លោក រ៉ុង ឈុន បដិសេធរឿងដឹកនាំធ្វើមហាបាតុកម្មប្រឆាំងនឹងការបោះឆ្នោត

2018-07-22 04:23:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក រ៉ុង ឈុន ទីប្រឹក្សាសមាគមគ្រូបង្រៀនកម្ពុជាឯករាជ្យ បានច្រានចោលចំពោះព័ត៌មានដែលថា លោកមានគម្រោងនឹងដឹកនាំកម្មករ កម្មការិនី គ្រូបង្រៀន ធ្វើមហាបាតុកម្មប្រឆាំងទៅនឹងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។

លោក រ៉ុង ឈុន ក្នុងពិធីជួបជុំ១ នៅរាជធានីភ្នំពេញ ក្រោយពេលលាលែងពីសមាជិក គ.ជ.ប

លោក រ៉ុង ឈុន បានថ្លែងប្រាប់ [ខ្លីៗ] កាលពីរសៀលថ្ងៃទី២១កក្កដាថា លោកមិនមានគម្រោងដឹកនាំធ្វើមហាបាតុកម្មនេះទេ ពីព្រោះការបោះឆ្នោត នឹងប្រព្រឹត្តទៅដោយរលូន ហើយមិនមានគណបក្សប្រឆាំងចូលរួមឡើយ។

អតីតសមាជិកគណៈកម្មាធិការជាតិរៀបចំការបោះឆ្នោត រូបនេះ បានបន្តថា នៅក្នុងការបោះឆ្នោតខាងមុខនេះ គឺមិនមានការតវ៉ាទាមទារអ្វីនោះទេ ហើយអ្វីដែលលេចឮអំពីបាតុកម្មនោះ គឺគ្រាន់តែជាពាក្យចចាមអារាមតែប៉ុណ្ណោះ ពីព្រោះបើលោកធ្វើ គឺត្រូវជូនដំណឹងទៅអាជ្ញាធរ។

ចំណែកលោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ក៏បានថ្លែងប្រាប់ [ខ្លីៗ] កាលពីម្សិលមិញនេះដែរថា ការបោះឆ្នោតជ្រើសតាំងតំណាងរាស្ត្រ គឺធ្វើទៅតាមរដ្ឋធម្មនុញ្ញ ដែលមានរយៈពេល៥ឆ្នាំម្តង។ លោកថា ប្រសិនបើប្រឆាំងទៅនឹងការបោះឆ្នោត បានន័យថា ប្រឆាំងទៅនឹងរដ្ឋធម្មនុញ្ញដូច្នោះដែរ។

លោកបន្ថែមថា ក្នុងករណីមានភស្តុតាងក្នុងការរារាំងប្រជាពលរដ្ឋ មិនឱ្យទៅបោះឆ្នោត គឹនឹងត្រូវអនុវត្តតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ៕