ដូណាល់ ត្រាំ ទទួលបានសំបុត្រថ្មី១ច្បាប់ពី គីម ជុងអ៊ុន

2018-08-03 00:01:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សេតវិមានអាមេរិក បានឲ្យដឹងកាលពីថ្ងៃទី២សីហាថា មេដឹកនាំកូរ៉េខាងជើងលោក គីម ជុងអ៊ុន បានផ្ញើសំបុត្រថ្មី១ច្បាប់ទៅឲ្យលោកប្រធានាធិបតី ដូណាល់ ត្រាំ។ យ៉ាងណាមិញ សំបុត្រនោះមិនត្រូវបានដាក់បង្ហាញជាសាធារណៈឡើយ។

បើតាមលោកស្រី Sarah Sanders អ្នកនាំពាក្យសេតវិមាន សំបុត្រដែលលោក គីម ផ្ញើទៅសហរដ្ឋអាមេរិកគឺនៅថ្ងៃទី១ ខែសីហា ហើយវាជាការឆ្លើយឆ្លងគ្នារវាងមេដឹកនាំទាំង២ ក្រោយពីជំនួបនៅសិង្ហបុរីកាលពីខែមិថុនាកន្លងទៅ និងដើម្បីជំរុញការសន្យាដែលបានធ្វើឡើងនៅក្នុងសេចក្ដីថ្លែងការណ៍រួមគ្នារវាងអាមេរិក-កូរ៉េខាងជើង។

ពាក់ព័ន្ធនឹងការផ្ញើសំបុត្រនេះដែរ លោក ដូណាល់ ត្រាំ មិនបានរៀបរាប់អ្វីឡើយ ក្រៅតែពីបង្ហោះពាក្យអរគុណនៅលើគណនីបណ្ដាញសង្គម Twitter ហើយនិយាយថា លោកនឹងទន្ទឹងរង់ចាំការជួបជាមួយលោក គីម ជុងអ៊ុន ជាថ្មីម្ដងទៀតនាថ្ងៃខាងមុខ។ ក្នុងសារដែលលោក ត្រាំ បង្ហោះ ក៏បានរៀបរាប់អំពីការអរគុណកូរ៉េខាងជើង ដែលគោរពតាមពាក្យសន្យាក្នុងការបញ្ជូនអដ្ឋិធាតុកងទ័ពអាមេរិកនៅសម័យសង្គ្រាមកូរ៉េឲ្យអាមេរិកវិញ កាលពីថ្ងៃទី២៧ ខែកក្កដា ឆ្នាំ២០១៨៕

ប្រភព៖ Channelnewsasia ប្រែសម្រួល៖ ឈាង.