ថៃព្រមានការលេងទឹកសមុទ្រនៅភូកេត ក្រោយប្រទះឃើញក្រពើ១ក្បាល

2018-07-20 03:07:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរថៃ បានចាប់ផ្ដើមប្រតិបត្តិការចាប់ក្រពើ១ក្បាល ដែលត្រូវគេប្រទះឃើញនៅក្នុងទឹកសមុទ្រឆ្នេរ Yanui នៃខេត្តភូកេត កាលពីល្ងាចថ្ងៃទី១៨ ខែកក្កដា ឆ្នាំ២០១៨។

ក្រពើ១ក្បាលនេះ ត្រូវលោក Somchai Khunlunag អាយុ២២ឆ្នាំ ប្រទះឃើញ ខណៈដែលលោកបានទៅកាន់ឆ្នេរសមុទ្រ Yanui ដើម្បីចាប់ត្រី នៅវេលាម៉ោងប្រមាណជា ៦ និង ២០នាទីល្ងាចថ្ងៃពុធកន្លងទៅ។ លោកបានឃើញក្រពើ១ក្បាលកំពុងបណ្ដែតខ្លួនលើផ្ទៃទឹក ដែលនៅមិនឆ្ងាយឡើយពីឆ្នេរ។ ជួបប្រទះនឹងរឿងដូច្នេះ លោកបានហៅទូរសព្ទទៅម្ដាយ ហើយម្ដាយរបស់លោកបានរាយការណ៍ទៅប៉ូលិស។ ប៉ូលិស និងមន្ត្រីដែលពាក់ព័ន្ធ ដែលទៅដល់កន្លែងនោះ បានអះអាងថា ពួកគេពិតជាបានឃើញភ្នែកក្រហមៗរបស់សត្វក្រពើប្រាកដមែននៅក្នុងទឹកសមុទ្រ។

ឆ្នេរ Yanui ខេត្តភូកេត/ រូបភាព៖ TripAdvisor

លុះដល់ព្រឹកថ្ងៃទី១៩ កក្កដា សត្វក្រពើ១ក្បាលនោះក៏បង្ហាញខ្លួននៅឆ្នេរ Yanui និងឆ្នេរ Nai Harn ម្ដងទៀត។ ការណ៍នេះបានធ្វើឲ្យប៉ូលិស មន្ត្រីក្នុងតំបន់ និងមន្ត្រីជលផល ជាង៤០នាក់ បានឡោមព័ទ្ធតំបន់នោះ នៅថ្ងៃដដែល ដើម្បីរកមើលវត្តមានរបស់ក្រពើ។ ផ្លាកសញ្ញាព្រមាន និងហាមឃាត់ការហែលទឹក ត្រូវបានដាក់តាំង ដើម្បីផ្អាកសកម្មភាពលេងទឹកនៅតំបន់ឆ្នេរទាំង២ បន្ទាប់ពីហេតុការណ៍នេះបង្កភាពភ័យខ្លាចចំពោះប្រជាពលរដ្ឋភូកេត និងភ្ញៀវទេសចរជាខ្លាំង។

លោក Norraphat Plodthong អភិបាលខេត្តភូកេត បានឲ្យដឹងថា បើតាមវីដេអូដែលថតបាន ក្រពើ១ក្បាលនេះអាចមានប្រវែងពី ២ ទៅ ៣ម៉ែត្រ។ លោកអភិបាលបន្តថា ក្រុមអ្នកជំនាញចាប់ក្រពើមកពីនាយកដ្ឋានជលផល កំពុងតាមប្រមាញ់សត្វសាហាវនេះហើយ ហើយគេសង្ស័យថា វាអាចរួចពីកន្លែងកសិដ្ឋានចិញ្ចឹមណាមួយ៕

សូមទស្សនាវីដេអូសត្វក្រពើដែលគេថតបាននៅឆ្នេរសមុទ្រខេត្តភូកេត៖

ប្រភព៖ Bangkokpost ប្រែសម្រួល៖ ឈាង.