អវកាសយានិកចិនទី១ថា សករាជនៃស្ថានីយអវកាសចិន បានចាប់ផ្ដើមហើយ

2018-07-09 07:39:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកនាយឧត្តមសេនីយ Yang Liwei នាយកផ្នែកវិស្វកម្មអវកាសចិន និងជាអវកាសយានិកចិនទី១ បានថ្លែងថា ចិនកំពុងបង្កើតផ្នែកស្នួលនៃស្ថានីយអវកាសរបស់ខ្លួន ដើម្បីបង្ហោះនៅក្នុងឆ្នាំ២០២០។

លោកនាយឧត្តមសេនីយ Yang Liwei ជាអវកាសយានិកចិនទី១ (រូបថត៖ XINHUA)

លោក Yang បានប្រាប់កាលពីពេលថ្មីៗនេះថា ផ្នែកសាកល្បងចំនួនពីរ នឹងត្រូវបញ្ជូនទៅទីអវកាសនៅក្នុងឆ្នាំ២០២១ និង២០២២ ហើយគេនឹងបញ្ជូនអវកាសយានិក និងយានអវកាសដើម្បីនាំសម្ភារៈទៅកាន់ស្ថានីយអវកាស នៅក្នុងឆ្នាំ២០២១ និង ២០២២ ផងដែរ។

អវកាសយានិកទី១របស់ចិនបន្តថា បន្ទាប់ពីការបង្កើតផ្នែកស្នួលរបស់ស្ថានីយអវកាសរួច គេនឹងបញ្ជូនតេលេស្កុបអុបទិកដ៏ធំមួយ ដើម្បីបង្ហោះជាមួយស្ថានីយអវកាស នៅលើគន្លងផែនដីតែមួយ។

អំឡុងការពង្រីកស្ថានីយអវកាសខាងលើ បេសកកម្មជាច្រើនទៀតនឹងត្រូវធ្វើឡើងរៀងរាល់ ៥ឆ្នាំម្ដង ដើម្បីបញ្ជូនមនុស្សទៅកាន់ស្ថានីយអវកាស ខុសពីជាង១ទសវត្សរ៍កន្លងទៅ ដែលចិនបានបញ្ជូនអវកាសយានិករៀងរាល់ ២ ឬ៣ឆ្នាំម្ដង។

រូបគំរូ ស្ថានីយអវកាសចិន (រូបថត៖ ALAMY)

សូមបញ្ជាក់ថា លោក Yang បានកើតនៅឆ្នាំ១៩៦៥ នៅតំបន់ Suizhong នៃក្រុង Huludao ភាគឦសានខេត្ត Liaoning ប្រទេសចិន។ លោកបានក្លាយជាអវកាសយានិកចិនទី១ ដែលបានទៅដល់ទីអវកាស ដោយយានអវកាស Shenzhou-5 កាលពីថ្ងៃទី១៥ ខែតុលា ឆ្នាំ២០០៣៕

ប្រភព៖ Xinhua ប្រែសម្រួល៖ លាភ.