គិតចាប់ពីថ្ងៃបង្កើត UN មក តើមានអគ្គលេខាធិការប៉ុន្មានរូបហើយ?

2018-07-20 10:07:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មកដល់ពេលនេះ អង្គការសហប្រជាជាតិ (UN) មានអគ្គលេខាធិការ ចំនួន ៩រូបហើយ គិតចាប់តាំងពីអង្គការនេះ ត្រូវបានបង្កើតឡើង នៅថ្ងៃទី ២៤ តុលា ឆ្នាំ១៩៤៥ នាទីក្រុង San Francisco រដ្ឋ California សហរដ្ឋអាមេរិក។ អគ្គលេខាធិការទាំង ៩រូបនេះ គឺរួមមានដូចខាងក្រោម៖

១. លោក ទ្រីហ្គវេ ឡាយ (Trygve Lie) ជនជាតិ ណរវេ

លោក ទ្រីហ្គវេ ឡាយ/ un.org

លោក ទ្រីហ្គវេ ឡាយ កើតនៅថ្ងៃទី ១៦ កក្កដា ឆ្នាំ១៨៩៦។ លោក ទ្រីហ្គវេ ត្រូវបានជ្រើសតាំងជាអគ្គលេខាធិការទី១របស់ UN សម្រាប់អាណត្តិ៥ឆ្នាំ ក្នុងថ្ងៃទី ១ កុម្ភៈ ឆ្នាំ១៩៤៦។ នៅថ្ងៃទី០១ វិច្ឆិកា ឆ្នាំ ១៩៥០ មហាសន្និបាតអង្គការសហប្រជាជាតិ(UNGA) បានសម្រេចពន្យារអាណត្តិរបស់លោក៣ឆ្នាំបន្ថែមទៀត។ ប៉ុន្តែនៅថ្ងៃទី ១០ ធ្នូ ឆ្នាំ១៩៥២ លោក បានសម្រេចលាលែងពីតំណែងជាអគ្គលេខាធិការ UN។

២. លោក ដេហ្គ ហាមាសូលដ៏ (Dag Hammarskjöld) ជនជាតិ ស៊ុយអែត

លោក ដេហ្គ ហាមាសូលដ៏/ un.org

លោក ដេហ្គ ហាមាសូលដ៏ កើតនៅថ្ងៃទី២៩ កក្កដា ឆ្នាំ១៩០៥។ លោក ជាកូនទី៤ របស់នាយករដ្ឋមន្ត្រីស៊ុយអែត លោក Hjalmar Hammarskjöld ដែលបានកាន់តំណែងអំឡុងសង្គ្រាមលោកលើកទី១។ លោក បានក្លាយជាអគ្គលេខាធិការ UN ពីថ្ងៃទី ១០ មេសា ឆ្នាំ១៩៥៣ រហូតដល់ថ្ងៃទី ១៨ កញ្ញា ឆ្នាំ១៩៦១ នៅពេលដែលលោក បានជួបនឹងឧបទ្ទវហេតុធ្លាក់យន្តហោះ ខណៈកំពុងបំពេញបេសកកម្មសន្តិភាពក្នុងប្រទេសកុងហ្គោ។

៣. លោក អ៊ូ ថាន់ (U Thant) ជនជាតិ មីយ៉ាន់ម៉ា

លោក អ៊ូ ថាន់/ un.org

លោក អ៊ូ ថាន់ កើតនៅថ្ងៃទី ២២ មករា ឆ្នាំ ១៩០៩។ លោក អ៊ូ ថាន់ ត្រូវបានជ្រើសតាំងជាអគ្គលេខាធិការ UN ជំនួសឲ្យលោកអគ្គលេខាធិការ ហាមាសូលដ៏ ដែលបានស្លាប់ក្នុងហេតុការណ៍ធ្លាក់យន្តហោះ នាខែ កញ្ញា ឆ្នាំ១៩៦១។ លោក បានកាន់តំណែងក្នុងស្ថាប័នដ៏ធំនេះ ចាប់ពីឆ្នាំ១៩៦១ ដល់ឆ្នាំ ១៩៧១ (២អាណត្តិ)។

៤. លោក ឃើត វលដ៏ហេម (Kurt Waldheim) ជនជាតិ អូទ្រីស

លោក ឃើត វលដ៏ហេម/ un.org

លោក ឃើត វលដ៏ហេម កើតនៅថ្ងៃទី ២១ ធ្នូ ឆ្នាំ១៩១៨។ លោក ត្រូវបានជ្រើសតាំងជាអគ្គលេខាធិការ UN សម្រាប់អាណត្តិ៥ឆ្នាំ ចាប់ពីឆ្នាំ១៩៧២ ដល់ ឆ្នាំ១៩៨១ (២អាណត្តិ)។

