កម្ពុជា រៀបចំពិព័រណ៍ទេសចរណ៍ក្នុងស្រុកដ៏ធំ ជាលើកដំបូង

2018-07-20 10:04:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងទេសចរណ៍ និងសមាគមទីភ្នាក់ងារទេសចរណ៍កម្ពុជា (CATA) បានរៀបចំពិព័រណ៍ទេសចរណ៍ជាតិដ៏ធំ ជាលើកដំបូង ដើម្បីផ្សព្វផ្សាយពីផលិតផលទេសចរណ៍ និងចូលរួមជំរុញចលនាទេសចរណ៍ក្នុងស្រុក ដែលកំពុងមានការកើនឡើងរៀងរាល់ឆ្នាំ។ ពិធីបើកពិព័រណ៍នេះ ធ្វើឡើងនៅកោះពេជ្រនាថ្ងៃទី២០ ខែកក្កដា ឆ្នាំ២០១៨ ក្រោមអធិបតីភាព លោក ថោង ខុន រដ្ឋមន្ត្រីក្រសួងទេសចរណ៍។ ក្នុងពិព័រណ៍នេះ មានស្តង់បង្ហាញផលិតផលទេសចរណ៍ប្រមាណ ១៥០ស្តង់។

លោក ថោង ខុន កាត់ខ្សែបូ បើកពិព័រណ៍ទេសចរណ៍ជាតិជាលើកដំបូង នាថ្ងៃទី២០កក្កដា ២០១៨ នៅកោះពេជ្រ។ រូបថត៖ ក្រសួងទេសចរណ៍

លោក ថោង ខុន បាននិយាយថា វិស័យទេសចរណ៍កម្ពុជា ដែលជាទេសចរណ៍វប្បធម៌ និងធម្មជាតិ ត្រូវបានរាជរដ្ឋាភិបាលចាត់ទុកជា «មាសបៃតង»។ វិស័យនេះ បានរួមចំណែកប្រមាណ ១២% នៃផលិតផលក្នុងស្រុកសរុប និងផ្តល់ការងារដោយផ្ទាល់ប្រមាណជាង ៦២ម៉ឺននាក់ និងដោយប្រយោលជាច្រើនម៉ឺននាក់បន្ថែមទៀត។

លោករដ្ឋមន្រ្តីបន្តថា សម្រាប់ទេសចរណ៍ក្នុងស្រុក កំណើនភ្ញៀវមានការកើនឡើងជាលំដាប់ពីមួយឆ្នាំទៅមួយឆ្នាំ (៦% ជាមធ្យម)។ ជាក់ស្តែង នៅឆ្នាំ២០១៥ ទេសចរក្នុងស្រុកមានចំនួនជាង ៩,៦លាននាក់ កើនដល់ជាង ១០លាននាក់ នៅឆ្នាំ២០១៦ និងជិត ១១លាននាក់ នៅឆ្នាំ២០១៧ ហើយជាចក្ខុវិស័យក្រសួងទេសចរណ៍រំពឹងថា នឹងមានទេសចរប្រមាណ ១៩លាននាក់ នៅឆ្នាំ២០២៥។

ចំណែកភ្ញៀវទេសចរអន្តរជាតិមាន ៥,៦លាននាក់ នៅឆ្នាំ២០១៧ កើនឡើង ១១,៨%។ ហើយក្នុងរយៈពេល ៥ខែ ដើមឆ្នាំ ២០១៨នេះ កម្ពុជាទទួលបានទេសចរអន្តរជាតិប្រមាណ ២,៦លាននាក់។ តាមការព្យាករ កម្ពុជានឹងទទួលបានទេសចរអន្តរជាតិប្រមាណ ៦,២លាននាក់ នៅឆ្នាំ២០១៨នេះ ៧លាននាក់ នៅឆ្នាំ២០២០ និង ១៥លាននាក់នៅឆ្នាំ២០៣០។

ភ្ញៀវទេសចរ រង់ចាំថតថ្ងៃរះនៅប្រាសាទអង្គរវត្ត កាលពីខែមីនា ឆ្នាំ២០១៨

លោក ថោង ខុន បន្ថែមថា ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត បានអនុវត្តការងារមួយចំនួន ក្នុងគោលបំណងពង្រឹងការគ្រប់គ្រង និងអភិវឌ្ឍផលិតផលទេសចរណ៍ ប្រកបដោយគុណភាព និងចីរភាព រួមមានការដាក់ចេញការអនុវត្តយន្តការពង្រឹងប្រព័ន្ធវាយតម្លៃ ចំណាត់ថ្នាក់សេវាស្នាក់នៅ ចលនាប្រឡងប្រណាំងទីក្រុងស្អាត ចលនាប្រឡងប្រណាំងរង្វាន់សម្តេចនាយករដ្ឋមន្ត្រី សម្រាប់ធុរកិច្ចបៃតងក្នុងវិស័យទេសចរណ៍ ចលនាប្រឡងប្រណាំងរមណីយដ្ឋានទេសចរណ៍គំរូ និងចលនាប្រឡងប្រណាំងបដិសណ្ឋារកិច្ចល្អជាដើម៕

អត្ថបទ៖ សំភី