ព្រឹត្តិការណ៍នយោបាយជាតិ-អន្តរជាតិ សំខាន់ៗប្រចាំសប្តាហ៍
- 2018-07-22 09:09:36
- ចំនួនមតិ 0 | ចំនួនចែករំលែក 0
ព្រឹត្តិការណ៍នយោបាយជាតិ-អន្តរជាតិ សំខាន់ៗប្រចាំសប្តាហ៍
ចន្លោះមិនឃើញ
[ខ្លីៗ] សូមលើកយកនូវព្រឹត្តិការណ៍នយោបាយជាតិ និងអន្តរជាតិសំខាន់ៗដែលកើតមានឡើងក្នុង១សប្តាហ៍កន្លងមកនេះ មកបង្ហាញជូនដូចខាងក្រោម៖
ព្រឹត្តិការណ៍នយោបាយជាតិ
១. តុលាការ ចេញដីកាបង្គាប់ឱ្យលោក សម រង្ស៊ី ចូលបំភ្លឺរឿង "សន្យាកាត់ដីឱ្យបរទេស"
លោក សម រង្ស៊ី អតីប្រធាននៃអតីតគណបក្សសង្គ្រោះជាតិ ត្រូវបានសាលាដំបូងរាជធានីភ្នំពេញ កោះហៅឱ្យចូលឆ្លើយបំភ្លឺអំពីសំណុំរឿង "ប៉ុនប៉ងប្រគល់ឱ្យបរទេសនូវដែនដីជាតិមួយផ្នែក" នៅថ្ងៃទី១៣ ខែសីហា ឆ្នាំ២០១៨។ ដីកាកោះហៅនេះ ត្រូវបានប៉ូលិស យកទៅបិទនៅអតីតទីស្នាក់ការកណ្តាលអតីតគណបក្សសង្គ្រោះជាតិ នាព្រឹកថ្ងៃទី១៦ ខែកក្កដា ឆ្នាំ២០១៨។
២. គ.ជ.ប ធ្វើតេស្តទឹកថ្នាំជ្រលក់ដៃ បង្ហាញដល់ភាគីពាក់ព័ន្ធ
គណៈកម្មាធិការជាតិរៀបចំការបោះឆ្នោត (គ.ជ.ប) បានធ្វើការបង្ហាញទឹកខ្មៅជ្រលក់ដៃសម្រាប់បម្រើដល់ការបោះឆ្នោតជ្រើសតាំងតំណាងរាស្ត្រ កាលពីព្រឹកថ្ងៃទី១៧ ខែកក្កដា ឆ្នាំ២០១៨ ដល់តំណាងគណបក្សនយោបាយ និងអង្គការសមាគមជាតិ និងអន្តរជាតិ រួមទាំងភាគីពាក់ព័ន្ធនៅសាលសន្និសីទសារព័ត៌មាន គ.ជ.ប។ អ្នកចូលរួមសាកល្បងមានចំនួន ១២នាក់ ដោយពួកគេមិនអាចលាងជ្រះឡើយ បន្ទាប់ពីជ្រលក់។
៣. LDP ធ្វើសន្និសីទសារព័ត៌មាន ស្តីពីគោលជំហររបស់ខ្លួនក្នុងការបោះឆ្នោតនាពេលខាងមុខ
គណបក្សសម្ព័ន្ធដើម្បីប្រជាធិបតេយ្យ (LDP) បានធ្វើសន្និសីទសារព័ត៌មាន កាលពីថ្ងៃទី១៩ ខែកក្កដា ឆ្នាំ២០១៨ នៅវិមានពិភពថ្មីសែនសុខ ដោយក្នុងនោះ គណបក្សបានផ្តោតទៅលើការប្រកាន់ជំហរ និងទាមទារឱ្យមានការកំណត់យកសន្លឹកឆ្នោតដែលគូសសញ្ញា "ធីក" ឬសញ្ញាប្រហាក់ប្រហែល នៅក្នុងប្រអប់រាងបួនជ្រុងទ្រវែង "តូច"។ ក្រៅពីធ្វើសន្និសីទសារព័ត៌មាន គណបក្សសម្ព័ន្ធដើម្បីប្រជាធិបតេយ្យ ក៏បានផ្ញើលិខិតជូនសម្ដេច ហេង សំរិន ប្រធានរដ្ឋសភា ដើម្បីស្នើរដ្ឋសភា ពិនិត្យ និងកែតម្រូវលើបញ្ហាគូសសញ្ញាគាំទ្រលើសន្លឹកឆ្នោតផងដែរ។
