ទឹកទន្លេមេគង្គលើនៅកម្ពុជា នឹងចាប់ផ្តើមហក់ឡើង ក្នុងរយៈពេលពីរបីថ្ងៃខាងមុខនេះ

2018-07-16 07:16:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងកំឡុងពេល ពីរបីថ្ងៃខាងមុខនេះ ទឹកទន្លេមេគង្គលើក្នុងប្រទេសកម្ពុជា នឹងហក់ឡើង ហើយចាប់ផ្តើមហូរចូលតាមព្រែក និងតំបន់ទំនាបនានា ដែលស្ថិតនៅអមសងខាងទន្លេមេគង្គលើ។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី១៦ ខែកក្កដា ឆ្នាំ២០១៨នេះ។

ក្រសួងបញ្ជាក់ថា ការហក់ឡើងនៃទឹកទន្លេមេគង្គនេះ គឺដោយសារតែឥទ្ធិពលរបស់ប្រព័ន្ធសម្ពាធទាបដែលបានកើតឡើង និងកំពុងស្ថិតលើតំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសថៃ និងឡាវ។ ឥទ្ធិពលនេះ បានធ្វើឱ្យមានភ្លៀងធ្លាក់ជាបន្តបន្ទាប់ និងបង្កឱ្យទឹកទន្លេមេគង្គហក់ឡើង។

ទន្លេមេគង្គក្នុងខេត្តក្រចេះ ថតពីលើអាកាស (រូបថត៖ វិបសាយ WWF)

ជាមួយគ្នានេះ ក្រសួងក៏បានអំពាវនាវឱ្យប្រជាពលរដ្ឋក្នុងខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម ដែលកំពុងប្រកបរបរកសិកម្ម នៅអមសងខាងផ្លូវទឹកទន្លេមេគង្គលើ និងតំបន់ទំនាបនានា រួសរាន់ប្រមូលកសិផល ឱ្យបានទាន់ពេលវេលា។

បើយោងតាមការព្យាករកម្ពស់ទឹកជំនន់របស់ក្រសួងធនធានទឹក បានឱ្យដឹងថា ចាប់ពីថ្ងៃទី១៧ ដល់ ១៩ ខែកក្កដា ឆ្នាំ២០១៨ ទឹកទន្លេមេគង្គនៅក្នុងខេត្តស្ទឹងត្រែង ក្រចេះ និងកំពង់ចាម មានកម្ពស់ទឹកកើនឡើងបើប្រៀបធៀបនឹងថ្ងៃទី១៦ កក្កដា។ ក្នុងនោះ៖

ស្ថានីយទន្លេមេគង្គ-ស្ទឹងត្រែង៖ មានកម្ពស់ទឹក ៨,៣៥ម៉ែត្រ (១៧កក្កដា), ៨,៧២ម៉ែត្រ (១៨កក្កដា) និង ៨,៩ម៉ែត្រ (១៩កក្កដា)។
ស្ថានីយទន្លេមេគង្គ-ក្រចេះ៖ មានកម្ពស់ទឹក ១៧,៦២ម៉ែត្រ (១៧កក្កដា), ១៨,១០ម៉ែត្រ (១៨កក្កដា) និង១៨,៤៧ម៉ែត្រ (១៩កក្កដា)។
ស្ថានីយទន្លេមេគង្គ-កំពង់ចាម៖ មានកម្ពស់ទឹក ១១,១៨ម៉ែត្រ (១៧កក្កដា), ១១,៦៣ម៉ែត្រ (១៨កក្កដា) និង១២,០៤ម៉ែត្រ (១៩កក្កដា)៕

អត្ថបទ៖ សំភី