ស៊ីម៉ាក់ បង្ហាញលទ្ធផលបោសសម្អាតមីន គិតចាប់ពីឆ្នាំ១៩៩២មក

2018-07-20 03:49:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក) បានថ្លែងថា គិតចាប់ពីឆ្នាំ១៩៩២ រហូតមកដល់ខែមីនា ឆ្នាំ២០១៨ កន្លងមកនេះ ស៊ីម៉ាកបានសម្រេចលទ្ធផលដូចជា៖ រុករក និងកម្ទេចចោលគ្រាប់មីនប្រឆាំងមនុស្សជាង ៥១ម៉ឺនគ្រាប់ មីនប្រឆាំងរថក្រោះជាង ១ម៉ឺនគ្រាប់ គ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួនជាង ២លានគ្រាប់។ សរុបរួមទាំងអស់ ទាំងគ្រាប់មីន និងយុទ្ធភណ្ឌមិនទាន់ផ្ទុះ គឺជិត ២,៧លានគ្រាប់ ដែលត្រូវបានបោសសម្អាត។ ក្នុងនោះបានធ្វើការបោសសម្អាតផ្ទៃដីមានមីនបានចំនួនជាង ៩៤៣គីឡូម៉ែត្រក្រឡាផងដែរ។

ការថ្លែងរបស់លោក ហេង រតនា ខាងលើនេះ ធ្វើឡើងនៅក្នុងពិធីប្រកាសបញ្ចូលក្របខណ្ឌក្នុងយោធពលខេមរភូមិន្ទ បំពាក់ឋានន្តរស័ក្តិ និងគ្រឿងឥស្សរិយស ជូនដល់មន្ត្រី បុគ្គលិកស៊ីម៉ាក ដែលបានចូលនិវត្តន៍ បាត់បង់សមត្ថភាពការងារ និងពិការ នៅទីបញ្ជាការដ្ឋានស៊ីម៉ាក នាព្រឹកថ្ងៃទី២០ ខែកក្កដានេះ ក្រោមអធិបតីភាពលោកឧត្តមសេនីយ៍ឯក ហ៊ុន ម៉ាណិត នាយករងខុទ្ទកាល័យនាយករដ្ឋមន្ត្រី។

លោក ហេង រតនា ថ្លែងក្នុងពិធីប្រកាសបញ្ចូលក្របខណ្ឌក្នុងយោធពលខេមរភូមិន្ទ បំពាក់ឋានន្តរស័ក្តិ និងគ្រឿងឥស្សរិយស ជូនដល់មន្ត្រី បុគ្គលិកស៊ីម៉ាកដែលបានចូលនិវត្តន៍ បាត់បង់សមត្ថភាពការងារ និងពិការ នាព្រឹកថ្ងៃទី២០ កក្កដា ២០១៨។ រូបថត៖ ផ្តល់ឱ្យ

លោកបានបញ្ជាក់ថា ក្នុងការបន្តដោះស្រាយ និងលុបបំបាត់បញ្ហាគ្រាប់មីននេះ ស៊ីម៉ាកបានរៀបចំផែនការរំកិល ១០ឆ្នាំរបស់ខ្លួន (២០១៦-២០២៥) ស្របតាមតម្រូវការរបស់ប្រជាជន និងរាជរដ្ឋាភិបាល ដោយធ្វើយ៉ាងណាធ្វើការបោសសម្អាតផ្ទៃដីចម្ការមីនជិត ៥ម៉ឺនហិកតា និងរំដោះផ្ទៃដីចម្ការមីនដែលសង្ស័យចំនួនជាង ១២ម៉ឺនហិកតា។ ក្នុងនោះនឹងបង្កើនសមត្ថភាពឆ្លើយតបទៅនឹងសំណូមពរបន្ទាន់ៗរបស់ប្រជាជន និងអាជ្ញាធរឱ្យបានប្រមាណ ២ម៉ឺន សំណូមពរក្នុងមួយឆ្នាំៗ។

ដើម្បីសម្រេចផែនការនេះបាន ស៊ីម៉ាកត្រូវការធនធានទាំងសម្ភារ និងថវិកាជាង ១២០លានដុល្លារ ក្នុងការគាំទ្រប្រតិបត្តិការរបស់ខ្លួនរយៈពេល ៥ឆ្នាំ ដំណាក់កាលទី១ ខាងមុខនេះ។

លោក ហេង រតនា បានបញ្ជាក់ថា ការបោសសម្អាតមីននៅកម្ពុជាពិតជាមានបញ្ហាប្រឈម និងឧបសគ្គមួយចំនួនដូចជា ស្ថានភាពចម្ការមីនមានព្រៃដុះក្រាស់ និងមានស្ថានភាពដីរឹងខ្លាំង ស្ថានភាពចម្ការមីនចម្រុះគ្នា គ្រាប់មីនតោនកប់ជ្រៅៗ និងមីនថ្មើរជើងច្រើន ដែលងាយបង្កគ្រោះថ្នាក់ពេលកំពុងប្រតិបត្តិការ។ ចំណែកផ្នែកធនធានទាំងសម្ភារៈ និងថវិកា គាំទ្រការបោសសម្អាតមីននេះ គឺពឹងផ្អែកយ៉ាងខ្លាំងលើជំនួយរបស់ដៃគូអភិវឌ្ឍន៍៕

អត្ថបទ៖ សោភា