កត្តាចម្បងៗ ដែលនឹងធ្វើឱ្យសេដ្ឋកិច្ចកម្ពុជា មានកំណើនប្រកបដោយចីរភាព

2018-07-18 02:52:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០១៨ របស់ធនាគារជាតិនៃកម្ពុជា កាលពីចុងសប្តាហ៍កន្លងទៅ លោក ជា ចាន់តូ ទេសាភិបាលធនាគារជាតិនៃកម្ពុជា បានថ្លែងថា នៅឆមាសទី២ ឆ្នាំ២០១៨ ខាងមុខនេះ សេដ្ឋកិច្ចកម្ពុជា ត្រូវបានរំពឹងថា នឹងបន្តមានកំណើនប្រកបដោយចីរភាព ដែលគាំទ្រដោយកត្តាចម្បងៗរួមមាន៖

ការរំពឹងទុកលើការបន្តងើបឡើងនៃសេដ្ឋកិច្ចពិភពលោក
ភាពរឹងមាំនៃជំនឿទុកចិត្តលើសេដ្ឋកិច្ចកម្ពុជា និងស្ថិរភាពនយោបាយ នឹងបន្តទាក់ទាញវិនិយោគផ្ទាល់ពីបរទេស និងលំហូរមូលធន
ការបន្តរក្សាបាននូវស្ថិរភាពម៉ាក្រូសេដ្ឋកិច្ចល្អប្រសើរ ដោយកម្រិតទាប និងអាចគ្រប់គ្រងបាននៃអតិផរណា និងស្ថិរភាពអត្រាប្តូរប្រាក់
ការកើនឡើងចំណាយសាធារណៈ ដែលគាំទ្រដោយកំណើនថវិកាជាតិ នឹងរួមចំណែកបង្កើនតម្រូវការ និងការវិនិយោគ
ភាពអំណោយផលពីកត្តាអាកាសធាតុ នឹងគាំទ្រកំណើនផលិតកម្មក្នុងវិស័យកសិកម្ម
ការពង្រីកសក្តានុពលក្នុងវិស័យកម្មន្តសាលមិនមែនកាត់ដេរ នឹងបង្កើនផលិតកម្មក្នុងស្រុកនិងការនាំចេញបន្ថែមទៀត
ការបន្តរក្សាបានស្ថិរភាពហិរញ្ញវត្ថុ និងការរីកចម្រើនវិស័យធនាគារ នឹងបន្តជំរុញអន្តរ-ការិយកម្ម និងបរិយាប័ន្នហិរញ្ញវត្ថុ ដែលគាំទ្រដល់ការរីកចម្រើននៃសកម្មភាពសេដ្ឋកិច្ចទាំងមូល។

ធនាគារជាតិនៃកម្ពុជា ស្ថិតនៅតាមបណ្តោយមហាវិថីព្រះនរោត្តម

សេចក្តីប្រកាសព័ត៌មានរបស់ធនាគារជាតិ បានបញ្ជាក់ឱ្យដឹងដែរថា នៅក្នុងឆមាសទី១ឆ្នាំ២០១៨នេះសេដ្ឋកិច្ចកម្ពុជា បានបន្តរីកចម្រើនប្រកបដោយភាពជឿជាក់ ដោយរក្សាបានស្ថិរភាពម៉ាក្រូសេដ្ឋកិច្ចល្អប្រសើរ។ អត្រាអតិផរណាមានកម្រិតមធ្យម២,៦% ហើយអត្រាប្តូរប្រាក់មានស្ថិរភាពក្នុងរង្វង់៤០៣៧រៀលក្នុងមួយដុល្លារអាមេរិក។ ស្ថិរភាពនេះបានបន្តពង្រឹងទំនុកចិត្តរបស់ភ្នាក់ងារសេដ្ឋកិច្ចក្នុងការបង្កើនការវិនិយោគ ការប្រើប្រាស់ និងសកម្មភាពពាណិជ្ជកម្មនានាស្របតាមការកើនឡើងនៃចំណូល GDP (ផលិតផលក្នុងស្រុកសរុប) ក្នុងមនុស្សម្នាក់ៗ ត្រូវបានរំពឹងថានឹងកើនឡើងដល់ ១៥៦៣ដុល្លារអាមេរិកក្នុងឆ្នាំ២០១៨នេះ។

យោងតាមរបាយការណ៍របស់ធនាគារពិភពលោក ចេញផ្សាយកាលពីខែឧសភា ឆ្នាំ២០១៨ បានព្យាករថា សេដ្ឋកិច្ចកម្ពុជា នឹងមានកំណើន ៦,៩% ក្នុងឆ្នាំ២០១៨នេះ។ កំណើននេះ គឺបានមកពីការស្ទុះឡើងក្នុងវិស័យនាំចេញវាយនភណ្ឌ និងសម្លៀកបំពាក់ អមដោយការងើបឡើងរបស់វិស័យទេសចរណ៍ និងកសិកម្មផងដែរ៕

អត្ថបទ៖ សំភី