សម្តេច ហ៊ុន សែន ឧបត្ថម្ភ ១ម៉ឺនដុល្លារ ដល់លោក ចាន់ សម័យ ដើម្បីសាងសង់ផ្ទះ

2018-07-12 06:14:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានឧបត្ថម្ភទឹកប្រាក់ចំនួន ១ម៉ឺនដុល្លារ ដល់លោក ចាន់ សម័យ អតីតតារាចម្រៀងដ៏ល្បីល្បាញមួយរូបនៅក្នុងប្រទេសកម្ពុជា ដើម្បីសាងសង់ផ្ទះថ្មីមួយខ្នងរស់នៅឲ្យបានសមរម្យ។ ការឧបត្ថម្ភនេះ ធ្វើឡើងតាមរយៈលោក ហេង ឡុង ដែលជាស្វាមី អ្នកនាង ចន ចាន់លក្ខិណា ប្រធានសមាគមសិល្បៈកម្ពុជា នៅថ្ងៃទី១២ ខែកក្កដានេះ។

បើតាមសេចក្តីរាយការណ៍របស់ភ្នាក់ងារសារព័ត៌មាន Sabay ដែលកំពុងមានវត្តមាននៅផ្ទះជួលរបស់លោក ចាន់ សម័យ ឲ្យដឹងថា ដីដែលលោក ចាន់ សម័យ គ្រោងនឹងសាងសង់ផ្ទះនោះ គឺស្ថិតនៅខាងលិចកប់ស្រូវ ចូលតាមច្រកទ្វាវត្តឃ្នាបចម្ងាយប្រមាណ ៣គីឡូម៉ែត្រ ទំហំ ៥គុណ ២០។ តែមិនទាន់ដឹងច្បាស់ថាអតីតអ្នកចម្រៀងរូបនេះ ជ្រើសរើសយកទីតាំងណាមួយដើម្បីសាងសង់ផ្ទះនោះទេ ព្រោះនៅពេលនេះ ឧញ៉ា ឡេង ណាវ៉ាត្រា ជួយដីមួយឡូត៍នៅផ្លូវជាតិលេខ៣។

រូបលោក ចាន់ សម័យ ស្ទូចត្រី ដែលកំពុងមានការចែករំលែកយ៉ាងច្រើន នៅលើបណ្តាញសង្គមហ្វេសប៊ុក

សូមបញ្ជាក់ថា ការឧបត្ថម្ភនេះ ធ្វើឡើងក្រោយពេលដែលលោក ចាន់ សម័យ ត្រូវបានបណ្តាញព័ត៌មានក្នុងស្រុកផ្សព្វផ្សាយថា លោកកំពុងរស់នៅក្នុងជីវភាពក្រីក្រ ដោយការរកស៊ីស្ទូចត្រីលក់ចិញ្ចឹមជីវិត ព្រោះតែទីផ្សារសិល្បៈរកមិនបាន ហើយយូរៗបានឡើងច្រៀងតាមប៉ុស្តិ៍ និងច្រៀងតាមរោងការម្ដងៗប៉ុណ្ណោះ ឯសុខភាពក៏មិនអំណោយផលទៀត (មានជំងឺរបេងឆ្អឹង)។

បច្ចុប្បន្នលោក ចាន់ សម័យ កំពុងតែស្នាក់នៅផ្ទះជួល១កន្លែង ក្នុងសង្កាត់ព្រែកលៀប ដោយជួលក្នុង១ខែតម្លៃ៨០ដុល្លារ ហើយត្រូវទទួលរាប់រងចិញ្ចឹមគ្រួសារ និងក្មួយម្នាក់។ លោកមានកូនរហូតដល់ទៅ ៥នាក់ គឺប្រុសពីរនាក់ ស្រី៣នាក់ (កូនភ្លោះប្រុស២ ស្រីកណ្ដាល១ និងភ្លោះស្រី២ក្រោយ៕

អត្ថបទ៖ សំភី