និមិត្តសញ្ញាខេត្តកំពង់ធំ នឹងត្រូវដាក់ស្នើសុំការសម្រេចពីក្រសួងមហាផ្ទៃ
- 2018-08-10 09:26:45
- ចំនួនមតិ 0 | ចំនួនចែករំលែក 0
និមិត្តសញ្ញាខេត្តកំពង់ធំ នឹងត្រូវដាក់ស្នើសុំការសម្រេចពីក្រសួងមហាផ្ទៃ
ចន្លោះមិនឃើញ
លោក សុខ លូ អភិបាលខេត្តកំពង់ធំ បានឱ្យដឹងថា និមិត្តសញ្ញាខេត្តកំពង់ធំ នឹងត្រូវដាក់សុំការសម្រេចពីក្រសួងមហាផ្ទៃ ដើម្បីអាចយកមកប្រើប្រាស់លើលិខិតរដ្ឋបាលផ្លូវការបាន។ និមិត្តសញ្ញានេះ បានទទួលការអនុម័តជាឯកឆន្ទក្នុងកិច្ចប្រជុំសាមញ្ញលើកទី៥១ របស់ក្រុមប្រឹក្សាខេត្តកំពង់ធំ កាលពីថ្ងៃទី៩សីហាម្សិលមិញនេះ។
១. រូបប្រាសាទយាយព័ន្ធ តួប៉មកណ្តាល (ក្រុមខាងត្បូងនៃតំបន់ប្រាសាទសំបូរព្រៃគុក)៖ តំណាងឲ្យភាពរុងរឿងនៃស្ថាបត្យកម្មខ្មែរ នាសតវត្សរ៍ទី៧ ដែលមាននៅក្នុងតំបន់ប្រាសាទសំបូរព្រៃគុក នាទឹកដីខេត្តកំពង់ធំ ហើយតំណាងឲ្យជំនឿរបស់ខ្មែរបុរាណក្នុងការគោរពព្រហ្មញ្ញសាសនា។
២. រូបបដិមាតោ (មកពីប្រាសាទតោនៃតំបន់ប្រាសាទសំបូរព្រៃគុក)៖ តំណាងឲ្យភាពអស្ចារ្យ នៃសិល្បៈខ្មែរនាចុងសម័យចេនឡាក្នុងតំបន់ប្រាសាទសំបូរព្រៃគុក និងតំណាងឲ្យអំណាច អនុភាពខ្លាំងក្លា ដើម្បីការពារសភាវៈអាក្រក់ទាំងពួង ត្បិតតោជាស្តេចនៃសត្វចតុបាទ។
៣. រូបដំរីជាន់ខ្លា៖ រូបសំណាកតំណាងឲ្យខេត្តកំពង់ធំ ដែលមានតាំងពីទសវត្សឆ្នាំ១៩៦០ ហើយឆ្លុះបញ្ចាំងពីតថភាពធនធានធម្មជាតិនៃខេត្តកំពង់ធំ និងតំណាងឲ្យឈុតឆាកមួយក្នុងរឿងរាមកេរ្តិ៍។
៤. រូបកួរស្រូវ៖ តំណាងឲ្យភាពសម្បូរសប្បាយ និងភាពរុងរឿងនៃវិស័យកសិកម្ម ពិសេសគឺភោគផលនៃដំណាំស្រូវនៃខេត្តកំពង់ធំ។
៥. ដើមឈើ៖ តំណាងឲ្យការរីកចម្រើនលើវិស័យកសិ-ឧស្សាហកម្ម ដែលខេត្តកំពង់ធំសម្បូរដោយដីមានជីវជាតិ អំណោយផលដល់ដំណាំកសិកម្ម និងកសិ-ឧស្សាហកម្ម។
ចំណែកខ្សែបូរខាងក្រោមមានអក្សរខេត្តកំពង់ធំ ពណ៌ក្រហមក្រម៉ៅដែលតំណាងឲ្យពណ៌វប្បធម៌ ចង់បង្ហាញថាខេត្តកំពង់ធំជាខេត្តនៃវប្បធម៌ផងដែរ៕