ក្រុម Hacker ព្យាយាមលួចគណនីរបស់ គ.ជ.ប យកទៅប្រើប្រាស់

2018-07-18 23:28:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា មានក្រុម Hacker ព្យាយាមលួចគណនីរបស់ គ.ជ.ប ដើម្បីបង្កើតទិន្នន័យ និងព័ត៌មាន ក្លែងក្លាយស្របពេលដែល គ.ជ.ប បានផ្តល់ភាពងាយស្រួលដល់អ្នកបោះឆ្នោត និងគណបក្ស នយោបាយ ស្វែងរកព័ត៌មាននានានៅលើប្រព័ន្ធអ៊ិនធឺណិត និងទូរសព្ទវៃឆ្លាត។ នេះបើតាមទីភ្នាក់ងារសារព័ត៌មានកម្ពុជា ចុះផ្សាយកាលពីថ្ងៃទី១៨ ខែកក្កដា។

ការឲ្យដឹងនេះ ត្រូវធ្វើឡើងក្នុងកិច្ចប្រជុំជាមួយភាគីពាក់ព័ន្ធស្តីពីការប្រព្រឹត្តទៅនៃការឃោសនា បោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ និងការការពារសន្តិសុខនៅតាមការិយាល័យបោះឆ្នោត និងរាប់សន្លឹកឆ្នោត កាលពីថ្ងៃទី១៨ ខែកក្កដា ឆ្នាំ២០១៨។

លោក ហង្ស ពុទ្ធា

លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ថា ក្រុមជនល្មើសបានប៉ុនប៉ងលួចព័ត៌មានពី គ.ជ.ប នេះ តាមរយៈការចូលទៅប្រើប្រាស់ គណនីហ្វេសប៊ុក អ៊ីម៉េល គេហទំព័រ គ.ជ.ប និងគណនីហ្វេសប៊ុកផ្ទាល់របស់សមាជិក គ.ជ.ប ដើម្បីបង្កើតព័ត៌មានមិនពិតដែលធ្វើឲ្យអ្នកបោះឆ្នោត និងគណបក្សនយោបាយមានការយល់ច្រឡំ។

លោក ទេព នីថា

ចំណែកលោក ទេព នីថា អគ្គលេខាធិការ គ.ជ.ប បានលើកឡើងថា គ.ជ.ប កំពុងសហការជាមួយក្រសួងមហាផ្ទៃក្នុងការទប់ស្កាត់សកម្មភាពទាំងឡាយណា ដែលរំខាន និងរាំងស្ទះដល់ដំណើរការបោះឆ្នោតដែលនឹងប្រព្រឹត្តទៅនៅថ្ងៃទី២៩ ខែកក្កដាខាងមុខនេះ។

រីឯលោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ បានឲ្យដឹងផងដែរថា ក្រុមជំនាញផ្នែកប្រឆាំងបទល្មើសបច្ចេកវិទ្យា បាននិងកំពុងយកចិត្តទុកដាក់ទៅលើបញ្ហាសុវត្ថិភាពបច្ចេកវិទ្យាចំពោះការបោះឆ្នោតជាតិ តាមរយៈកិច្ចសហការ ជាមួយ គ.ជ.ប ក្នុងការប្រមូលភស្តុតាង ការស៊ើបអង្កេតបទល្មើស និងការធ្វើកោសល្យវិច័យកុំព្យូទ័រ ក៏ដូចជាការអនុវត្តជាមួយឧបករណ៍ជំនួយនានា ដើម្បីឈានទៅកំណត់អត្តសញ្ញាណជនសង្ស័យតាមរយៈលេខទូរសព្ទ ប្រព័ន្ធទំនាក់ទំនងសង្គម និងឧបករណ៍សម្រាប់ស្វែងរកព័ត៌មានលម្អិតចាំបាច់មួយចំនួនទៀត។

ជាមួយគ្នានេះដែរ បើតាមការបញ្ជាក់បន្ថែមពី គ.ជ.ប បានឲ្យដឹងទៀតថា ទិន្នន័យរបស់ គ.ជ.ប មិនទាន់ត្រូវបានជនល្មើសចូលលួច និងបែកធ្លាយយកទៅប្រើប្រាស់ក្នុងបំណងទុច្ចរិតនៅឡើយទេ ដោយសារតែ គ.ជ.ប បានរៀបចំការពារច្បាប់ដើមបានយ៉ាងល្អ ក្រោមជំនួយបច្ចេកទេសពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា JICA ដែលមានអ្នកប្រចាំការ២៤ម៉ោង។ ទន្ទឹមនេះ រាល់ទិន្នន័យ និងព័ត៌មានដែល គ.ជ.ប បង្ហោះលើគេហទំព័រ គឺគ្រាន់តែជាសំណៅឯកសារ ដែលថតចម្លងចេញពីច្បាប់ដើមតែប៉ុណ្ណោះ៕

អត្ថបទ៖ លាភ.