កំពត នឹងបង្កើតផ្សារលក់ផលិតផលក្នុងស្រុក ដើម្បីបញ្ចៀសការក្លែងបន្លំ

2018-07-17 03:34:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អភិបាលខេត្តកំពត លោក ជាវ តាយ បានថ្លែងកាលពីចុងសប្ដាហ៍កន្លងទៅថា នាពេលខាងមុខ អាជ្ញាធរខេត្តនឹងបង្កើតឲ្យមានផ្សារសម្រាប់ដាក់លក់ផលិតផលក្នុងស្រុកដាច់ដោយឡែកមួយនៅកំពត ក្នុងគោលបំណងរក្សាកេរ្តិ៍ឈ្មោះ និងគុណភាព ក៏ដូចជាបញ្ចៀសការក្លែងបន្លំនានា។

លោក ជាវ តាយ បានលើកឡើងថា ផ្លែទុរេនរបស់ខេត្តកំពត ត្រូវគេទទួលស្គាល់ជាយូរណាស់មកហើយថាមានរសជាតិឆ្ងាញ់គ្មានគូប្រដូចបាន។ ប៉ុន្តែនាប៉ុន្មានឆ្នាំចុងក្រោយនេះ ភ្ញៀវភាគច្រើន ពិសេសអ្នកមកពីភ្នំពេញ តែងត្អូញត្អែរថា ពួកគាត់មកលេងនៅកំពតហើយទិញលែងបានទុរេនឆ្ងាញ់ដូចមុនទៀត បើទោះជាទិញផ្ទាល់នៅខេត្តនេះក្ដី ដោយរសជាតិដូចទៅទុរេននៅភ្នំពេញដែលគេនាំមកពីថៃអ៊ីចឹងដែរ។ លោកអភិបាលខេត្តកំពត បានប្រាប់បន្តថា ព្រោះការត្អូញត្អែរនេះ លោកបានចុះទៅជួបអ្នកលក់មួយចំនួន ហើយពួកគេបានឆ្លើយសារភាពថា ទុរេនទាំងនោះត្រូវបានយកមកពីថៃ និងថា បើមិនប្រើឈ្មោះជាទុរេនកំពត នោះពួកគេលក់មិនដាច់ឡើយ ហើយអត់ប្រាក់ចំណេញទៀតផង។

ផ្អែកលើមូលហេតុនេះ ទើបអាជ្ញាធរខេត្តកំពតគ្រោងនឹងបង្កើតផ្សារលក់ផលិតផលផ្ទាល់ខ្លួនមួយ។ យ៉ាងណាមិញ ក្នុងករណីមានទំនិញស្រដៀងគ្នានេះនាំមកពីក្រៅ ហើយត្រូវការលក់នៅក្នុងផ្សារនោះដែរ អាជ្ញាធរនឹងមិនហាមឃាត់ទេ។ ប៉ុន្តែការលក់ត្រូវដាក់ឈ្មោះបង្ហាញឲ្យច្បាស់លាស់ ដើម្បីសម្ដែងភាពស្មោះត្រង់ចំពោះអតិថិជន និងរក្សាកិត្តិយស ព្រមទាំងគុណភាពនៃផលិតផលរបស់ខេត្តកំពត ដើម្បីជៀសវាងការយល់ច្រឡំតទៅទៀត។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានបង្ហាញការគាំទ្រទាំងស្រុងចំពោះគម្រោងបង្កើតផ្សារនេះ។ លោកថា សព្វថ្ងៃ នៅតាមរមណីយដ្ឋាននានា សមត្ថកិច្ចក្នុងដែនជំនាញទប់ស្កាត់បានល្អ តែចំណុចអវិជ្ជមានខ្លះនៅតែកើតឡើងនៅក្រៅតំបន់កម្សាន្តពាក់ព័ន្ធនឹងការក្លែងបន្លំឈ្មោះផលិតផល ដែលជះឥទ្ធិពលអាក្រក់មួយផ្នែកធំសម្រាប់វិស័យទេសចរណ៍នៅខេត្តកំពត៕

ប្រភព៖ រស្មីកម្ពុជា ប្រែសម្រួល៖ ឈាង.