ម៉ាឡេស៊ី នឹងចរចាពីការពន្យារពេលធ្វើផ្លូវរថភ្លើងល្បឿនលឿនជាមួយសិង្ហបុរី
- 2018-07-20 01:15:29
- ចំនួនមតិ 0 | ចំនួនចែករំលែក 0
ម៉ាឡេស៊ី នឹងចរចាពីការពន្យារពេលធ្វើផ្លូវរថភ្លើងល្បឿនលឿនជាមួយសិង្ហបុរី
ចន្លោះមិនឃើញ
លោក មហាធៀ មហាម៉ាត់ នាយករដ្ឋមន្ត្រីម៉ាឡេស៊ី បាននិយាយថា រដ្ឋាភិបាលរបស់លោកគ្រោងនឹងពិភាក្សាជាមួយនឹងសិង្ហបុរី អំពីការពន្យារពេលនៃគម្រោងរថភ្លើងល្បឿនលឿន High-Speed Rail (HSR)។
កាលពីលើកមុន លោក មហាធៀ បានប្រាប់ថា លោកនឹងលុបចោលគម្រោង HSR ហើយនឹងចរចាជាមួយសិង្ហបុរី អំពីថ្លៃសំណង់ដែលត្រូវបង់។ យ៉ាងណាមិញ កាលពីថ្ងៃទី១៩ កក្កដា ម្សិលមិញ លោកបានប្រាប់អ្នកសារព័ត៌មាននៅវិមានសភាថា៖ "(ពីមុន) នៅពេលយើងមើលទៅស្ថានភាពហិរញ្ញវត្ថុនៃប្រទេស យើងគិតថា យើងមិនអាចបន្តទៅមុខទៀតទេ (គម្រោង HSR)។ ប៉ុន្តែដោយឆ្លងកាត់ការសិក្សាទៅលើវា និងផលប៉ះពាល់នៃការលុបចោលកិច្ចសន្យាជាឯកតោភាគី យើងបានសម្រេចថា យើងប្រហែលជាត្រូវធ្វើបន្តទៀតនៅថ្ងៃខាងមុខ។ យើងប្រហែលជាត្រូវកាត់បន្ថយការចំណាយ។ ប៉ុន្តែការកាត់បន្ថយការចំណាយនេះគឺពិបាកណាស់ក្នុងការឲ្យយើងដោះស្រាយវា។ ដូច្នេះហើយវាត្រូវតែពន្យារពេលសិន"។
លោក Azmin Ali រដ្ឋមន្ត្រីក្រសួងកិច្ចការសេដ្ឋកិច្ចម៉ាឡេស៊ី បានឲ្យដឹងកាលពីថ្ងៃទី១៨កក្កដាកន្លងទៅថា លោកគ្រោងនឹងទៅសិង្ហបុរី នៅចុងខែកក្កដា ដើម្បីស្វែងយល់ពីកិច្ចព្រមព្រៀងដែលធ្វើឡើងដោយរដ្ឋាភិបាលម៉ាឡេស៊ីអាណត្តិមុនរបស់លោក Najib Razak។
សូមបញ្ជាក់ថា កាលពីថ្ងៃទី១ ខែមិថុនា ឆ្នាំ២០១៨ រដ្ឋាភិបាលសិង្ហបុរី បានផ្ញើសារការទូតមួយទៅកាន់ម៉ាឡេស៊ី ដើម្បីឲ្យបញ្ជាក់ពីគម្រោង HSR។ ប៉ុន្តែមកទល់នឹងពេលនេះ ម៉ាឡេស៊ីមិនទាន់ឆ្លើយតបនឹងសារនោះឡើយ តែម៉ាឡេស៊ីបានជម្រាបសិង្ហបុរីថា ខ្លួននឹងស្នើឲ្យមានកិច្ចប្រជុំមួយនៅថ្ងៃទី៣១ ខែកក្កដា ឆ្នាំ២០១៨។
លោក មាហាធៀ បានឈ្នះការបោះឆ្នោតជាតិ កាលពីថ្ងៃទី៩ ខែឧសភា ឆ្នាំ២០១៨។ ដើម្បីឆ្លើយតបនឹងសារដែលខ្លួនធ្លាប់អំពាវនាវអំឡុងពេលយុទ្ធនាការបោះឆ្នោត រដ្ឋាភិបាលថ្មីរបស់លោក មហាធៀ បានត្រួតពិនិត្យទៅលើគម្រោងធំៗជាច្រើន ដែលបានបង្កើតដោយរដ្ឋាភិបាលលោក Najib ក្នុងគោលបំណងកាត់បន្ថយបំណុលជាតិ៕