ក្រសួងអប់រំ ប្រកាសដំណឹងស្ដីពីការប្រឡងផលិតរឿងខ្លី៣នាទី

2018-07-19 07:29:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងអប់រំ យុវជន និងកីឡា និងស្ថានទូតជប៉ុនប្រចាំកម្ពុជា បានសហការរៀបចំការប្រឡងផលិតរឿងខ្លី ៣នាទី ក្រោមប្រធានបទ "Self Responsibility " សម្រាប់សិស្សវិទ្យាល័យ ដើម្បីជ្រើសរើសក្រុមសិស្សដែលមានស្នាដៃផលិតល្អៗចំនួន៣ក្រុម។

ក្រុមដែលឈ្នះ នឹងអាចទៅចូលរួមមហោស្រពភាពយន្តកុមារអន្តរជាតិអាស៊ី ឆ្នាំ២០១៨ ដែលនឹងប្រព្រឹត្តិទៅនៅថ្ងៃទី២៤ ខែវិច្ឆិកាខាងមុខ ក្នុងទីក្រុង Kitami កោះ Hokkaido ប្រទេសជប៉ុន។

លក្ខខណ្ឌនៃការចុះឈ្មោះជាបេក្ខជនប្រឡង៖

ជាសិស្សដែលកំពុងសិក្សានៅសាលារដ្ឋ ឬឯកជន ថ្នាក់ទី១០ និងថ្នាក់ទី១១ ក្នុងឆ្នាំ២០១៨
មានប័ណ្ណសម្គាល់ខ្លួនសិស្ស
ជាសិស្សដែលពុំធ្លាប់បានចូលរួមក្នុងកម្មវិធីនេះ ឬកម្មវិធី JENESYS 2.0 នាពេលកន្លងមក
ត្រូវជ្រើសរើសក្រុមរបស់ខ្លួន (មួយក្រុមមាន ៣នាក់ សម្រាប់ផលិតរឿងខ្លី ៣នាទីក្នុង១រឿង)

ក្រសួងអប់រំ បានប្រកាសថា ចំពោះសិស្សានុសិស្សទាំង២ភេទ ដែលមានចំណាប់អារម្មណ៍ អាចអញ្ជើញទៅទទួលពាក្យនៅនាយកដ្ឋានមធ្យមសិក្សាចំណេះទូទៅ នៃក្រសួងអប់រំ យុវជន និងកីឡា ដែលមានទីតាំងស្ថិតនៅអគារលេខ១៦៩ ផ្លូវលេខ៣១០ សង្កាត់បឹងកេងកង១ ខណ្ឌចំការមន មហាវិថីព្រះនរោត្ដម រាជធានីភ្នំពេញ។ ការដាក់ពាក្យ នឹងធ្វើឡើងចាប់ពីថ្ងៃផ្សាយដំណឹងនេះ រហូតដល់ថ្ងៃទី២៧ ខែសីហា ឆ្នាំ២០១៨។

បេក្ខជនដែលបានដាក់ពាក្យ ត្រូវចូលរួមប្រជុំណែនាំ នៅថ្ងៃទី២ ខែសីហា ឆ្នាំ២០១៨ វេលាម៉ោង ២រសៀល នៅស្ថានទូតជប៉ុនប្រចាំកម្ពុជា និងចាប់ផ្ដើមផលិតរឿងខ្លី ៣នាទី។ រឿងខ្លី ដែលផលិតរួចរបស់ក្រុមនីមួយៗ ត្រូវផ្ដល់មកនាយកដ្ឋានមធ្យមសិក្សាចំណេះដឹងទូទៅ (ទីកន្លែងទទួលពាក្យ) ដោយថ្ងៃផុតកំណត់គឺនៅថ្ងៃទី៣១ ខែសីហា ឆ្នាំ២០១៨។ ការប្រកាសលទ្ធផល នឹងធ្វើឡើងនៅថ្ងៃទី១៧ ខែកញ្ញា ឆ្នាំ២០១៨ វេលាម៉ោង២រសៀល នៅមជ្ឈមណ្ឌលកិច្ចសហប្រតិបត្តិការកម្ពុជា-ជប៉ុន (CJCC)៕

អត្ថបទ៖ ឈាង.