៦ខែដើមឆ្នាំ ការនាំចេញអង្ករទៅក្រៅប្រទេស ធ្លាក់ចុះជិត៦%

2018-07-12 02:26:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

របាយការណ៍ស្ថានភាពនៃការនាំចេញអង្ករកម្ពុជា បង្ហាញថា ការនាំអង្ករចេញទៅលក់នៅក្រៅប្រទេសក្នុងរយៈពេល ៦ខែដើមឆ្នាំ២០១៨ មានការធ្លាក់ចុះជិត ៦ភាគរយ បើប្រៀបធៀបនឹងរយៈពេល ៦ខែដូចគ្នា កាលពីឆ្នាំមុន។ បញ្ហានេះ គឺដោយសារតែតម្រូវការក្រៅស្រុកបានថយចុះ។

របាយការណ៍ពីអគ្គនាយកដ្ឋានកសិកម្ម ចេញផ្សាយកាលពីថ្ងៃទី១០ ខែកក្កដា បង្ហាញថា ការនាំអង្ករចេញរយៈពេល ៦ខែដើមឆ្នាំ២០១៨ មានចំនួនជាង ២៧ម៉ឺនតោន (២៧១៥៣៧) តិចជាងទិន្នន័យនាំចេញរយៈពេលដូចគ្នា កាលពីឆ្នាំ២០១៧ ចំនួនជាង ១៧០០០តោន។

បុរសម្នាក់កំពុងលីបាវអង្ករ ដាក់លើរថយន្ត

របាយការណ៍ដដែលឲ្យដឹងដែរថា ក្នុងចំណោមប្រទេសទាំង ៥៦ដែលទទួលទិញអង្ករពីកម្ពុជា ក្នុងនោះគេសង្កេតឃើញថា ប្រទេសចិនបានកាត់បន្ថយការទិញអង្ករពីកម្ពុជាយ៉ាងច្រើន គឺកាត់បន្ថយពីជាង ១ម៉ឺនតោន (១១១៥៦) ក្នុងខែឧសភា មកនៅត្រឹមជាង ៥០០តោន (៥២៥) នៅក្នុងខែមិថុនា។ ដោយឡែកបណ្តាប្រទេសផ្សេងទៀត រួមមានសហភាពអឺរ៉ុប និងប្រទេសជាសមាជិកអាស៊ាននៅបន្តទិញអង្ករពីកម្ពុជាក្នុងបរិមាណប្រហាក់ប្រហែល។

កាលពីឆ្នាំ២០១៧ ប្រទេសកម្ពុជាបាននាំចេញអង្ករទៅក្រៅប្រទេសសរុបប្រមាណជាង ៦៣ម៉ឺនតោន (៦៣៥៦៧៩)។ ចំនួននេះមានការកើនឡើងជាង ៩ម៉ឺនតោន (៩៣៥៣៥) បើប្រៀបធៀបនឹងរយៈពេលដូចគ្នា ក្នុងឆ្នាំ២០១៦៕

ប្រភព៖ Radio Free Asia ប្រែសម្រួល៖ លាភ.