គណបក្ស​ខ្មែរ​ក្រោក​ ប្តឹង​លោក ​សុខ ទូច ទាមទារ​សំណង​​ជំងឺ​ចិត្ត ​១០០​លាន​រៀល​

  • 2018-08-07 12:50:18
  • ចំនួនមតិ 0 | ចំនួនចែករំលែក 0

ចន្លោះមិនឃើញ


គណបក្ស​ខ្មែរ​ក្រោក បាន​សម្រេច​ប្តឹង​លោក​ សុខ ទូច ប្រធាន​រាជបណ្ឌិត្យសភាកម្ពុជា នៅ​រសៀល​ថ្ងៃ​ទី​០៧ សីហា​នេះ ពី​បទ​ញុះញង់​​ឲ្យមាន​ការរើសអើង និង​ជ្រៀតជ្រែក​ដោយ​​ខុសច្បាប់ នៅក្នុង​ការ​បំពេញ​​មុខ​ងារ​សារ​ធា​រណៈ​។​

​លោក ព្រហ្ម ពិសិដ្ឋ ប្រធានកិត្តិយស​គណបក្ស​ខ្មែរ​ក្រោក បាន​ប្រាប់​វិទ្យុ​វាយោ​ថា ការ​ដាក់ពាក្យ​បណ្ដឹង​​ទៅ​តុលាការ​នេះ ដោយ​សារ​តែ​​លោក ​សុខ ទូច បាន​ជ្រៀតជ្រែក​លើ​កិច្ច​ការងារ​​រដ្ឋាភិបាល និង​បាន​ប្រើ​ពាក្យ​សម្តី​ញុះញង់​ដែល​នាំឲ្យ​មាន​ការរើសអើង​។ លោក​បញ្ជាក់ថា គណបក្ស​ខ្មែរ​ក្រោក បាន​ប្តឹង​ទាមទារ​​សំណង​ជម្ងឺ​ចិត្ត​ពី​លោក ​សុខ ទូច ចំនួន​ ១០០​លាន​រៀល​។​

សូម​បញ្ជាក់ថា ​គណបក្ស​ខ្មែរ​ក្រោក​បាន​ផ្ទុះ​ប្រតិកម្ម​នឹង​សម្តី លោក​ សុខ ទូច ដែល​និយាយថា គួរ​ចាប់​​មេ​ផ្តើមគំនិត​ធ្វើ​យុទ្ធ​ការប្រមូល​ស្នាម​មេដៃ​ពី​ប្រជាពលរដ្ឋ ដើម្បី​ទាមទារ​កោះត្រ​ល់ពី​វៀតណាម បញ្ចូល​គុក​។

​ជុំវិញ​បញ្ហា​នេះ លោក ​សុខ ទូច ប្រធាន​រាជបណ្ឌិត្យសភាកម្ពុជា ធ្លាប់​បាន​បញ្ជាក់ថា លោក​មិន​ចាប់អារម្មណ៍​ជាមួយ​គណបក្ស​​​នេះ​ទេ​។ ដោយឡែក ការប្តឹង​គឺជា​សិទ្ធិ​របស់​គណបក្ស ហើយ​លោក​រង់​ចាំ​ដើរ​តាម​ក្រោយ និង​ទុកឲ្យ​ច្បាប់​ជា​អ្នក​ដោះស្រាយ​តាម​នីតិវិធី​។​

លោក សុខ ទូច ប្រធានរាជបណ្ឌិត្យ​សភា​កម្ពុជា

គួររំលឹក​ថា គណបក្ស​ខ្មែរ​ក្រោក បានប្រកាសថា នឹង​ធ្វើ​យុទ្ធនាការ​ប្រមូល​ស្នាម​មេដៃ​ប្រជាពលរដ្ឋ​ចំនួន​ ៥​ម៉ឺន​នាក់ នៅ​ថ្ងៃ​ទី​០៨ ខែសីហា ឆ្នាំ​២០១៨ ដើម្បី​ដាក់​ទៅ​កាន់​ក្រុមប្រឹក្សា​ធម្មនុញ្ញ ក្នុងការ​ជម្រុញ​ឲ្យ​រដ្ឋាភិបាល​ចរចា​ទាមទារ​កោះត្រ​ល់ពី​វៀតណាម​មក​វិញ​៕

ចុចអាន​អត្ថបទ​ទាក់ទង៖ អាជ្ញាធរ​ព្រមាន​ចំពោះ​ផែនការ​ធ្វើ​យុទ្ធនាការ "ស្នាម​មេដៃមួយ​ដើម្បី​កោះ​ត្រល់" របស់​បក្ស​ខ្មែរក្រោក

ប្រភព៖ Vayo Fm ប្រែ​សម្រួល៖ សុខ សុវត្ថិ

អត្ថបទថ្មី
;