ប្រធានលីគ La Liga ប្រាប់មូលហេតុជំរុញឲ្យ Ronaldo ចាកចេញពី Real Madrid

2018-07-20 02:07:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការផ្ទេរទៅកាន់ក្លឹបថ្មី Juventus ពីកន្លែងចាស់ Real Madrid របស់កីឡាករ Cristiano Ronaldo កំពុងក្លាយជាប្រធានបទក្ដៅនៅក្នុងវិស័យបាល់ទាត់នារយៈពេលប៉ុន្មានថ្ងៃកន្លងមកនេះ។ Ronaldo បានប្រាប់ថា ការចាកចេញនេះគឺរូបគេត្រូវការការផ្លាស់ប្ដូរថ្មីមួយនៅក្នុងអាជីពជាអ្នកកីឡាករម្នាក់។ យ៉ាងណាមិញ លោក Javier Tebas ប្រធានក្របខ័ណ្ឌ La Liga បានបញ្ជាក់ប្រាប់ពីមូលហេតុមួយផ្សេងទៀតនៅពីក្រោយរឿងផ្ទេរចេញពីក្លឹបអធិរាជ ស របស់ Ronaldo។

ត្រឹម២៤ម៉ោង Juventus លក់អាវ Ronaldo បានពាក់កណ្ដាលនៃតម្លៃខ្លួនទិញពី Real

Ronaldo បង្ហាញខ្លួនក្នុងនាមជាសមាជិក Juventus ជាផ្លូវការ (រូបថត៖ Juventus)

លោក Tebas និយាយថា កត្តាពន្ធនៅអេស្ប៉ាញ ក៏រួមចំណែកធ្វើឲ្យ Ronaldo ផ្ដាច់កុងត្រា៩ឆ្នាំពី Real រត់ទៅរកក្រុមសេះបង្កង់ Juventus ផងដែរ។ លោកថា តម្លៃពន្ធនៅអេស្ប៉ាញមានអត្រាខ្ពស់សម្រាប់កីឡាករបាល់ទាត់អាជីព ខុសពីកន្លែងនានាទៀតដែលពន្ធមានកម្រិតទាបជាងនេះ។ លោកបន្តថា Ronaldo នឹងអាចរកចំណូលបានច្រើននៅអ៊ីតាលីជាងកាលនៅអេស្ប៉ាញ។ "អេស្ប៉ាញគឺជាកន្លែងដែលកីឡាករមានស្ថានភាពពន្ធអាក្រក់ជាងគេបំផុត" នេះជាការលើកឡើងរបស់ប្រធានលីគអេស្ប៉ាញ។

Ronaldo បង្ហើរសារជាលើកដំបូងទៅឲ្យ Messi ក្រោយចូលលេងនៅ Juventus

លោក Javier Tebas ប្រធានក្របខ័ណ្ឌ La Liga (រូបភាព៖ beIN SPORTS)

គួររំលឹកថា Ronaldo កាលពីប៉ុន្មានឆ្នាំកន្លងទៅ ធ្លាប់មានបញ្ហាប្ដឹងផ្ដល់គ្នារឿងបង់ពន្ធនៅអេស្ប៉ាញ ហើយរូបគេនិយាយថា វាជាកត្តារុញច្រានចិត្តគេឲ្យចង់ចាកពីទីនោះ ហើយចង់ត្រឡប់ទៅកាន់អង់គ្លេសវិញ។ កាលនោះ Ronaldo ប្រឈមនឹងការជាប់ពន្ធនាគាររយៈពេលខ្លី និងការពិន័យជាប្រាក់មួយចំនួនធំ ប្រសិនបើរកឃើញថាមានកំហុសពាក់ព័ន្ធនឹងការបង់ពន្ធប្រាកដមែន។ ប៉ុន្តែ Ronaldo បានបដិសេធនូវការចោលប្រកាន់ទាំងនោះ ហើយបង្ហាញខ្លួននៅតុលាការកាលពីឆ្នាំមុនដោយអះអាងថា៖ "ខ្ញុំតែងតែបង់ (ពន្ធ) ទៅតាមចំនួនដែលខ្ញុំត្រូវបង់។ ខ្ញុំធ្វើរឿងដែលត្រឹមត្រូវ ហើយខ្ញុំនឹងបន្តធ្វើដូច្នេះតទៅទៀត"។ នេះបើយោងតាមការចុះផ្សាយរបស់សារព័ត៌មាន Goal។

សូមបញ្ជាក់ថា Ronaldo បានចាកចេញពី Manchester United ទៅកាន់ក្លឹប Real Madrid នៅឆ្នាំ២០០៩ មុនសម្រេចផ្ទេរទៅ Juventus កាលពីថ្ងៃទី១០ ខែកក្កដា ឆ្នាំ២០១៨កន្លងទៅក្នុងតម្លៃខ្លួន ១៤០លានដុល្លារ និងទទួលកម្លាំងពលកម្មជាង ៦៦ម៉ឺនដុល្លារក្នុង១សប្ដាហ៍៕

ប្រភព៖ Goal ប្រែសម្រួល៖ ឈាង.