ខេម ថាមិនទាន់ដល់វេនខ្លួន ត្រូវបញ្ចេញសមត្ថភាពលើការសម្តែងភាពយន្តនៅឡើយ

2018-07-05 07:27:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខណៈតារាចម្រៀងជាច្រើនផ្សេងទៀតត្រូវបានផលិតកម្មថោន ជ្រើសរើសឲ្យសម្ដែងភាពយន្ត ក៏ដូចជារឿងកំប្លែងខ្លីៗជាបន្តបន្ទាប់ លោក ខេម ដែលជាតារាចម្រៀងម្នាក់ក្នុងផលិតកម្មនេះ បានលើកឡើងថា ការសម្ដែងភាពយន្តបន្ថែមលើអាជីពជាតារាចម្រៀង គឺមិនទាន់ដល់វេនលោកឡើយ។

ខេម បញ្ជាក់ថា ចំពោះការសម្តែងភាពយន្ត មិនមែនលោកមិនចង់នោះទេ ប៉ុន្តែគម្រោងនៃការថតរបស់ផលិតកម្មថោន គឺមិនទាន់មានសាច់រឿងណា ដែលត្រូវនឹងតួរបស់លោកនៅឡើយ។

ខេម កំពុងច្រៀងនៅក្នុងកម្មវិធីប្រគុំតន្រ្តី១ នាពេលកន្លងមក

លោកបានបន្តឲ្យដឹងថា ភាពយន្តដែលលោកចង់សម្ដែងនោះ ជាភាពយន្តបែបមនោសញ្ចេតនាបែបស្រុកស្រែ ហើយចង់សម្ដែងជាតួឯកតែម្ដង។ ចំពោះការថតរឿងខ្លីៗ រឿងកំប្លែង ដូចជាកម្មវិធី"ដូចឆ្នឹងផង"ដែលមានតារាចម្រៀងជាច្រើនក្នុងផលិតកម្មចេញមុខថតជាបន្តបន្ទាប់ ខេម បានបដិសេធមិនសម្ដែងឡើយ ដោយលោកលើកហេតុផលថា ខ្លួនជាតារាចម្រៀង មិនមែនជាតួកំប្លែងនោះទេ។

ជាមួយនឹងការថតភាពយន្តផងដែរ ទោះបីជាបច្ចុប្បន្នខ្លួនជាតារាចម្រៀងមានកុងត្រាក្ដី ខេម និយាយថា ផលិតកម្មថោនមិនបានបិទសិទ្ធិខ្លួនឡើយ គឺលោកនៅតែអាចថតឲ្យផលិតកម្មផ្សេងបាន ប្រសិនបើមានផលិតកម្មមួយណាចង់បានលោកទៅសម្ដែងនោះ ប៉ុន្តែមុនការព្រមព្រៀងគ្នា ក៏ត្រូវតែមានការចរចាពីការថតនោះ តើអាចមានផលប៉ះពាល់ដល់ផលិតកម្ម ឬប្រជាប្រិយភាពកម្រិតណាជាមុខសិន។

ទោះបីជាជាមិនទាន់ដល់វេនចេញថតរឿងក្ដី តាមការលើកឡើងរបស់ខេម ផលិតកម្មមិនបានទុកលោកចោលឡើយ។ តារាចម្រៀងរូបនេះបង្ហើបឲ្យដឹងថា នៅរដូវភ្លៀងនេះផលិតកម្មបានត្រៀមបទចម្រៀងឲ្យលោកជាច្រើនបទផងដែរ ហើយគ្រោងបញ្ចេញឆាប់នេះតែម្ដង៕

ប្រភព៖ Sabay News អត្ថបទៈ ស៊ុនហួត