ពូទីន៖ ទំនាក់ទំនងរុស្ស៊ី-អាមេរិក ស្ថិតនៅក្នុងសភាពអាក្រក់ជាងសង្រ្គាមត្រជាក់ទៅទៀត

2018-07-20 08:37:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វ្លាឌីមៀ ពូទីន បានថ្លែងទៅកាន់អគ្គរដ្ឋទូត និងមន្រ្តីទូតរុស្ស៊ី កាលពីថ្ងៃទី១៩ ខែកក្កដា ២០១៨ ម្សិលមិញថា ទំនាក់ទំនងរវាងរុស្ស៊ី និងអាមេរិក ក្នុងទិដ្ឋភាពជាច្រើន គឺអាក្រក់ជាងសង្រ្គាមត្រជាក់ទៅទៀត។

លោក វ្លាឌីមៀ ពូទីន ថ្លែងទៅកាន់អគ្គរដ្ឋទូត និងមន្រ្តីទូតរុស្ស៊ី នៅក្រុងមូស្គូ កាលពីថ្ងៃទី១៩ ខែកក្កដា ២០១៨ (រូបភាព៖ Sputnik)

លោក ពូទីន ថា "យើងត្រូវការរបៀបវារៈវិជ្ជមាន ក្នុងគោលបំណងធ្វើការជាមួយគ្នាដើម្បីស្វែងរកមូលដ្ឋានរួមគ្នា។ ជាការពិត យើងបានជជែកពីបញ្ហានេះ នៅក្នុងជំនួបជាមួយប្រធានាធិបតីអាមេរិក ដូណាល់ ត្រាំ នៅ Helsinki។ សូម្បីតែភាពខុសគ្នាទាំងអស់ក្នុងទស្សនៈនានា យើងបានឯកភាពថា ទំនាក់ទំនងរវាងរុស្ស៊ី-អាមេរិក ស្ថិតនៅក្នុងសភាពដែលមិនគួរជាទីពេញចិត្តខ្លាំងបំផុត នៅក្នុងរួបភាពជាច្រើន គឺអាក្រក់ជាងអំឡុងសង្រ្គាមត្រជាក់ទៀត"។

លោក ពូទីន ក៏បានកក់សម្គាល់ដែរថា បញ្ហាទាំងអស់នោះ មិនអាចដោះស្រាយនៅក្នុងរយៈពេល ២ ឬ ៣ម៉ោងបាននោះទេ។

សូមបញ្ជាក់ថា ទំនាក់ទំនងរវាងរុស្ស៊ី និងអាមេរិក កាន់តែអាក្រក់ឡើង ក្រោយអាមេរិកចោទរុស្ស៊ីថា បានលូកលាន់កិច្ចការបោះឆ្នោតអាមេរិកនៅឆ្នាំ២០១៦។ បន្ទាប់មក អាមេរិកបានបណ្ដេញមន្រ្តីទូតរុស្ស៊ី ហើយរុស្ស៊ីក៏បានបណ្ដេញមន្រ្តីទូតអាមេរិកវិញផងដែរ។ ជាងនេះទៅទៀត អាមេរិកបានដាក់ទណ្ឌកម្មជាបន្តបន្ទាប់មកលើស្ថាប័ន និងបុគ្គលមួយចំនួននៅក្នុងប្រទេសរុស្ស៊ី៕

ប្រភព៖ Sputnik News ប្រែសម្រួល៖ វាសនា