ជប៉ុន គាំទ្រថៃឲ្យក្លាយជាសមាជិកថ្មីនៃកិច្ចព្រមព្រៀងពាណិជ្ជកម្មឆ្លងទ្វីប

2018-07-19 02:37:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសជប៉ុន បានយល់ព្រមគាំទ្រឲ្យថៃក្លាយជាសមាជិកថ្មីរបស់កិច្ចព្រមព្រៀងដៃគូពេញលេញ និងជឿនលឿនឆ្លងមហាសមុទ្រប៉ាស៊ីហ្វិក ឬហៅកាត់ថា CPTPP។ នេះតាមការចុះផ្សាយរបស់ Bangkok Post នៅថ្ងៃទី ១៩ កក្កដា ឆ្នាំ២០១៨នេះ។

ឧបនាយករដ្ឋមន្ត្រីថៃ Somkid Jatusripitak បានដឹកនាំក្រុមមន្ត្រីជាន់ខ្ពស់ ជួបពិភាក្សាជាមួយសមភាគីជប៉ុន ដែលដឹកនាំដោយអគ្គលេខាធិការគណៈរដ្ឋមន្ត្រីជប៉ុន លោក Yoshihide Suga នៅក្នុងទីក្រុងតូក្យូ ប្រទេសជប៉ុន នៅថ្ងៃ១៩ កក្កដា ឆ្នាំ២០១៨នេះ។

លោក Somkid(ស្តាំ) ជួបដៃជាមួយ លោក Yoshihide អំឡុងជំនួបនៅក្នុងទីក្រុងតូក្យូ ប្រទេសជប៉ុន នៅថ្ងៃ១៩ កក្កដា ឆ្នាំ២០១៨នេះ។ រូបថត៖ រដ្ឋាភិបាលជប៉ុន

លោក Somkid បាននិយាយថា ប្រទេសជប៉ុន បានយល់ព្រមទទួលសំណើរបស់រដ្ឋាភិបាលថៃ និងគាំទ្រប្រទេសថៃឲ្យក្លាយជាសមាជិក CPTPP ថ្មី។ លោកបន្តទៀតថា រដ្ឋាភិបាលថៃ គ្រោងនឹងដាក់ពាក្យសុំធ្វើជាសមាជិកនៃកិច្ចព្រមព្រៀងពាណិជ្ជកម្មដ៏ធំនេះ នាចុងឆ្នាំ២០១៨នេះ។

ការក្លាយជាសមាជិករបស់ CPTPP នឹងជួយជំរុញការប្រកួតប្រជែងរបស់សហគ្រិនថៃឲ្យកាន់តែខ្លាំងបន្ថែមទៀត។ នេះជាការលើកឡើងរបស់លោក Somkid។

គួរបញ្ជាក់ថា កាលពីថ្ងៃទី ០៨ មីនា ឆ្នាំ២០១៨ ប្រទេសចំនួន១១ រួមមានដូចជា អូស្ត្រាលី កាណាដា ស៊ីលី ជប៉ុន ម៉ាឡេស៊ី ម៉ិកស៊ីកូ នូវែលហ្សេឡង់ ប៉េរូ និងប្រទេសអាស៊ានចំនួន ៣ គឺ ប្រ៊ុយណេ វៀតណាម និងសិង្ហបុរី បានសម្រេចចុះហត្ថលេខាលើកិច្ចព្រមព្រៀងពាណិជ្ជកម្មថ្មីមួយ ដែលត្រូវបានស្គាល់ថាជាកិច្ចព្រមព្រៀងដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក (TPP) ថ្មី នៅទីក្រុង Santiago ប្រទេសស៊ីលី។

ប្រទេសទាំង ១១ រូមគ្នានេះ មានទំហំសេដ្ឋកិច្ចប្រមាណជាង ១៣,៥ ភាគរយ នៃសេដ្ឋកិច្ចសកលលោក និងមានទំហំទីផ្សារប្រជាជនចំនួន ៥០០ លាននាក់ ពោលគឺច្រើនជាងទំហំទីផ្សារប្រជាជនសហភាពអឺរ៉ុប។

អត្ថបទទាក់ទង៖