្ទេចកម្មវិធីអាវុធនុយក្លេអ៊ែរ។ បើយោងតាមការប្រកាសរបស់សេតវិមានអាមេរិក បានឲ្យដឹងកាលពីម្សិលមិញនេះថា ដំណើររបស់រដ្ឋមន្ត្រីក្រសួងការបរទេសអាមេរិករូបនេះនៅក្នុងក្រុងព្យុងយ៉ាង នឹងមានរយៈពេល៣ថ្ងៃ ដោយរាប់ចាប់ពីថ្ងៃព្រហស្បតិ៍ទី៥ រហូតដល់ថ្ងៃសៅរ៍ទី៧ ខែកក្កដា ឆ្នាំ២០១៨។

ជំនួបរវាងលោក Mike និងលោក គីម នឹងផ្ដោតសំខាន់ទៅលើវិធានការ និងកាលបរិច្ឆេទលុបចោលនូវកម្មវិធីអាវុធនុយក្លេអ៊ែរ និងមីស៊ីលបាលីស្ទិកនៅក្នុងប្រទេសកូរ៉េខាងជើង។ បន្ទាប់ពីជំនួបនេះ លោករដ្ឋមន្ត្រី នឹងបន្តដំណើរទស្សនកិច្ចផ្លូវរដ្ឋទៅកាន់ទីក្រុងតូក្យូ នៅថ្ងៃសៅរ៍ និងថ្ងៃអាទិត្យចុងសប្ដាហ៍។ នៅទីនោះ លោកនឹងជួបពិភាក្សាការងារជាមួយនឹងមន្ត្រីរបស់ជប៉ុន និងកូរ៉េខាងត្បូង ជុំវិញការប្ដេជ្ញាចិត្តរបស់ប្រទេសដែលជាប់ពាក់ព័ន្ធនឹងរឿងកម្ទេចនុយក្លេអ៊ែរនៅកូរ៉េខាងជើង។

សូមរំលឹកថា កាលពីពេលថ្មីៗកន្លងទៅ លោក John Bolton ទីប្រឹក្សាសន្តិសុខជាតិអាមេរិក បានបញ្ជាក់ថា គម្រោងលុបបំបាត់កម្មវិធីមីស៊ីលបាលីស្ទិក និងអាវុធនុយក្លេអ៊ែររបស់កូរ៉េខាងជើង នឹងអាចដំណើរការនៅក្នុងរយៈពេលត្រឹម១ឆ្នាំប៉ុណ្ណោះ ប្រសិនបើកូរ៉េខាងជើងយល់ព្រមសហការដោយស្ម័គ្រចិត្ត។ លោក Bolton បានប្រាប់បន្តថា ក្រោយដំណើរការកម្ទេចនេះ អាមេរិកនឹងដកទណ្ឌកម្មចេញពីកូរ៉េខាងជើងឲ្យបានលឿន ហើយប្រទេសមួយនេះនឹងទទួលបានជំនួយពីកូរ៉េខាងត្បូង និងជប៉ុន។

ចំណែកឯលោក ដូណាល់ ត្រាំ ប្រធានាធិបតីអាមេរិក ក៏បានអះអាងដែរថា កូរ៉េខាងជើងពិតជាមានជំហរហ្មត់ចត់ក្នុងការកម្ទេចកម្មវិធីអាវុធនុយក្លេអ៊ែររបស់ខ្លួន ក្រោយពីជំនួបកំពូលនៅសិង្ហបុរី កាលពាក់កណ្ដាលខែមិថុនា។ លោក ត្រាំ បានប្រកាសថា អាមេរិកមិនបានផ្ដល់ជាសម្បទានណាមួយទេទៅឲ្យកូរ៉េខាងជើង ដើម្បីជំរុញទឹកចិត្តក្នុងការកម្ទេចនុយក្លេអ៊ែររបស់ខ្លួន។ ប៉ុន្តែលោកថា នៅពេលខាងមុខអាមេរិកនឹងមានរបស់ល្អៗសម្រាប់ផ្ដល់ឲ្យរដ្ឋាភិបាលក្រុងព្យុងយ៉ាង ដែលជាការបើកផ្លូវនាំប្រទេសមួយនេះឆ្ពោះទៅកាន់អនាគតត្រចះត្រចង់៕

ប្រភព៖ Asia.Nikkei ប្រែសម្រួល៖ ឈាង.