ជំនួបរដ្ឋមន្ត្រីការបរទេសអាស៊ាន ផ្តោតសំខាន់លើប្រធានបទក្តៅ ២

2018-08-02 09:18:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្ត្រីការបរទេសរបស់បណ្ដាប្រទេសក្នុងតំបន់អាស៊ាន បានចាប់ផ្តើមកិច្ចប្រជុំ នៅថ្ងៃទី០២ សីហានេះ នាប្រទេសសិង្ហបុរី ដែលផ្ដោតសំខាន់លើប្រធាន ២ ក្នុងនោះមាន កម្មវិធីអាវុធនុយក្លេអ៊ែរកូរ៉េខាងជើង និងជម្លោះសមុទ្រចិនខាងត្បូង។

ជំនួបប្រចាំឆ្នាំនេះ ធ្វើឡើង ខណៈដែលភាពតានតឹងនៅក្នុងឧបទ្វីបកូរ៉េ បានថមថយ គិតចាប់ពីជំនួបកំពូលជាប្រវត្តិសាស្ត្ររវាងលោកប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង លោក គីម ជុងអ៊ុន កាលពីថ្ងៃទី ១២ មិថុនាកន្លងទៅ នាប្រទេសសិង្ហបុរី។

កម្មវិធីអាវុធនុយក្លេអ៊ែរកូរ៉េខាងជើង

លោក ដូណាល់ ត្រាំ បានចុះកិច្ចព្រមព្រៀងស្តីពីការរំសាយអាវុធនុយក្លេអ៊ែរ ជាមួយលោក គីម ជុងអ៊ុន កាលពីថ្ងៃទី ១២ មិថុនាកន្លងមក។ រូបថត៖ Reuters

យោងតាមសេចក្តីព្រាងនៃសេចក្ដីថ្លែងការណ៍រួមដែលបានចេញ ក្រោយពីបញ្ចប់កិច្ចប្រជុំនៅថ្ងៃព្រហស្បតិ៍នេះ រដ្ឋមន្ត្រីការបរទេសអាស៊ាន នឹងស្វាគមន៍ចំពោះស្មារតីរបស់មេដឹកនាំកូរ៉េខាងជើង ក្នុងការរំសាយអាវុធនុយក្លេអ៊ែរ ដែលបានចុះហត្ថលេខាជាមួយលោក ដូណាល់ ត្រាំ នៅក្នុងកិច្ចប្រជុំកំពូលកាលខែមិថុនាកន្លងទៅ នាប្រទេសសិង្ហបុរី។

ទន្ទឹមនឹងនេះ រដ្ឋមន្ត្រីអាស៊ាន ក៏នឹងបង្ហាញនូវការគាំទ្ររបស់អាស៊ាន ក្នុងការសម្រេចឲ្យបាននូវការរំសាយអាវុធនុយក្លេអ៊ែរនៅឧបទ្វីបកូរ៉េ ដែលមានភាពពេញលេញ និងផ្ទៀងផ្ទាត់ជាក់លាក់ផងដែរ។

ជម្លោះសមុទ្រចិនខាងត្បូង

ផែនទីនៃសមុទ្រចិនខាងត្បូង ដែលបណ្តាប្រទេសក្នុងជម្លោះ ទាមទារ។ រូបភាព៖ CNN

ងាកមកមើលជម្លោះនៅសមុទ្រចិនខាងត្បូងវិញ ក្រុមរដ្ឋមន្ត្រីអាស៊ាន នឹងសង្កត់ធ្ងន់ពីសារៈសំខាន់នៃ «ការអត់ធ្មត់ផ្ទាល់ខ្លួន (self-restraint) និងការគ្មានយោធូបនីយកម្ម(non-militarization)» ក្នុងតំបន់នេះ។

ជាមួយគ្នានេះដែរ ក្រុមរដ្ឋមន្ត្រីទាំងអស់ ក៏នឹងស្វាគមន៍នូវដំណើរការនៃការចរចារវាងប្រទេសអាស៊ានទាំង១០ ជាមួយចិន ដើម្បីឆ្ពោះទៅរកការសម្រេចបឋមនៃប្រសិទ្ធភាពរបស់ក្រមប្រតិបត្តិសមុទ្រចិនខាងត្បូង(COC) លើអ្វីដែលពួកគេ បានយល់ព្រម កាលពីពេលកន្លងមក។

បញ្ហាអ្វីទៀត ត្រូវបានដាក់នៅលើតុនៃកិច្ចប្រជុំប្រចាំឆ្នាំនេះ?

ក្រៅពីបញ្ហានុយក្លេអ៊ែរកូរ៉េខាងជើង និងជម្លោះសមុទ្រចិនខាងត្បូង ក្រុមរដ្ឋមន្ត្រីការបរទេសអាស៊ាន ក៏នឹងពិភាក្សាអំពីបញ្ហាមួយចំនួនទៀតផងដែរ ក្នុងនោះរួមមាន ការទប់ស្កាត់អំពើភេរវកម្ម វិបត្តិរ៉ូហ៊ីងយ៉ា បញ្ហាសិទ្ធមនុស្ស និងសមាហរណកម្មសេដ្ឋកិច្ច ជាពិសេស ភាពជាដៃគូសេដ្ឋកិច្ចគ្រប់ជ្រុងជ្រាយប្រចាំតំបន់ (RCEP)។ RCEP គឺជាគំនិតផ្ដួចផ្ដើមពាណិជ្ជកម្មសេរី ដែលមានសមាជិក១៦ប្រទេស ក្នុងនោះមានអាស៊ានទាំង១០ បូករួមនឹងចិន ឥណ្ឌា អូស្ត្រាលី កូរ៉េខាងត្បូង ជប៉ុន និងនូវែលហ្សេឡង់។

ជនភៀសខ្លួនរ៉ូហ៉ីងយ៉ា។ រូបថត៖ Reuters

គួរបញ្ជាក់ថា កិច្ចប្រជុំរដ្ឋមន្ត្រីការបរទេសប្រចាំឆ្នាំនេះ កំពុងប្រព្រឹត្តិធ្វើឡើង នៅក្នុងប្រទេសសិង្ហបុរី ដែលជាប្រធានវិលជុំរបស់អាស៊ាននៅក្នុងឆ្នាំ២០១៨នេះ។ កិច្ចប្រជុំនេះដែរ នឹងត្រូវបញ្ចប់នៅថ្ងៃសៅរ៍ខាងមុខនេះហើយ៕

ប្រភព៖ Mainichi ប្រែសម្រួល៖ អឹុម ម៉េងស៊ាង