ចិន បញ្ចេញវីដេអូបង្ហាញពីកាំភ្លើងឡាស៊ែរ បញ្ចប់ការសង្ស័យ

2018-07-05 06:40:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន ZKZM ដែលមានទីស្នាក់ការនៅប្រទេសចិន បានបញ្ចេញវីដេអូដែលបង្ហាញពីសមត្ថភាពពិតប្រាកដរបស់កាំភ្លើងកាំរស្មីឡាស៊ែរ ដែលគេហៅថា "អាកា៤៧ឡាស៊ែរ" បន្ទាប់ពីមជ្ឈដ្ឋានជាច្រើនបញ្ចេញទស្សនៈ និងមានការសង្ស័យថាជាការបំផ្លើសការពិត ចំពោះការប្រកាសរបស់ខ្លួន។ វីដេអូនោះ បង្ហាញពីបុរសម្នាក់ ប្រើប្រាស់កាំភ្លើងនោះបាញ់ឆេះក្រដាស ដែលនៅចម្ងាយឆ្ងាយ។

បុរសម្នាក់ បាញ់សាកល្បងកំាំភ្លើងឡាស៊ែរចិន (រូបភាពកាត់ពីវីដេអូ)

កាលពីថ្ងៃអាទិត្យ សប្ដាហ៍មុន វេបសាយ South China Morning Post បានចុះផ្សាយពីកាំភ្លើងឡាស៊ែរនោះ ដែលក្រុមហ៊ុនអះអាងថា អាចប្រើប្រាស់ដើម្បីបង្ក្រាបក្រុមបាតុករ ដោយការបាញ់ឲ្យឆេះសក់ ឬ បដា របស់ពួកគេ ដែលមានចម្ងាយក្នុងរង្វង់ជិត ១គីឡូម៉ែត្រ។

រូបគំរូ កាំភ្លើងឡាស៊ែរ របស់ក្រុមហ៊ុន ZKZM (រូបភាព៖ Twitter/LAMERMA1318)

ក្រុមហ៊ុន ZKZM បានឲ្យដឹងថា បើសិនជាបាញ់ចំមនុស្ស កាំរស្មីឡាស៊ែរ របស់កាំភ្លើងដ៏ទំនើបនេះ អាចបង្កការឈឺចាប់ខ្លាំង ប៉ុន្តែមិនបង្កឲ្យស្លាប់នោះទេ។ វាមានទម្ងន់ ៣គីឡូក្រាម ហើយកាំរស្មីឡាស៊ែរអាចឆ្លងកាត់កញ្ចក់និងវត្ថុផ្សេងៗដែលមានសភាពថ្លា។ គេអាចបំពាក់កាំភ្លើងនេះនៅលើរថយន្ត ទូក និងយន្តហោះបាន។

ប្រភពដដែលបន្តថា កាំភ្លើងដ៏ទំនើបនេះ សាកថ្មម្ដង អាចបាញ់បានជាង ១០០០ដង ហើយបាញ់ម្ដង មានរយៈពេលលើសពី ២វិនាទី។

សូមចុចត្រង់ ទីនេះ ដើម្បីទស្សនាវីដេអូបង្ហាញពីកាំភ្លើងឡាស៊ែររបស់ចិន៕

អត្ថបទទាក់ទង ចិន បង្កើតកាំភ្លើងឡាស៊ែរ បានហើយ

ប្រភព៖ South China Morning Post ប្រែសម្រួល៖ លាភ.