អង្គរវត្ត ជាប់ជាសំណង់ប្រវត្តិសាស្រ្ដដ៏អស្ចារ្យបំផុតក្នុងលោក ទទួលពានពី TripAdvisor

2018-08-09 13:21:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រាសាទអង្គរវត្ត បានជាប់ចំណាត់ថ្នាក់លេខ១ ជាសំណង់ប្រវត្តិសាស្រ្ដដ៏អស្ចារ្យបំផុតលើពិភពលោក ប្រចាំឆ្នាំ២០១៨ (The Very Best of Landmarks) ពីវិបសាយទីភ្នាក់ងារប្រឹក្សាយោបល់លើការធ្វើដំណើរ TripAdvisor។

លោក ថោង ខុន រដ្ឋមន្ត្រីក្រសួងទេសចរណ៍ បានទទួលពានរង្វាន់នេះពីអ្នកស្រី Sarah Mathews នាយកភ្នាក់ងារប្រឹក្សាយោបល់លើការធ្វើដំណើរ (TripAdvisor) នារសៀលថ្ងៃទី៩ ខែសីហា ឆ្នាំ២០១៨ នេះ នៅមុខប្រាសាទអង្គរវត្ត។

នៅក្នុងពិធីទទួលពានរង្វាន់នោះ លោក ថោង ខុន បានថ្លែងអំណរគុណចំពោះ TripAdvisor ដែលតែងតែជួយផ្សព្វផ្សាយគោលដៅទេសចរណ៍កម្ពុជា តាមរយៈការស្ទង់មតិលើចំណាប់អារម្មណ៍ និងទស្សនៈរបស់ភ្ញៀវទេសចររាប់លាននាក់ជុំវិញពិភពលោក។ លោកបានបន្តថា ជយលាភីសម្រាប់អង្គវត្ត គឺជាមោទនភាពដ៏មានអត្តន័យវិសេសវិសាលថ្មីមួយបន្ថែមទៀត សម្រាប់ប្រជាពលរដ្ឋកម្ពុជាទាំងមូល និងរាជរដ្ឋាភិបាលកម្ពុជា។

លោក ថោង ខុន ទទួលពានរង្វាន់ពីអ្នកស្រី Sarah Mathews

លោករដ្ឋមន្រ្ដី ក៏បានបញ្ជាក់ដែរថា កម្ពុជាក៏ធ្លាប់ទទួលបានពានរង្វាន់លេខ១ ពី TripAdvisor ជាគោលដៅទេសចរណ៍វប្បធម៌ដ៏ទាក់ទាញបំផុតលើពិភពលោក កាលពីឆ្នាំ២០១៥ និងឆ្នាំ២០១៧ ប្រាសាទអង្គរវត្ត ក៏បានជាប់ជាសំណង់ប្រវត្តិសាស្រ្ដដ៏អស្ចារ្យបំផុតលើពិភពលោកដូចឆ្នាំ២០១៨ នេះផងដែរ។

សូមបញ្ជាក់ថា នេះជាឆ្នាំទី៥ ហើយ ដែលប្រាសាទអង្គរវត្ត ត្រូវបានភ្ញៀវទេសចរទូទាំងពិភពលោក បោះឆ្នោតគាំទ្រថាជាសំណង់ប្រាសាទដ៏អស្ចារ្យបំផុតក្នុងលោក។ ក្រៅពីជាប់នៅលើ Trip Advisor ប្រាសាទអង្គរវត្ត ក៏ជាប់ចំណាត់ថ្នាក់កំពូលនៅវិបសាយល្បីៗផ្សេងទៀតផងដែរ ចាប់តាំងពីឆ្នាំ ២០១៤ មក ដូចជានៅលើវិបសាយ Archeao Madness និង Lonely Planet ជាដើម៕