បាល់ដែល ពូទីន ឲ្យ ត្រាំ មានបង្កប់បន្ទះឈីប អាចបញ្ជូនទិន្នន័យទៅទូរសព្ទ

2018-07-26 04:20:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយជំនួបកំពូលកាលពីថ្ងៃទី១៦ ខែកក្កដា ឆ្នាំ២០១៨ លោក វ៉្លាឌឺមៀ ពូទីន ប្រធានាធិបតីរុស្ស៊ី បានជូនកាដូជាបាល់ World Cup មួយទៅឲ្យលោក ដូណាល់ ត្រាំ ប្រធានាធិបតីអាមេរិក។ ក្រោយការជូននេះ មនុស្សមួយចំនួនយល់ឃើញថា បាល់នេះអាចមានបង្កប់ឧបករណ៍ស៊ើបការណ៍របស់រុស្ស៊ី។

ពាក់ព័ន្ធនឹងបញ្ហានេះ លោក Lindsey Graham សមាជិកព្រឹទ្ធសភាគណបក្សសាធារណរដ្ឋ នៃរដ្ឋ South Carolina បានបង្ហោះសារនៅលើ Twitter កាលពីពេលថ្មីៗថា លោកបានឆែកឆេរបាល់នោះហើយ ដើម្បីរកមើលឧបករណ៍លួចស្ដាប់សំឡេង ព្រោះអាមេរិកនឹងមិនអនុញ្ញាតឲ្យមានឧបករណ៍ប្រភេទនេះចូលសេតវិមានបាននោះទេ។

លោក Lindsey បានបញ្ជាក់ថា នៅក្នុងបាល់ដែលមេដឹកនាំរុស្ស៊ីឲ្យមកលោក ដូណាល់ ត្រាំ មានបន្ទះឈីប ដែលបំពាក់អង់តែនតូចមួយ ហើយអាចបញ្ជូនទិន្នន័យទៅកាន់ទូរសព្ទដៃបាន។

យ៉ាងណាមិញ វាមិនមែនជាបន្ទះឈីប ដែលប្រើសម្រាប់ស៊ើបការណ៍ឡើយ តែវាជាទម្រង់ផ្សព្វផ្សាយមួយរបស់ក្រុមហ៊ុន Adidas AG។ បន្ទះឈីបប្រភេទ NFC នេះ ត្រូវបានដាក់បង្កប់នៅខាងក្រោមនិមិត្តសញ្ញារបស់បាល់ ហើយមានរូបរាងស្រដៀងទៅនឹងស្លាកសញ្ញា Wi-Fi។

យោងតាមវិបសាយ Adidas បានឲ្យដឹងថា បន្ទះឈីបនៅលើបាល់ អាចអនុញ្ញាតឲ្យអ្នកគាំទ្ររបស់ខ្លួនមើលវីដេអូកីឡាករ ការប្រកួត និងរឿងដែលពាក់ព័ន្ធនឹងបាល់ទាត់ ដោយគ្រាន់តែយកស្មាតហ្វូនទៅដាក់នៅជិតបាល់។ បាល់ដែលទើបចេញសម្រាប់ FIFA World Cup 2018 នេះ ត្រូវបានលក់នៅលើវិបសាយ Adidas ក្នុងតម្លៃ ១៦៥ដុល្លារ។

បើទោះជាយ៉ាងនេះក្ដី Adida បានបដិសេធមិនធ្វើការបកស្រាយថា បន្ទះឈីបនេះអាចត្រូវរុស្ស៊ី Hack បាន ឬលួចប្ដូរ ដើម្បីយកទៅប្រើប្រាស់ក្នុងផ្លូវផ្សេងនោះទេ។

ទាក់ទិននឹងរឿងប្រគល់កាដូបាល់នេះដែរ លោក Sarah Sanders លេខាធិការសារព័ត៌មានសេតវិមាន បានប្រាប់ថា ដំណើរការស្កេនមើលប្រព័ន្ធសុវត្ថិភាពនៅលើបាល់បានបញ្ចប់រួចរាល់ហើយ។ ប៉ុន្តែខាងសេតវិមាននឹងមិនបញ្ជាក់ប្រាប់ពីដំណើរការសុវត្ថិភាពនេះយ៉ាងណាតទៅទៀតឡើយ៕

ប្រភព៖ Sydney Morning Herald ប្រែសម្រួល៖ ឈាង.