ខណ្ឌពោធិ៍សែនជ័យ និងដង្កោ បានរងការជន់លិចហើយ

2018-07-20 09:16:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គិតមកដល់រសៀលថ្ងៃទី២០ ខែកក្កដានេះ ជំនន់ទឹកភ្លៀង ដែលហូរពីតំបន់ខាងលើនៅខេត្តកំពង់ស្ពឺ បានលិចតំបន់មួយចំនួន ក្នុងភូមិសាស្ត្ររាជធានីភ្នំពេញដែលស្ថិតនៅតាមបណ្តោយដងស្ទឹងព្រែកត្នោត គឺនៅក្នុងខណ្ឌពោធិ៍សែនជ័យ និងខណ្ឌដង្កោ។

លោក ឃួង ស្រេង អភិបាលរាជធានីភ្នំពេញ បានដឹកនាំកម្លាំង ជិះអូប័រចុះពិនិត្យស្ថានភាពទឹកជំនន់នៅតំបន់មួយចំនួន នៅក្នុងខណ្ឌពោធិ៍សែនជ័យ ខណៈដែលជំនន់ទឹកភ្លៀង កំពុងតែកើនឡើង ដែលធ្វើឲ្យលំនៅឋានរបស់ប្រជាពលរដ្ឋមួយចំនួន កាលពីព្រឹកថ្ងៃទី២០ ខែកក្កដានេះ។

លោក ឃួង ស្រេង ចុះពិនិត្យស្ថានភាពទឹកជំនន់ នៅខណ្ឌពោធិ៍សែនជ័យ នាព្រឹកថ្ងៃទី២០កក្កដា។ រូបថត៖ រដ្ឋបាលរាជធានីភ្នំពេញ

លោក ឃួង ស្រេង បានជួយដោះស្រាយភ្លាមៗដល់ប្រជាពលរដ្ឋចំនួន ៦ភូមិ ដែលរងការលិចទឹក ដោយបានបញ្ជូនកម្លាំង និងអូប័រចំនួន ២០គ្រឿង សម្រាប់បម្រើការដឹកជញ្ជូនទៅមក។ ជាមួយគ្នានេះ លោកបានចាត់តាំងឱ្យមានក្រុមគ្រូពេទ្យប្រចាំការសង្គ្រោះបន្ទាន់ និងរៀបចំស្បៀងអាហារទុកជូនប្រជាពលរដ្ឋនៅភូមិដូនកុក សង្កាត់បឹងធំ ខណ្ឌពោធិ៍សែនជ័យ។

លោកអភិបាលរាជធានីភ្នំពេញ បានអំពាវនាវឲ្យប្រជាពលរដ្ឋ ត្រូវមានការប្រុងប្រយ័ត្នខ្ពស់ ចំពោះគ្រោះទឹកជំនន់នេះ ពិសេសប្រុងប្រយ័ត្នចំពោះកូនចៅ កុំបណ្តោយឲ្យលេងទឹក តាមដងអូរ ប្រឡាយ ដែលកំពុងលិចលង់ដោយជំនន់ទឹកស្ទឹងព្រែកត្នោត នាពេលនេះ៕

អត្ថបទ៖ លីហៀង