ភាគហ៊ុនរបស់ក្រុមហ៊ុន Facebook ដាំក្បាលចុះជាប្រវត្តិសាស្ត្រដែលមិនធ្លាប់មាននៅអាមេរិក

2018-07-27 04:55:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តម្លៃភាគហ៊ុនរបស់ Facebook បានធ្លាក់ចុះចំនួន ២០% កាលពីថ្ងៃទី២៦ ខែកក្កដា ឆ្នាំ២០១៨ ម្សិលមិញ ដែលគិតជាទំហំទឹកប្រាក់ស្មើនឹង ១២៤ពាន់លានដុល្លារ នៅក្នុងទីផ្សារមូលបត្រ។

(ប្រភពរូប៖ Geek Reply)

សារព័ត៌មាន Bloomberg បានឲ្យដឹងថា វាគឺជាការធ្លាក់ចុះធំបំផុត ក្នុងរយៈពេលត្រឹមតែ១ថ្ងៃ ដែលមិនធ្លាប់មានសម្រាប់ក្រុមហ៊ុននៅសហរដ្ឋអាមេរិក។

វិបសាយ Yahoo Finance បានចុះផ្សាយថា មុនថ្ងៃធ្លាក់ចុះ តម្លៃក្នុង១ភាគហ៊ុន ស្មើនឹង ២១៧,៥០ដុល្លារ ប៉ុន្តែបានធ្លាក់ចុះមកនៅត្រឹម ១៧៤,៨៩ដុល្លារ។ តម្លៃភាគហ៊ុនសរុបនៅ Facebook នាពេលបច្ចុប្បន្ន មានចំនួន ៥០៦,២ពាន់លានដុល្លារ ដោយបានធ្លាក់ចុះពី ៦២៩,៦ពាន់លានដុល្លារ។

ការធ្លាក់ចុះនេះបណ្ដាលមកពីការថយចុះ នៃចំនួនអ្នកប្រើប្រាស់ Facebook សកម្មប្រចាំថ្ងៃ ខុសពីត្រីមាសមុនៗ។ ការណ៍នេះគឺពាក់ព័ន្ធនឹងប្រតិកម្មប្រឆាំងការសាយភាយនៃព័ត៌មានក្លែងក្លាយ និងរឿងអាស្រូវបែកធ្លាយទិន្នន័យអ្នកប្រើប្រាស់កាលពីពេលថ្មីៗកន្លងទៅ។

សូមរំលឹកផងដែរថា មុនការធ្លាក់ចុះតម្លៃភាគហ៊ុន របស់ក្រុមហ៊ុន Facebook ដ៏ច្រើនបែបនេះ ក៏ធ្លាប់មានដែរ ក្រុមហ៊ុន Intel Corp. ដែលបាត់បង់តម្លៃភាគហ៊ុនប្រមាណ ៩១ពាន់លានដុល្លារ ក្នុងរយៈពេលត្រឹមតែ១ថ្ងៃ កាលពីខែកញ្ញា ឆ្នាំ២០០០ កន្លងទៅ៕

ប្រភព៖ Yahoo | Techcrunch | Bloomberg ប្រែសម្រួល៖ ឈាង.