វៀតណាម ផ្អាកការងាររដ្ឋមន្ត្រីព័ត៌មាន ពាក់ព័ន្ធនឹងរឿងអាស្រូវក្រុមហ៊ុន១

2018-07-23 08:58:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម នៅថ្ងៃទី២៣ ខែកក្កដា ឆ្នាំ២០១៨នេះ បានផ្អាកការងាររដ្ឋមន្ត្រីព័ត៌មាននិងទំនាក់ទំនង លោក Truong Minh Tuan ដែលត្រូវបានចោទពីការគ្រប់គ្រងក្រុមហ៊ុនទូរសព្ទចល័តរដ្ឋ មួយមិនបានល្អ។

លោក Tran Dai Quang ប្រធានាធិបតីវៀតណាម បានយល់ស្របចំពោះការផ្អាកនេះ តាមការសម្រេចរបស់គណៈកម្មាធិការត្រួតពិនិត្យបក្សកុម្មុយនិស្តវៀតណាម។ គណៈកម្មាធិការនេះ បានចោទរដ្ឋមន្ត្រីព័ត៌មានវៀតណាម ថាខ្វះទំនួលខុសត្រូវ និងគ្រប់គ្រងលើការលក់ភាគហ៊ុនមិនបានត្រឹមត្រូវរវាងក្រុមហ៊ុន Audio Visual Global JSC (AVG) និង Mobifone ដែលស្ថិតក្រោមការត្រួតពិនិត្យដោយផ្ទាល់របស់ក្រសួងព័ត៌មាន។

ជុំវិញបញ្ហានេះ គណៈកម្មាធិការត្រួតពិនិត្យបក្សកុម្មុយនិស្តវៀតណាម បានរកឃើញថា ក្រុមហ៊ុន MobiFone បានចំណាយលើសលប់ ដើម្បីទិញភាគហ៊ុន ៩៥% ក្នុងទឹកប្រាក់ ៨,៩ទ្រីលានដុង (ជាង ៣៨៦លានដុល្លារអាមេរិក) ពីស្ថានីយទូរទស្សន៍ AVG កាលពីឆ្នាំ២០១៥។

លោក Tuan មិនបានលើកទូរសព្ទ ឬតបសារ នោះទេនៅថ្ងៃចន្ទនេះ។

លោក Truong Minh Tuan រដ្ឋមន្ត្រីព័ត៌មានវៀតណាម ក្នុងសន្និសីទសារព័ត៌មានមួយ នៅក្រុងហាណូយ កាលពីថ្ងៃទី៣០ ខែមិថុនា ឆ្នាំ២០១៦ (រូបថត៖ Reuters)

សូមជម្រាបថា នៅដើមខែកក្កដានេះ ប៉ូលិសបានចាប់ខ្លួនអតីតប្រធានក្រុមហ៊ុន MobiFone Corp និងមន្ត្រីជាន់ខ្ពស់របស់ក្រសួងព័ត៌មាន និងទំនាក់ទំនង វៀតណាមម្នាក់ ពាក់ព័ន្ធនឹងការគ្រប់គ្រងសេដ្ឋកិច្ចមិនបានត្រឹមត្រូវ៕

ប្រភព៖ Reuters ប្រែសម្រួល៖ លាភ.