ម៉ាឡេស៊ីចាប់ខ្លួនជនសង្ស័យ ៧នាក់ គំរាមធ្វើឃាតស្តេច និងនាយករដ្ឋមន្រ្តី

2018-07-19 07:06:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប៉ូលិសម៉ាឡេស៊ីបានចាប់ខ្លួនជនសង្ស័យភេរវកម្ម ៧នាក់ ដែលក្នុងនោះមានជនសង្ស័យម្នាក់បានគំរាមធ្វើឃាតស្ដេចម៉ាឡេស៊ី នាយករដ្ឋមន្រ្តី មហាធៀ មហាម៉ាត់ និងរដ្ឋមន្រ្តី។ នេះបើតាមការបញ្ជាក់របស់លោក Mohd Fuzi Harun អគ្គនាយកត្រួតពិនិត្យនៃប៉ូលិសជាតិម៉ាឡេស៊ី នៅថ្ងៃទី១៩ ខែកក្កដា ២០១៨នេះ។

ស្ដេចម៉ាឡេស៊ី Sultan Muhammad V

ក្នុងចំណោមជនសង្ស័យទាំង ៧នាក់ មាន ៤នាក់ជាជនជាតិម៉ាឡេស៊ី និង ៣នាក់ជាជនជាតិឥណ្ឌូណេស៊ី ត្រូវបានចាប់ខ្លួនជាបន្តបន្ទាប់ពីថ្ងៃទី១២ ដល់ ១៧ ខែកក្កដា ២០១៨ នៅរដ្ឋ Terengganu រដ្ឋ Selangor រដ្ឋ Perak និងរដ្ឋ Johor។

នាយករដ្ឋមន្រ្តីម៉ាឡេស៊ី លោក មហាធៀ មហាម៉ាត់

លោកអគ្គនាយកត្រួតពិនិត្យនៃប៉ូលិសជាតិម៉ាឡេស៊ីបានបញ្ជាក់ថា ក្នុងចំណោមអ្នកដែលត្រូវបានចាប់ខ្លួន មានជនសង្ស័យជាបុរសវ័យ ៣៤ឆ្នាំម្នាក់ ត្រូវបានចាប់ខ្លួននៅរដ្ឋ Johor កាលពីថ្ងៃទី១៧ ខែកក្កដា ២០១៨ ដើមសប្ដាហ៍នេះ។ ជនសង្ស័យម្នាក់នេះបានបង្ហោះតាមគណនីហ្វេសប៊ុក គំរាមធ្វើឃាតស្ដេចម៉ាឡេស៊ី Sultan Muhammad V នាយករដ្ឋមន្រ្តីម៉ាឡេស៊ី លោក មហាធៀ មហាម៉ាត់ រដ្ឋមន្រ្តីប្រចាំការិយាល័យនាយករដ្ឋមន្រ្តី លោក Mujahid Yusof Rawa។ ការគំរាមធ្វើឃាតនេះ ដោយសារជនសង្ស័យម្នាក់នេះ យល់ឃើញថា ស្ដេច និងថ្នាក់ដឹកនាំម៉ាឡេស៊ី មិនមែនជាមេដឹកនាំឥស្លាម ដែលដឹកនាំប្រទេសដោយយោងតាមច្បាប់ឥស្លាម Shariah៕

ប្រភព៖ Channelnewsasia ប្រែសម្រួល៖ វាសនា