ជ័យជម្នះរបស់បារាំងនៅ World Cup ជាជោគជ័យសម្រាប់ជនអន្តោប្រវេសន៍គ្រប់ទិសទី

2018-07-16 03:51:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការយកឈ្នះក្រូអាតដោយលទ្ធផល ៤-២ របស់បារាំងដើម្បីក្លាយជាជើងឯក World Cup 2018 គឺជាជោគជ័យមួយសម្រាប់ទ្វីបអាហ្វ្រិក និងជនអន្តោប្រវេសន៍នៅគ្រប់ទីកន្លែង។ នេះបើតាមអ្នកនិពន្ធ Peniel Joseph ប្រធានអង្គការមូលនិធិសេរីភាព Barbara Jordan ផ្នែកសីលធម៌ និងតម្លៃនយោបាយ និងជានាយកនៃមជ្ឈមណ្ឌលសម្រាប់ការសិក្សាពូជសាសន៍ និងលទ្ធិប្រជាធិបតេយ្យនៅសាលាកិច្ចការសាធារណៈLBJ នៅសាកលវិទ្យាល័យរដ្ឋតិចសាស សហរដ្ឋអាមេរិក។

បារាំង លើកពាន World Cup 2018 (រូបថត៖ Reuters)

អ្នកនិពន្ធសៀវភៅ ដែលមានចំណងជើងថា "Stokely: A Life” ថ្មីៗនេះបានប្រាប់ទៅកាន់សារព័ត៌មាន [CNN](https://edition.cnn.com/2018/07/15/opinions/france-world-cup-win-immigration-diversity-joseph/index.html?utm_medium=social&utm_source=fbCNN&utm_content=2018-07-16T00%3A00%3A18&utm_term=link) នូវមូលហេតុចំនួន ២ ដែលធ្វើឲ្យគាត់លើកឡើងយ៉ាងដូច្នេះ៖

១- ជនអន្តោប្រវេសន៍ដែលបានចូលទៅរស់នៅប្រទេសបារាំងជាង ២ទសវត្សរ៍កន្លងទៅ បានរួមចំណែកយ៉ាងធំធេង ក្នុងការជួយឲ្យប្រទេសនេះក្លាយជាជើងឯក World Cup ។ ជាក់ស្ដែង កីឡាករទាំង២៣នាក់របស់បារាំង យ៉ាងហោចណាស់មាន ១៥នាក់ មានប្រភពពីអាហ្វ្រិក រួមទាំងតារាឆ្នើមវ័យក្មេង Kylian Mbappe ដែលមានម្ដាយសញ្ជាតិអាល់ហ្សេរី និងឪពុកសញ្ជាតិកាមេរ៉ូន។

២- ភាពចម្រុះជាតិសាសន៍នៅក្នុងក្រុមបារាំង បានបង្ហាញនូវមេរៀនដ៏ល្អ ទាក់ទងនឹងជនអន្តោប្រវេសន៍ សកលភាវូបនីយកម្ម និងភាពជាពលរដ្ឋ។ បញ្ហារើសអើងពណ៌សម្បុរ លើជនជាតិស្បែកខ្មៅ ដែលមានប្រភពពីអាហ្វ្រិក នៅតែកើតមានក្នុងសង្គមបារាំង។ ដូច្នេះ បារាំងគួរតែបង្ហាញការស្រឡាញ់របស់ខ្លួន សម្រាប់ជនអន្តោប្រវេសន៍ដែលបានរត់គេចពីគ្រោះធម្មជាតិ និងសង្គ្រាម មកពីអាហ្វ្រិក និងតំបន់ផ្សេងៗដែលកំពុងស្វែងរកសិទ្ធិជ្រកកោន។

Kylian Mbappe ថើបពាន World Cup (រូបថត៖ AP)

លោក Peniel Joseph បានបញ្ជាក់ទៀតថា ក្រុមជើងឯកបារាំង បានបង្ហាញពិភពលោកឲ្យបានឃើញនូវការបង្កើតទំនាក់ទំនងរវាងប្រទេស រដ្ឋ និងប្រទេសជិតខាង ដោយមិនប្រកាន់និន្នាការនយោបាយ និងវប្បធម៌ ឡើយ។ ជោគជ័យរបស់ក្រុមបារាំង ជារបស់អ្នកគាំទ្រទូទាំងពិភពលោក និងជាកម្លាំងប្រឆាំងនឹងការសាងសង់ជញ្ជាំងនិងមជ្ឈមណ្ឌលឃុំឃាំងជនភៀសខ្លួនផងដែរ៕

អត្ថបទទាក់ទង លោក ពូទីន ផ្ដល់កាដូមួយដល់អ្នកគាំទ្របរទេស

អត្ថបទ៖ លាភ.