រកឃើញនាវាចម្បាំងរុស្ស៊ីដែលផ្ទុកមាសតម្លៃ១៩៦ពាន់លានដុល្លារនៅបាតសមុទ្រកូរ៉េខាងត្បូង
- 2018-07-19 02:17:46
- ចំនួនមតិ 0 | ចំនួនចែករំលែក 0
រកឃើញនាវាចម្បាំងរុស្ស៊ីដែលផ្ទុកមាសតម្លៃ១៩៦ពាន់លានដុល្លារនៅបាតសមុទ្រកូរ៉េខាងត្បូង
ចន្លោះមិនឃើញ
ក្រុមអ្នករុករករួមគ្នាមកពីកូរ៉េខាងត្បូង អង់គ្លេស និងកាណាដា បានរកឃើញនាវាចម្បាំងរុស្ស៊ី១គ្រឿង ដែលលិចកាលពី១១៣ឆ្នាំមុន ហើយត្រូវគេជឿជាក់ថា នៅលើនោះមានផ្ទុកនូវដុំមាសជាច្រើនតោនតម្លៃប្រមាណ ១៩៦ពាន់លានដុល្លារឯណោះ។
នាវាចម្បាំងនោះ មានឈ្មោះថា Dmitrii Donskoi។ វាត្រូវបានគេប្រទះឃើញកាលពីថ្ងៃអាទិត្យទី១៥ ខែកក្កដា ឆ្នាំ២០១៨ កន្លងទៅ នៅជម្រៅទឹក ៤២៦ម៉ែត្រ និងចម្ងាយប្រមាណ ២គីឡូម៉ែត្រពីកោះ Ulleungdo ប្រទេសកូរ៉េខាងត្បូង។ ការរុករកនេះ ត្រូវបានក្រុមអ្នកជំនាញប្រើប្រាស់យានជ្រមុជទឹកចំនួន ២គ្រឿង ដោយបានផ្ដិតយករូបភាពមួយចំនួននៃនាវា Dmitrii Donskoi (រូបខាងក្រោម)។
ក្នុងរូប គេសង្កេតឃើញ នាវាចម្បាំងទម្ងន់៥៨០០តោនរបស់រុស្ស៊ីទទួលរងការខូចខាតច្រើនកន្លែង ដែលបណ្ដាលមកពីការវាយប្រហារពីនាវាចម្បាំងរបស់ជប៉ុន នៅអំឡុងខែឧសភា ឆ្នាំ១៩០៥ ។
បើតាមសេចក្ដីរាយការណ៍ នាវិកប្រមាណជា ៦០នាក់ក្នុងចំណោម ៥៩១នាក់នៅលើនាវា Dmitrii Donskoi បានស្លាប់ នៅពេលជប៉ុនធ្វើការវាយប្រហារ។ ចំណែក ១២០នាក់ផ្សេងទៀតបានរងរបួស។ មេបញ្ជាការ Ivan Lebedev បានបញ្ជាឲ្យនាវិកដែលរួចផុតពីការស្លាប់ទាំងអស់ចូលចតនាវារបស់ពួកគេនៅលើកោះ Ulleungdo។ លុះព្រឹកបន្ទាប់គឺនៅថ្ងៃទី២៩ ខែឧសភា ឆ្នាំ១៩០៥ នាវាចម្បាំងនោះក៏បានអណ្ដែតទៅឆ្ងាយបាត់ ហើយក្រុមនាវិកទាំងឡាយត្រូវជប៉ុនចាប់ដាក់គុក។
នៅលើនាវា Dmitrii Donskoi បានផ្ទុកនូវមូលនិធិកងទ័ពជើងទឹក ដែលមានដុំ និងបន្ទះមាសចំនួន ៥៥០០កេស។ ក្រុមអ្នករុករក Shinil Group បានប៉ាន់ស្មានថា មាសទាំងនោះ បើគិតជាតម្លៃនាពេលបច្ចុប្បន្ន គឺប្រហែល ១៩៦ពាន់លានដុល្លារ។
Shinil Group បញ្ជាក់ថា ពួកគេគ្រោងនឹងស្រង់ខ្មោចនាវាចម្បាំងនេះឡើងគោកនៅខែតុលា ឬខែវិច្ឆិកាខាងមុខ។ ទ្រព្យសម្បត្តិពាក់កណ្ដាលដែលរកឃើញ នឹងត្រូវប្រគល់ឲ្យរដ្ឋាភិបាលរុស្ស៊ី។ ១០% ទៀតនឹងត្រូវយកទៅប្រើប្រាស់សម្រាប់ការវិនិយោគគម្រោងទេសចរណ៍នៅលើកោះ Ulleungdo ដោយក្នុងនោះនឹងមានការបង្កើតសារមន្ទីរមួយដើម្បីរំលឹកទៅដល់នាវា Dmitrii Donskoi។ រីឯចំណែកដែលនៅសេសសល់ នឹងត្រូវបរិច្ចាគទៅលើគម្រោងអភិវឌ្ឍន៍អាស៊ីភូមិភាគឦសាន ដូចជាគម្រោងរថភ្លើងតភ្ជាប់ពីរុស្ស៊ីទៅកាន់កូរ៉េខាងត្បូង កាត់តាមកូរ៉េខាងជើង ជាដើម៕