យន្តហោះឯកជនរបស់ គីម ជុងអ៊ុន បានលួចហោះទៅរុស្ស៊ីដោយសម្ងាត់?

2018-07-10 01:53:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមរបាយការណ៍របស់ Flight Radar 24 បានឲ្យដឹងថា យន្តហោះឯកជន១គ្រឿងរបស់លោក គីម ជុងអ៊ុន មេដឹកនាំកូរ៉េខាងជើង ត្រូវប្រទះឃើញថាបានហោះចូលទីក្រុង Vladivostok ប្រទេសរុស្ស៊ី កាលពីព្រឹកថ្ងៃចន្ទទី៩ កក្កដា ម្សិលមិញ។

ប្រព័ន្ធរ៉ាដារបស់ Flight Radar 24 បានកត់សម្គាល់ថា យន្តហោះ១គ្រឿងនេះមានឈ្មោះថា Air Force One ឬហៅថា Chammae-1 ដែលជាប្រភេទយន្តហោះចម្បាំងសូវៀតម៉ាក Iiyushin II-62M។ យន្តហោះ Chammae-1 បានហោះចូលប្រទេសរុស្ស៊ី និងចាកចេញវិញ នៅថ្ងៃដដែល ដោយប្រើប្រាស់រយៈពេលត្រឹមតែ ៣ម៉ោងប៉ុណ្ណោះ។

បើតាមការចុះផ្សាយរបស់សារព័ត៌មានកូរ៉េខាងត្បូង Yonhap បានឲ្យដឹងថា យន្តហោះ១គ្រឿងនេះ អាចផ្ទុកមន្ត្រីរបស់កូរ៉េខាងជើង ដើម្បីទៅពិភាក្សាការងារអំពីរឿងដែលរុស្ស៊ីអញ្ជើញលោក គីម ជុងអ៊ុន ចូលរួមក្នុង "វេទិកាសេដ្ឋកិច្ចខាងកើត" នាខែកញ្ញាខាងមុខ។

នៅអត្ថបទព័ត៌មានរបស់ខ្លួន Yonhap បានសរសេរថា៖ "មិនមានការធានាអះអាងណាមួយទេដែលថា មេដឹកនាំ គីម ជុងអ៊ុន នៅលើយន្តហោះ១គ្រឿងនោះ នៅពេលដែល Chammae-1 (យន្តហោះឯកជនរបស់លោក) បានចេញដំណើរ។ មន្ត្រីកូរ៉េខាងជើង បានធ្វើដំណើរទៅកាន់ទីនោះ (ទីក្រុង Vladivostok) ដើម្បីត្រៀមលក្ខណៈនៃការចូលរួមរបស់លោក គីម នៅក្នុងវេទិកាសេដ្ឋកិច្ចខាងកើត ដែលនឹងប្រារព្ធឡើងនៅ Vladivostok នៅខែកញ្ញានេះ"។

ពាក់ព័ន្ធនឹងរឿងហោះហើរដោយសម្ងាត់នេះ មន្ត្រីរបស់រុស្ស៊ី បានបញ្ជាក់ថា ពួកគេមិនបានដឹងអំពីរឿងនេះឡើយ។ "ខ្ញុំមិនអាចផ្ដល់ជាយោបល់អ្វីទេចំពោះបញ្ហានេះ។ យើងគ្មានព័ត៌មានអ្វីត្រូវប្រាប់ទេ" នេះជាការលើកឡើងរបស់លោក Dmitry Peskov អ្នកនាំពាក្យរដ្ឋាភិបាលក្រុង Kremlin។

សូមបញ្ជាក់ថា កាលពីពេលថ្មីៗកន្លងទៅ លោក វ៉្លាឌឺមៀ ពូទីន ប្រធានាធិបតីរុស្ស៊ី បានអញ្ជើញលោក គីម ឲ្យចូលរួមក្នុងវេទិកាសេដ្ឋកិច្ចខាងកើត ស្របពេលវត្តមានរបស់លោក Shinzo Abe នាយករដ្ឋមន្ត្រីជប៉ុន និងលោក Moon Jae-in ប្រធានាធិបតីកូរ៉េខាងត្បូង ក៏នឹងបង្ហាញខ្លួននៅទីនោះផងដែរ។ យ៉ាងណាមិញ លោក គីម ជុងអ៊ុន មិនទាន់បានឆ្លើយតបនឹងអញ្ជើញនេះទេ តែកាលពីខែមិថុនាមុន មេដឹកនាំកូរ៉េខាងជើងធ្លាប់បានបញ្ជូនប្រតិភូរបស់ខ្លួនទៅកាន់ទីក្រុង Vladivostok ម្ដងរួចមកហើយ ក្នុងគោលបំណងរឹតបន្តឹងចំណងមិត្តភាពជាមួយនឹងរដ្ឋាភិបាលក្រុងម៉ូស្ដូបន្ថែមទៀត៕

ប្រភព៖ UPI | Sputnik News ប្រែសម្រួល៖ ឈាង.