ជំនួបកំពូល ត្រាំ-ពូទីន៖ តើកំពូលមេដឹកនាំទាំងពីរបានជជែកគ្នាពីបញ្ហាអ្វីខ្លះ?

2018-07-17 02:26:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ដូណាល់ ត្រាំ ប្រធានាធិបតីអាមេរិក និងលោក វ្លាឌីមៀ ពូទីន ប្រធានាធិបតីរុស្ស៊ី កាលពីថ្ងៃទី១៦ ខែកក្កដា ២០១៨ ម្សិលមិញ បានជួបចរចាក្នុងជំនួបកំពូលនៅក្រុង Helsinki ប្រទេសហ្វាងឡង់។ បញ្ហាសំខាន់ៗដែលមេដឹកនាំទាំងពីរបានលើកយកមកជជែកគ្នារួមមាន ការលូកលាន់ការបោះឆ្នោត ការទូត និងការប្រកួតបាល់ទាត់ពិភពលោក។

លោក ត្រាំ ចាប់ដៃជាមួយលោក ពូទីន អំឡុងសន្និសីទសារព័ត៌មាននៅក្រុង Helsinki កាលពីថ្ងៃទី១៦ ខែកក្កដា ២០១៨ (រូបភាព៖ Reuters)

**ការភ្ជាប់នយោបាយការទូត ដោយផ្ដល់ផលប្រយោជន៍ដល់ប្រទេសរបស់ពួកគេ**

លោក ដូណាល់ ត្រាំ និងលោក វ្លាឌីមៀ ពូទីន បានឯកភាពគ្នាថា ទំនាក់ទំនង អាមេរិក-រុស្ស៊ី មានភាពរឹងមាំ និងនៅបន្ដស្ថិតនៅចំណុចទាបបំផុតនៅឡើយ។ ដើម្បីដោះស្រាយបញ្ហានេះ ការបន្ស៊ីនយោបាយការទូតមួយចំនួន គឺជារឿងចាំបាច់។

លោក ពូទីន ថា គ្មានមូលហេតុច្បាស់លាស់ទេ សម្រាប់ទំនាក់ទំនងរវាងអាមេរិក និងរុស្ស៊ី ដែលត្រូវអាក្រក់ដូច្នេះ ព្រោះសង្រ្គាមត្រជាក់ និងការប្រឈមមុខគ្នាដោយមនោគមវិជ្ជាបានកន្លងផុតទៅហើយ។ ប្រទេសទាំងពីរកំពុងប្រឈមបញ្ហាបច្ចុប្បន្ន ដូចជាអរិភាពក្នុងតំបន់ ការផ្ទុះឡើងនូវភេរវកម្ម ឧក្រិដ្ឋកម្មដែលមានការរៀបចំ ការគំរាមកំហែងផ្នែកបរិស្ថាន និងសេដ្ឋកិច្ច។

លោក ពូទីន បន្ថែមថា "យើងបានផ្ដល់ឲ្យ [អាមេរិក] ពិចារណាកសាងទស្សនវិទ្យានៃទំនាក់ទំនងទ្វេភាគីសម្រាប់រយៈពេលវែង"។

លោក ពូទីន គាំទ្រលោក ត្រាំ អំឡុងពេលបោះឆ្នោត ប៉ុន្ដែមិនបានលូកលាន់នោះទេ

លោក វ្លាឌីមៀ ពូទីន ជាថ្មីម្ដងទៀត បានបដិសេធចំពោះការចោទប្រកាន់ការលូកលាន់ការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦ ហើយលោកបានបន្ថែមថា ក្រុងមូស្គូត្រៀមចូលរួមការស៊ើបអង្កេតរួមគ្នា ប្រសិនបើភស្ដុតាងពិតត្រូវបានបង្ហាញ។

លោក ពូទីន និយាយចំៗថា "បាទ ខ្ញុំចង់ឲ្យគាត់ [ដូណាល់ ត្រាំ] ឈ្នះ ព្រោះគាត់បានលើកឡើងពីការចាំបាច់ដើម្បីធ្វើឲ្យធម្មតាឡើងវិញនូវទំនាក់ទំនងរវាងអាមេរិក និងរុស្ស៊ី"។

ការប្រកួតបាល់ទាត់ World Cup

លោក ត្រាំ បានសរសើរការរៀបចំរបស់រុស្ស៊ីសម្រាប់ព្រឹត្តិការណ៍នេះ ដោយចាត់ទុកថា ពិតជាព្រឹត្តិការណ៍ដ៏អស្ចារ្យ។ ចំណែកលោក ពូទីន បានឲ្យបាល់ World Cup មួយ ទៅលោក ត្រាំ និងបានលើកឡើងពីការប្រកួតបាល់ទាត់ World Cup 2026 ដែលអាមេរិក ម៉ិកស៊ីកូ និងកាណាដា នឹងធ្វើជាម្ចាស់ផ្ទះ៕