Mandzukic ប្រកាសចូលនិវត្តន៍ពីក្រុមជម្រើសជាតិក្រូអាត
- 2018-08-14 14:07:28
- ចំនួនមតិ 0 | ចំនួនចែករំលែក 0
Mandzukic ប្រកាសចូលនិវត្តន៍ពីក្រុមជម្រើសជាតិក្រូអាត
ចន្លោះមិនឃើញ
ខ្សែប្រយុទ្ធ Mario Mandzukic បានប្រកាសចូលនិវត្តន៍ពីក្រុមបាល់ទាត់ជម្រើសជាតិក្រូអាតហើយ នាថ្ងៃទី១៤ ខែសីហានេះ។ ការប្រកាសនេះ ធ្វើឡើងមិនដល់មួយខែផង ក្រោយក្រូអាត ទទួលបានចំណាត់ថ្នាក់លេខ២ FIFA World Cup 2018។
Mandzukic បានសរសេរសារនៅលើបណ្ដាញសង្គម Twitter ថា៖ "ការឡើងដល់វគ្គផ្ដាច់ព្រ័ត្រ World Cup បានជំរុញថាមពលដល់ខ្ញុំយ៉ាងខ្លាំង ប៉ុន្តែវាក៏ជួយជំរុញឲ្យខ្ញុំសម្រេចចិត្តចូលនិវត្តន៍នេះ ងាយស្រួលជាងមុនដែរ។ ងាយស្រួលត្រង់ថា ខ្ញុំបានសម្រេចក្ដីសុបិនរបស់ខ្ញុំរួចហើយ គឺក្ដីសុបិនថានឹងទទួលបានជោគជ័យជាប្រវត្តិសាស្រ្ដ និងទទួលបានគាំទ្រដ៏អស្ចារ្យពីអ្នកគាំទ្រ។ ការលេងនៅវគ្គផ្ដាច់ព្រ័ត្រ World Cup រួមទាំងការទទួលស្វាគមន៍ពីសំណាក់អ្នកគាំទ្រនៅទូទាំងប្រទេសក្រូអាត គឺជាការចងចាំដ៏សំខាន់បំផុតក្នុងអាជីពរបស់ខ្ញុំ..."។
សូមបញ្ជាក់ថា Mandzukic បានជាប់ក្នុងក្រុមជម្រើសជាតិក្រូអាតលើកដំបូង កាលពីឆ្នាំ២០០៧ ដោយបានបង្ហាញខ្លួន ៨៩ប្រកួត និងស៊ុតបញ្ចូលទី ៣៣គ្រាប់។ កីឡាករដែលកំពុងលេងនៅក្លឹបអ៊ីតាលី Juventus រូបនេះ បានស៊ុតបញ្ចូលទី៣គ្រាប់ រួមចំណែកជួយឲ្យក្រអាត បានទទួលចំណាត់ថ្នាក់លេខ២ FIFA World Cup ជាប្រវត្តិសាស្រ្ដ៕
ចុចអាន៖ រឿង១០យ៉ាង ដែលអ្នកមិនបានដឹងពីប្រទេសក្រូអាត