៥. លោក សាវីយេប៉េរេ ដឺគួអេឡា (Javier Perez de Cuellar) ជនជាតិ ប៉េរូ

លោក សាវីយេប៉េរេ ដឺគួអេឡា/ un.org

លោក សាវីយេប៉េរេ ដឺគួអេឡា កើតនៅថ្ងៃទី ១៩ មករា ឆ្នាំ១៩២០។ លោក បានចូលកាន់តំណែងជាអគ្គលេខាធិការ UN ចាប់ពីឆ្នាំ ១៩៨២ ដល់ឆ្នាំ ១៩៩១ (២អាណត្តិ)។

៦. លោក ប៊ូត្រូស ប៊ូត្រូស ហ្គាលី (Boutros boutros ghali) ជនជាតិ អេហ្ស៊ីប

លោក ប៊ូត្រូស ប៊ូត្រូស ហ្គាលី/ un.org

លោក ប៊ូត្រូស ប៊ូត្រូស ហ្គាលី កើតនៅថ្ងៃទី ១៤ វិច្ឆិកា ឆ្នាំ១៩២២។ លោក បានក្លាយជាអគ្គលេខាធិការ UN ចាប់ពីឆ្នាំ១៩៩២ ដល់ ឆ្នាំ១៩៩៦។

៧. លោក កូហ្វ៊ី អាណាន់ (Kofi A. Annan) ជនជាតិ ហ្គាណា

លោក កូហ្វ៊ី អាណាន់/ un.org

កើតនៅថ្ងៃទី ០៨ មេសា ឆ្នាំ១៩៣៨។ លោក បានកាន់តំណែងជាអគ្គលេខាធិការ UN ចាប់ពីឆ្នាំ១៩៩៧ ដល់ឆ្នាំ២០០៦ (២អាណត្តិ)។ លោក អាណាន់ ទទួលបានរង្វាន់ណូបែលសន្តិភាពក្នុងឆ្នាំ២០០១។

៨. លោក បាន គីមូន (Ban Ki-Moon) ជនជាតិ កូរ៉េខាងត្បូង

លោក បាន គីមូន/ un.org

លោក បាន គីមូន កើតនៅថ្ងៃទី ១៣ មិថុនា ឆ្នាំ១៩៤៤។ លោក បានបញ្ចប់បរិញ្ញាបត្រផ្នែកទំនាក់ទំនងអន្តរជាតិពីសកលវិទ្យាល័យជាតិទីក្រុងសេអ៊ូល នៅក្នុងឆ្នាំ១៩៧០។ ក្នុងឆ្នាំ ១៩៨៥ លោក គីមូន បានបញ្ចប់អនុបណ្ឌិតផ្នែករដ្ឋបាលសាធារណៈ ពីសកលវិទ្យាល័យ Harvard។ លោក បានក្លាយជាអគ្គលេខាធិការ UN ចាប់ពីឆ្នាំ២០០៦ ដល់ឆ្នាំ២០១៦ (២អាណត្តិ)។

៩. លោក អាន់តូនីយូ ហ្គុតេរ៉េស (António Guterres) ជនជាតិ ព័រទុយហ្គាល់

លោក អាន់តូនីយូ ហ្គុតេរ៉េស/ un.org

លោក អាន់តូនីយូ ហ្គុតេរ៉េស កើតនៅឆ្នាំ ១៩៤៩។ លោក ជាអតីតនាយករដ្ឋមន្ត្រីព័រទុយហ្គាល់ ចាប់ពីឆ្នាំ ១៩៩៥ ដល់ឆ្នាំ ២០០២។ លោក ក៏ធ្លាប់កាន់តំណែងជាអតីតស្នងការជនភៀសខ្លួនអង្គការសហប្រជាជាតិ ចាប់ពីឆ្នាំ ២០០៥ ដល់ ឆ្នាំ២០១៥។ លោក កំពុងកាន់តំណែងជាអគ្គលេខាធិការ UN ចាប់ឆ្នាំ២០១៧មកដល់បច្ចុប្បន្ន៕

ប្រភព៖ United Nations ប្រែសម្រួល៖ អឹុម ម៉េងស៊ាង