Neymar មិនចង់ឃើញបាល់ ក្រោយប្រេស៊ីលធ្លាក់ World Cup ត្រឹមវគ្គ៨ក្រុមចុងក្រោយ

2018-07-22 03:15:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែប្រយុទ្ធក្រុមជម្រើសជាតិប្រេស៊ីល Neymar Jr. បានសារភាពថា ក្រោយពេលប្រេស៊ីលធ្លាក់ចេញពី World Cup 2018 ត្រឹមវគ្គ៨ក្រុមចុងក្រោយ ខ្លួនមិនចង់លេងបាល់ មើលឃើញបាល់ និងមិនចង់មើលការប្រកួត World Cup ដែលនៅសេសសល់ទៀតនោះឡើយ។ Neymar បាននិយាយដូច្នេះ ក្នុងកិច្ចសម្ភាសជាមួយ AFP កាលពីថ្ងៃទី២១កក្កដាម្សិលមិញ។

Neymar ដួលក្នុងពេលប្រកួតជាមួយស្វីស នៅវគ្គចែកពូល World Cup 2018

Neymar បានបញ្ជាក់ថា ការបរាជ័យនេះ គឺធ្វើឱ្យរូបគេពិតជាពិបាកចិត្តខ្លាំងណាស់ ប៉ុន្តែទុក្ខព្រួយនេះ បានកន្លងទៅហើយ។ «**ខ្ញុំមានកូន គ្រួសារ មិត្តភក្តិ ហើយពួកគេ មិនចង់ឃើញខ្ញុំកើតទុក្ខនោះទេ។ ខ្ញុំមានហេតុផលជាច្រើន ដើម្បីឱ្យមានភាពសប្បាយរីករាយ ជាងកើតទុក្ខ**»។

ខ្សែប្រយុទ្ធដែលមានតម្លៃថ្លៃបំផុតរបស់ក្លឹបបារាំង PSG រូបនេះ បានលើកឡើងថា ខ្លួនមានបន្ទុក និងទំនួលខុសត្រូវ ចំពោះក្រុមជម្រើសជាតិ និងក្លឹប ហើយរូបគេក៏បានត្រៀមខ្លួនក្នុងការដោះស្រាយជាមួយនឹងសម្ពាធទាំងនោះ និងការរិះគន់នានាផងដែរ នៅពេលដែលទទួលបានលទ្ធផលមិនល្អ។

សូមរំលឹកថា ក្រុមប្រេស៊ីល បានប្រកួតចាញ់បែលហ្សិក ដោយលទ្ធផល ១-២ នៅក្នុងវគ្គ៨ក្រុមចុងក្រោយ នៃ World Cup 2018 នៅប្រទេសរុស្ស៊ី។ ៥ប្រកួតរបស់ប្រេស៊ីល ក្នុងព្រឹត្តិការណ៍នេះ គឺស៊ុតបញ្ចូលទីគូប្រកួតបានចំនួន ៨គ្រាប់ ក្នុងនោះ Neymar រកបានចំនួន ២គ្រាប់តែប៉ុណ្ណោះ៕