ការិយាល័យបោះឆ្នោតមួយ នឹងត្រូវដាក់សន្តិសុខការពារចំនួន ៣នាក់

2018-07-18 01:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅតាមការិយាល័យបោះឆ្នោត និងរាប់សន្លឹកឆ្នោតនីមួយៗ គណៈកម្មាធិការជាតិរៀបចំការបោះឆ្នោត (គ.ជ.ប) នឹងត្រូវដាក់កម្លាំងសន្តិសុខការពារចំនួន៣នាក់ ប៉ុន្តែកងកម្លាំងនោះ អាចកាន់អាវុធវែងបានតែ១ដើមគត់ ដែលមានគ្រាប់យ៉ាងច្រើន៣០គ្រាប់ ដើម្បីការពារសន្តិសុខសណ្ដាប់ធ្នាប់ ក្នុងថ្ងៃបោះឆ្នោត។ នេះបើតាមការបញ្ជាក់របស់លោក ហែល សារ៉ាត់ សមាជិក គ.ជ.ប ក្នុងសន្និសីទកាសែត ធ្វើតេស្ដទឹកខ្មៅជ្រលក់ម្រាមដៃ កាលពីព្រឹកថ្ងៃទី១៧ កក្កដាម្សិលមិញ ។

លោក ហ៊ែល សារ៉ាត់ បន្ដថា ភ្នាក់ងារសន្តិសុខ៣នាក់ ដែលការពារតាមការិយាល័យបោះឆ្នោត និងរាប់សន្លឹកឆ្នោតនីមួយៗ ត្រូវស្លៀកពាក់ឯកសណ្ឋានកងកម្លាំងឱ្យបានត្រឹមត្រូវ និងត្រូវពាក់ប្រឡង់ដៃសន្តិសុខរបស់គ.ជ.ប រហូតដល់ចប់ភារកិច្ច។

លោក ហ៊ែល សារ៉ាត់ ក្នុងកិច្ចប្រជុំ១របស់ គ.ជ.ប នាពេលកន្លងមក

លោកបន្ថែមថា ភ្នាក់ងារសន្តិសុខបោះឆ្នោតមានភារកិច្ចការពារសន្តិសុខ សណ្ដាប់ធ្នាប់ កុំឱ្យមានការរំខាន ការអុកឡុក ការបំភិតបំភ័យ និងការគំរាមកំហែង ឬហេតុការណ៍ផ្សេងៗដែលអាចកើតឡើងបាន ហើយអាចហាត់ឃាត់ជនដែលយកអាវុធជាតិផ្ទុះ និងវត្ថុដែលអាចបង្កគ្រោះថ្នាក់ផ្សេងៗចូលក្នុងបរិវេណខាងក្រៅ និងបរិវេណខាងក្នុងការិយាល័យបោះឆ្នោត និងរាប់សន្លឹកឆ្នោត។

មន្រ្តី គ.ជ.ប រូបនេះ ក៏បានលើកឡើងដែរថា ភ្នាក់ងារសន្តិសុខម្នាក់ ត្រូវចល័តការពារបរិវេណខាងក្នុងនៃការិយាល័យបោះឆ្នោត និងរាប់សន្លឹកឆ្នោត ដែលមានចម្ងាយយ៉ាងតិច១៥ម៉ែត្រ ពីការិយាល័យនោះ ដោយមិនចាំបាច់ប្រើប្រាស់អាវុធ។ រីឯភ្នាក់ងារសន្តិសុខចំនួន២នាក់ទៀត ត្រូវចល័តជុំវិញបរិវេណការិយាល័យបោះឆ្នោត និងរាប់សន្លឹកឆ្នោត ក្នុងចម្ងាយពី១០០ម៉ែត្រ ឬស្ថិតក្នុងស្ថានភាពជាក់ស្ដែង នៃបរិវេណខាងក្រៅនៃការិយាល័យបោះឆ្នោត និងរាប់សន្លឹកឆ្នោតនីមួយៗ អាចប្រើប្រាស់អាវុធវែង១ដើម ដែលមានគ្រាប់យ៉ាងច្រើន៣០គ្រាប់។

ក្នុងករណីការិយាល័យបោះឆ្នោត និងរាប់សន្លឹកឆ្នោតច្រើនប្រមូលផ្តុំក្នុងបរិវេណ ឬ អគារតែមួយ សមាជិក គ.ជ.ប បញ្ជាក់ថា ចំនួនភ្នាក់ងារសន្តិសុខបោះឆ្នោតសម្រាប់ការិយាល័យបោះឆ្នោត និងរាប់សន្លឹកឆ្នោត ត្រូវសមស្របទៅនឹងស្ថានភាពជាក់ស្ដែង ប៉ុន្តែមិនត្រូវលើសពី៣នាក់ក្នុងមួយការិយាល័យឡើយ៕

ប្រភព៖ Radio Free Asia ប្រែសម្រួល៖ សំភី