ខេត្តចំនួន៧ ដែលបានរងគ្រោះដោយសារជំនន់ទឹកភ្លៀង

2018-07-19 03:59:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរយៈពេលពីរបីថ្ងៃចុងក្រោយនេះ ជំនន់ទឹកភ្លៀង បានកើតឡើងក្នុងខេត្តចំនួន៧ រួមមាន កំពង់ស្ពឺ ព្រះសីហនុ កំពត កែប កោះកុង ប៉ៃលិន និងបាត់ដំបង។ នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយនៅថ្ងៃទី១៩ ខែកក្កដានេះ។

ទឹកជំនន់នៅខេត្តកោះកុង កាលពីថ្ងៃទី១៨កក្កដា ២០១៨។ រូបថត៖ FB ក្រសួងធនធានទឹក និងឧតុនិយម

របាយការណ៍នេះបញ្ជាក់ថា ជំនន់ទឹកភ្លៀងនេះ គឺបង្កឡើងដោយឥទ្ធិពលព្យុះទី៩ ឈ្មោះ សុន ទីញ កំពុងរំកិលទៅក្បែរដីគោក នៃក្រុងហាណូយ ប្រទេសវៀតណាម ស្របពេលដែលព្យុះទី១០ កំពុងវិវត្តកើតមានឡើង។

ការប៉ះពាល់ និងខូចខាត៖

ខេត្តកំពង់ស្ពឺ៖ ប្រជាពលរដ្ឋរងគ្រោះចំនួន ២៣០គ្រួសារ, ប៉ះពាល់ដំណាំស្រូវ ១១៥៧ហិកតា និងចម្ការស្វាយ ២៣២ហិកតា។
ខេត្តព្រះសីហនុ៖ ប្រជាពលរដ្ឋរងផលប៉ះពាល់ចំនួន ៥០០គ្រួសារ។
ខេត្តកំពត៖ ទឹកជំនន់នៅភូមិអណ្តូងជីម៉ឺន ឃុំកំពង់ក្រែង ស្រុកទឹកឈូ ឡើងដល់ ៨,២ម៉ែត្រ ដែលជាកម្រិតប្រកាសអាសន្ន គិតត្រឹមល្ងាចថ្ងៃទី១៨កក្កដា។
ខេត្តកែប៖ សភាពការណ៍អាចគ្រប់គ្រងបាន ហើយនឹងត្រូវតាមដានបន្តទៀត។
ខេត្តកោះកុង៖ ប៉ះពាល់ចំនួន ៥ឃុំ ក្នុងស្រុកចំនួន៤ ដោយប្រជាជនប្រមាណ ៥៥១គ្រួសារ ត្រូវបានជម្លៀសទៅកាន់ទីទួលសុវត្ថិភាព។
ខេត្តប៉ៃលិន៖ មានភ្លៀងធ្លាក់តិច ប៉ុន្តែនៅតាមស្ទឹង អូរ ព្រែក មានទឹកពេញទាំងអស់ ដោយសារទឹកភ្លៀង ហូរធ្លាក់ពីខេត្តត្រាត ប្រទេសថៃ។
ខេត្តបាត់ដំបង៖ ស្រូវកំពុងហាលផ្កា ខូចខាតទាំងស្រុង ៥០ហិកតា, ស្រូវប្រឈមការខូចខាតប្រមាណ ១០០៧ហិកតា និងផ្ទះលិចទឹក ១០៩ខ្នង។ នៅចំណុចស្ពានបឹងអូរជាង ស្រុកកំរៀង មានប្រេះដីនៅគល់ស្ពាន៕