រដ្ឋមន្រ្តីបារាំង៖ ឥឡូវ សង្គ្រាមពាណិជ្ជកម្ម កើតឡើងយ៉ាងពិតប្រាកដហើយ
- 2018-07-22 07:48:06
- ចំនួនមតិ 0 | ចំនួនចែករំលែក 0
រដ្ឋមន្រ្តីបារាំង៖ ឥឡូវ សង្គ្រាមពាណិជ្ជកម្ម កើតឡើងយ៉ាងពិតប្រាកដហើយ
ចន្លោះមិនឃើញ
លោក Bruno Le Maire រដ្ឋមន្រ្តីហិរញ្ញវត្ថុបារាំង បាននិយាយថា ឥឡូវនេះ សង្គ្រាមពាណិជ្ជកម្មមួយ បាននឹងកំពុងកើតឡើងយ៉ាងពិតប្រាកដហើយ។ លោកថ្លែងដូច្នេះ ក្នុងពេលដែលរដ្ឋមន្រ្តីនៃប្រទេស G20 កំពុងជួបប្រជុំគ្នានៅក្រុង Buenos Aires ប្រទេសអាហ្សង់ទីន។ នេះបើតាមការចុះផ្សាយរបស់ BBC នៅថ្ងៃទី២២កក្កដានេះ។
លោករដ្ឋមន្រ្តីបារាំងបន្ថែមថា សហភាពអឺរ៉ុប មិនអាចពិចារណាលើការចរចាអំពីកិច្ចព្រមព្រៀងពាណិជ្ជកម្មសេរីណាមួយ ជាមួយអាមេរិកបានឡើយ ប្រសិនបើអាមេរិក មិនដកការដំឡើងពន្ធលើការនាំចូលដែកថែប និងអាលុយមីញ៉ូមទេនោះ។
សូមបញ្ជាក់ដែរថា លោក Steven Mnuchin រដ្ឋមន្រ្តីក្រសួងរតនាគារអាមេរិក បានថ្លែងក្នុងពិធីបើកកិច្ចប្រជុំកំពូលរដ្ឋមន្រ្តី G7 កាលពីម្សិលមិញនេះ ដោយបានការពារគោលនយោបាយដំឡើងពន្ធរបស់អាមេរិក និងបានជំរុញឱ្យសហភាពអឺរ៉ុប និងចិន គោរពការធ្វើពាណិជ្ជកម្មគ្នាទៅវិញទៅមក ពោលគឺបើកទីផ្សាររបស់ខ្លួន ដើម្បីអនុញ្ញាតឱ្យមានការប្រកួតប្រជែងដោយសេរី និងយុត្តិធម៌។
លោកបន្តថា បើសហភាពអឺរ៉ុប ជឿជាក់លើពាណិជ្ជកម្មសេរី នោះអាមេរិកនឹងត្រៀមខ្លួនចុះកិច្ចព្រមព្រៀងពាណិជ្ជកម្មសេរី ដោយគ្មានការកំណត់ពន្ធគយ គ្មានរនាំងពាណិជ្ជកម្មមិនមែនពន្ធគយ និងគ្មានការឧបត្ថម្ភធនណាមួយឡើយ។
ចំណែកការគំរាមថ្មីៗនេះ របស់លោកប្រធានាធិបតីអាមេរិក ដូណាល់ ត្រាំ ក្នុងការដំឡើងពន្ធនាំចូលលើទំនិញទាំងអស់របស់ចិន ដែលមានតម្លៃជាង ៥០០ពាន់លានដុល្លារនោះ លោក Steven Mnuchin ក៏បានបញ្ជាក់អះអាងដែរថា នឹងអាចធ្វើឡើងយ៉ាងពិតប្រាកដ៕
អត្ថបទទាក់ទង៖ លោក ដូណាល់ ត្រាំ គំរាមដំឡើងពន្ធលើទំនិញទាំងអស់របស់ចិន