គ.ជ.ប ត្រៀមប្ដូរការិយាល័យបោះឆ្នោត និងបង្កើនចំនួនឧទ្ធម្ភាគចក្រ បើមានគ្រោះទឹកជំនន់

2018-07-19 01:29:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដើម្បីដោះស្រាយបញ្ហាគ្រោះទឹកជំនន់ដែលកំពុងកើតឡើងនេះ គណៈកម្មាធិការជាតិរៀបចំការបោះឆ្នោត (គ.ជ.ប) បានគិតគូរពីការត្រៀមប្ដូរការិយាល័យបោះឆ្នោត និងបង្កើនចំនួនឧទ្ធម្ភាគចក្រ សម្រាប់ប្រើប្រាស់ក្នុងការដឹកជញ្ជូនសម្ភារៈបោះឆ្នោត។ នេះបើតាមការបញ្ជាក់របស់លោក សោម សូរីដា អគ្គលេខាធិការរង គ.ជ.ប កាលពីថ្ងៃទី១៨កក្កដាម្សិលមិញនេះ។

លោក សោម សូរីដា ក្នុងកិច្ចប្រជុំ១របស់ គ.ជ.ប នាពេលកន្លងមក

គម្រោងនេះ ធ្វើឡើងក្នុងពេលដែលមានការិយាល័យបោះឆ្នោតមួយចំនួន ត្រូវបានទឹកភ្លៀង ជន់លិច។ ជំនន់ទឹកភ្លៀង ក៏បានធ្វើឲ្យគណបក្សនយោបាយមួយចំនួន ត្រូវកាត់បន្ថយសកម្មភាពឃោសនាផងដែរ។

លោក សោម សូរីដា បានថ្លែងថា គ.ជ.ប បានបញ្ជូនសេចក្ដីណែនាំ ទៅកាន់គណៈកម្មការរៀបចំការបោះឆ្នោតគ្រប់ឃុំសង្កាត់ទាំងអស់ ឲ្យតាមដានជាប្រចាំ ចំពោះស្ថានភាពជំនន់ទឹកភ្លៀងនាប៉ុន្មានថ្ងៃនេះ ហើយត្រូវរាយការណ៍ទៅ គ.ជ.ប ជាបន្ទាន់ ប្រសិនបើពិនិត្យឃើញថា ការិយាល័យបោះឆ្នោតណាអាចបន្ត ឬប្រឈមនឹងការលិចលង់រហូតដល់ថ្ងៃបោះឆ្នោត នាថ្ងៃទី២៩ ខែកក្កដា ឆ្នាំ២០១៨។

ជាមួយគ្នានោះ លោក សោម សូរីដា ក៏បញ្ជាក់ថា គ.ជ.ប ក៏ត្រៀមឧទ្ធម្ភាគចក្រ ចំនួន ២គ្រឿងរួចរាល់ហើយ ដើម្បីដឹកជញ្ជូនសម្ភារៈបម្រើឲ្យការបោះឆ្នោត បើសិនជាមានគ្រោះទឹកជំនន់ ហើយ គ.ជ.ប នឹងស្នើទៅកាន់រាជរដ្ឋាភិបាល ដើម្បីសុំឧទ្ធម្ភាគចក្របន្ថែមទៀត សម្រាប់ធ្វើអន្តរាគមន៍ភ្លាមៗប្រសិនបើចាំបាច់៕

អត្ថបទ៖ លីហៀង