អាជ្ញាធររាជធានី ស្នើឱ្យបញ្ចៀសចរាចរណ៍ចេញពីផ្លូវសំខាន់ៗ ដែលមានបក្សហែក្បួនថ្ងៃនេះ

2018-07-22 01:27:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សាលារាជធានីភ្នំពេញ បានស្នើឱ្យប្រជាពលរដ្ឋទាំងអស់ បញ្ចៀសចរាចរណ៍ជាបណ្តោះអាសន្ននៅថ្ងៃទី២២កក្កដានេះ ចេញពីមហាវិថី និងផ្លូវសំខាន់ៗមួយចំនួន ដែលមានគណបក្សហែក្បួនឃោសនាបោះឆ្នោត ដើម្បីធានាដល់បរិយាកាសឃោសនាបោះឆ្នោតឲ្យមានភាពល្អប្រសើរ និងស្មើភាពគ្រប់គណបក្សនយោបាយ។

នៅក្នុងសេចក្តីជូនដំណឹងរបស់សាលារាជធានីភ្នំពេញ កាលពីថ្ងៃទី២០កក្កដា បានឱ្យដឹងថា មានគណបក្សនយោបាយចំនួន៥ ដែលបានដង្ហែក្បួនឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ នៅថ្ងៃ២២កក្កដានេះរួមមាន៖ គណបក្សប្រជាជនកម្ពុជា មានសមាជិកចូលរួមដង្ហែចំនួន ៣៥ ០០០នាក់, គណបក្សយុវជនកម្ពុជា ២០០នាក់, គណបក្សមាតុភូមិយើង ៥០០នាក់, គណបក្សខ្មែរសាធារណរដ្ឋ ៤០០នាក់, គណបក្សប្រជាធិបតេយ្យមូលដ្ឋាន ៥០០នាក់។

ក្បួនដង្ហែរបស់គណបក្សប្រជាជនកម្ពុជា នៅថ្ងៃដំបូងនៃយុទ្ធនាការឃោសនាបោះឆ្នោត

គណបក្សទាំង៥ខាងលើនេះ នឹងធ្វើការជួបជុំដង្ហែនៅតាមមហាវិថីសម្តេចសុធារស មហាវិថីម៉ៅសេទុង មហាវិថីព្រះមុនី្នវង្ស វិថីព្រះស៊ីសុវត្ថិ ផ្លូវជាតិលេខ៥ ផ្លូវជាតិលេខ១ ផ្លូវមិត្តភាពភ្នំពេញ-ហាណូយ ផ្លូវណតប្រ៊ីត ផ្លូវចោមចៅ និងផ្លូវសំខាន់ៗមួយចំនួនក្នុងរាជធានីភ្នំពេញ។

អាជ្ញាធរ បានលើកឡើងថា បើសិនមិនចាំបាច់ ប្រជាពលរដ្ឋពុំគួរធ្វើដំណើរតាមផ្លូវដង្ហែរបស់គណបក្សទាំងនោះឡើយ ចាប់ពីម៉ោង៦ព្រឹក រហូតដល់ក្បួនដង្ហែត្រូវបានបញ្ចប់៕

អត្ថបទ៖ សោភា