៤. គណបក្សប្រជាធិបតេយ្យមូលដ្ឋាន រក្សាគោលជំហរចូលរួមការបោះឆ្នោតដដែល
គណបក្សប្រជាធិបតេយ្យមូលដ្ឋាន នៅតែរក្សាគោលជំហររបស់ខ្លួនក្នុងការចូលរួមបោះឆ្នោតជ្រើសតាំងតំណាងរាស្រ្តនាពេលខាងមុខនេះ ដោយសារតែមានការលើកទឹកចិត្ត និងការគាំទ្រពីប្រជាពលរដ្ឋ។ នេះបើតាមការប្រកាសរបស់លោក យ៉ង់ សាំងកុមារ បេក្ខជននាយករដ្ឋមន្ត្រីរបស់គណបក្សប្រជាធិបតេយ្យមូលដ្ឋាន កាលពីព្រឹកថ្ងៃទី២២កក្កដា ឆ្នាំ២០១៨ ក្នុងយុទ្ធនាការឃោសនាបោះឆ្នោត នៅកំបូល។
ព្រឹត្តិការណ៍នយោបាយអន្តរជាតិ
១. ជំនួបកំពូលរវាងមេដឹកនាំអាមេរិក និងរុស្ស៊ី បានធ្វើឡើងនៅប្រទេសហ្វាំងឡង់
ប្រធានាធិបតីអាមេរិក និងរុស្ស៊ី គឺលោក ដូណាល់ ត្រាំ និងលោក វ្លាឌីមៀ ពូទី បានជួបប្រជុំគ្នានៅក្រុង Helsinki កាលពីថ្ងៃទី១៦ ខែកក្កដា ឆ្នាំ២០១៨។ ជំនួបកំពូលនេះ បានផ្តោតទៅលើ៖ ការលូកលាន់ការបោះឆ្នោត ការទូត និងការប្រកួតបាល់ទាត់ពិភពលោក។
២. ចិនធ្វើសមយុទ្ធ ដើម្បីបង្ហាញសមត្ថភាពថា ខ្លួនអាចយកតៃវ៉ាន់ មកគ្រប់គ្រងវិញបាន
ប្រទេសចិន បានធ្វើសមយុទ្ធកងទ័ពរំដោះប្រជាជន រយៈពេល៥ថ្ងៃពីថ្ងៃទី១៨ ដល់ ២៣កក្កដា ដើម្បីបង្អួតពីសមត្ថភាពខ្លួនក្នុងការប្ដេជ្ញាចិត្តយកកោះតៃវ៉ាន់មកវិញ។ សមយុទ្ធនេះធ្វើឡើងនៅលើដែនទឹក ដែលមានទំហំប៉ុននឹងកោះតៃវ៉ាន់ ពោលគឺចាប់ពីទីក្រុង Zhoushan ទៅក្រុង Wenzhou។
៣. អតីតប្រធានាធិបតីកូរ៉េខាងត្បូង ត្រូវតុលាការកាត់ទោសឱ្យជាប់ពន្ធនាគារ ៨ឆ្នាំបន្ថែមទៀត
កាលពីថ្ងៃទី២០កក្កដា ២០១៨ តុលាការកូរ៉េខាងត្បូង បានកាត់ទោសលោកស្រី Park Geun-hye ឱ្យជាប់ពន្ធនាគារ ៨ឆ្នាំបន្ថែមទៀត ក្រោយពេលរកឃើញថា លោកស្រីបានធ្វើឲ្យបាត់ប្រាក់រដ្ឋាភិបាលប្រមាណ ២៦លានដុល្លារ និងលូកលាន់ការបោះឆ្នោតជ្រើសតាំងសមាជិកសភាឆ្នាំ២០១៦។