អ្នកនាំពាក្យក្រសួងសាធារណការ ថាមិនអាចពង្រីកផ្លូវជាតិលេខ៤ ឱ្យធំតាមចិត្តនោះទេ

2018-08-09 08:56:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក នូ វឌ្ឍនៈ អ្នកនាំពាក្យក្រសួងសាធារណការ និងដឹកជញ្ជូន បានប្រាប់រស្មីកម្ពុជា នៅថ្ងៃទី៩សីហានេះថា ប្រសិនបើកម្ពុជាពង្រីកផ្លូវជាតិលេខ៤ ឱ្យទៅជា ៤គន្លង (២ទៅ២មក) នោះក្រុមហ៊ុនវិនិយោគផ្លូវល្បឿនលឿន នឹងពិបាករកស៊ី ពោលគឺនឹងធ្វើឱ្យប៉ះពាល់ដល់អាជីវកម្មដឹកជញ្ជូន និងចំណូលរបស់ក្រុមហ៊ុនវិនិយោគនោះ។

លោកបាននិយាយយ៉ាងដូច្នេះថា៖ «អ៊ីចឹង! យើងមិនអាចពង្រីកផ្លូវជាតិលេខ៤ ឲ្យធំតាមចិត្តនោះទេ។ ហើយប្រហែលជាមានការស្នើសុំពីភាគីក្រុមហ៊ុនផងដែរថា គួរក្រសួងកុំពង្រីកផ្លូវជាតិលេខ៤ហួសហេតុពេក។ យើងអាចពង្រីកចាក់កៅស៊ូត្រឹមចិញ្ចើមថ្នល់បាន និងពង្រីកតំបន់ណាមានទីប្រជុំជន និងតំបន់លិចទឹកបាន»។

ផ្លូវជាតិលេខ៤ ក្នុងភូមិសាស្រ្តខេត្តកំពង់ស្ពឺ

យ៉ាងណាមិញ លោក ឈឹម ផល្លា ប្រធាននាយកដ្ឋានផ្លូវថ្នល់ នៃក្រសួងសាធារណការ បានថ្លែងថា៖ «**គ្មានលក្ខខណ្ឌរបស់ក្រុមហ៊ុនមិនឲ្យពង្រីកផ្លូវជាតិលេខ៤នោះទេ វាអាស្រ័យទៅលើសិទ្ធិរបស់យើង។ ពីព្រោះគមនាគមន៍សេដ្ឋកិច្ចដឹកជញ្ជូន គ្មានដែនកំណត់ថា មិនឲ្យយើងពង្រីកផ្លូវដឹកជញ្ជូននោះទេ។ វាជាសរសៃរឈាមសេដ្ឋកិច្ចពាក់ព័ន្ធទៅនឹងកំណើនមធ្យោបាយដឹកជញ្ជូន**»។

សូមរំលឹកថា ថ្មីៗនេះ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យក្រុមហ៊ុន Cambodian PPSHV Expressway Co., Ltd វិនិយោគលើគម្រោងផ្លូវល្បឿនលឿន ភ្នំពេញ-ខេត្តព្រះសីហនុ តាមរូបភាព សាងសង់-អាជីវកម្ម-ផ្ទេរ «BOT» ជាមួយទុនវិនិយោគប្រមាណ ១,៨៧ពាន់លានដុល្លារ។

បើតាមការលើកឡើងរបស់លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូននាពេលកន្លងមក គម្រោងផ្លូវល្បឿនលឿនដែលមានប្រវែង ១៩០គីឡូម៉ែត្រនេះ នឹងត្រូវបើកការដ្ឋានសាងសង់នៅក្នុងអំឡុងខែវិច្ឆិកា ឆ្នាំ២០១៨ខាងមុខនេះ។

រូបតំណាងផ្លូវល្បឿនលឿន

កាលពីខែមិថុនាកន្លងទៅ ធនាគារពិភពលោក បានសម្រេចផ្តល់ជំនួយហិរញ្ញប្បទានគ្មានការប្រាក់ ចំនួន ១១០លានដុល្លារ ឱ្យកម្ពុជា សម្រាប់គម្រោងជួសជុលកែលម្អផ្លូវជាតិលេខ៤ ប្រវែងជាង ២០០គីឡូម៉ែត្រ។ តាមរយៈជំនួយនេះ ផ្លូវជាតិលេខ៤ នឹងទទួលបានការបង្កើនគុណភាពឱ្យល្អជាងមុន ដោយមានការអ៊ុតកៅស៊ូថ្មីពីលើ និងការរៀបចំឡើងវិញនូវចិញ្ចើមសងខាងផ្លូវ ការដាក់លូបង្ហូរទឹក និងការធ្វើស្ពាន នៅក្នុងតំបន់ងាយលិចទឹក នៅតាមដងផ្លូវនេះ៕

អត្ថបទទាក់ទង៖

ប្រភព៖ រស្មីកម្ពុជា ប្រែសម្រួល៖ សំភី